Pearl (NSS) - ဒီဇင်ဘာ ၂၁

မလေးရှားနိုင်ငံ၌ လုပ်ငန်းခွင်ထိခိုက်မှုကြောင့် အမြဲတမ်းမသန်စွမ်းဖြစ်ခဲ့သော မြန်မာလုပ်သား အတွက်  မလေးရှားနိုင်ငံ၊ လူမှုဖူလုံရေးအဖွဲ့  (PERKESO)မှ ပေးအပ်သော အကျိုးခံစားခွင့်များရရှိရန် လုပ်ဆောင်နေကြောင်း အလုပ်သမားဝန်ကြီးဌာနမှ ထုတ်ပြန်ထားသည်။ 

မလေးရှားနိုင်ငံ၊ လူမှုဖူလုံရေးအဖွဲ့(PERKESO) ၌ မှတ်ပုံ တင်ထားသည့် မြန်မာလုပ်သား မောင်အောင်ကိုသင်းသည် မလေးရှား ၊ ပီနန်းပြည်နယ်ရှိ ဆောက်လုပ်ရေး ကုမ္ပဏီတစ်ခု၌ အလုပ်လုပ်ကိုင်နေစဉ် ၂၀၂၀ ခုနှစ်၊ မေလ ၂ ရက်တွင် အမြင့်မှ ပြုတ်ကျ၍ ဦးခေါင်းထိခိုက် ဒဏ်ရာရရှိပြီး အမြဲတမ်းမသန်စွမ်းဖြစ်ခဲ့သဖြင့် PERKESO မှ ဆေးကုသမှုပေးခဲ့ကြောင်း သိရသည်။ 

၎င်းအား မြန်မာနိုင်ငံသို့ပြန်လည်ပို့ဆောင်ရန် နှစ်နိုင်ငံလူမှုဖူလုံရေးအဖွဲ့ကြား Online ဖြင့် Technical Meeting များ ပြုလုပ်ခဲ့ပြီးနောက် မလေးရှားနိုင်ငံဆိုင်ရာ မြန်မာသံရုံး၏အကူအညီဖြင့် ရန်ကုန်အပြည်ပြည်ဆိုင်ရာလေဆိပ်သို့ ပြီးခဲ့သည့် ဒီဇင်ဘာလ (၁၃) ရက်က ပြန်လည်ရောက်ရှိခဲ့ကြောင်း သိရသည်။ 

လက်ရှိတွင် မောင်အောင်ကိုသင်းသည် မြောက်ဥက္ကလာ ပပြည်သူ့ဆေးရုံကြီး၌ လိုအပ်သည့် ဆေးကုသမှုများ ဆက်လက်ခံယူလျက်ရှိကြောင်း သိရသည်။ 

ထို့ပြင် ၎င်း၏ မိခင်ဖြစ်သူထံသို့ မြန်မာပြည်ပအလုပ် အကိုင်ဝန်ဆောင်မှုလုပ်ငန်းရှင်များအဖွဲ့ချုပ်မှ ငွေကျပ် (၂၂)သိန်းအား ထောက်ပံ့ခဲ့ပြီး PERKESO မှ ပေးအပ်မည့် အမြဲတမ်းမသန်စွမ်းမှု အကျိုးခံစားခွင့်များရရှိရန် ဆက်လက် ဆောင်ရွက်နေကြောင်း နစကဘက်က  သတင်းထုတ်ပြန်ထားသည်။ 

မလေးရှား၌ တရားဝင်သွားရောက်အလုပ်လုပ်ကိုင်နေသည့် မြန်မာရွှေ့ပြောင်းအလုပ်သမားများအနေဖြင့် PERKESO ၌ အကျုံးဝင်မှတ်ပုံတင်ရန်လိုအပ်ပြီး  လုပ် ငန်းခွင်ထိခိုက်မှုအတွက် အကျိုးခံစားခွင့်များ မြန်ဆန်စွာရရှိရန်  မြန်မာနိုင်ငံ၊ လူမှုဖူလုံရေးအဖွဲ့(SSB) နှင့် မလေးရှားနိုင်ငံ၊ လူမှုဖူလုံရေးအဖွဲ့ (PERKESO) တို့ အ ကြား ပူးပေါင်းဆောင်ရွက်လျက်ရှိကြောင်း  နစကမှ သတင်းထုတ်ပြန်ထားသည်။ 

ပြီးခဲ့သည့် ၂၀၂၀ ခုနှစ်၊ အောက်တိုဘာလ (၁၃)ရက်တွင် SSB  နှင့် PERKESO တို့ကြား လူမှုဖူလုံရေးအစီအစဉ်နှင့် လုပ်ငန်းစဉ်များမြှင့်တင်မှု ပူးပေါင်းဆောင်ရွက်ရေးဆိုင်ရာ နားလည်မှုစာချွန်လွှာ (MOC)ကို လက်မှတ်ရေး ထိုးခဲ့ကြောင်း သိရ သည်။