မျိုးကြီး (NSS) - ဒီဇင်ဘာ ၂၀

အင်အားကြီးနိုင်ငံများသည် လူ့အခွင့်အရေး၊ ဒီမိုကရေစီအရေးဆိုသည့် စကားလုံးများကို ရောင်းကုန်ပစ္စည်းကဲ့သို့ သဘောထားနေကြောင်း ဗိုလ်ချုပ်မှူးကြီးမင်းအောင်လှိုင်က ဝေဖန်ပြစ်တင်လိုက်သည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ယနေ့(ဒီဇင်ဘာလ ၂၀ ရက်)တွင် နေပြည်တော်၌ ကျင်းပသော လူငယ်နှင့်စာပေအနုပညာပွဲတော်တွင် အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။

လွန်ခဲ့သော ၁၉ ရာစုအတွင်း၌ နယ်ချဲ့ကိုလိုနီနိုင်ငံကြီးများ၏ ကျူးကျော်ရန်ပြုခဲ့မှုကြောင့် မြန်မာနိုင်ငံအပါ အဝင် နိုင်ငံငယ်များ ကျွန်ပြုခံခဲ့ရသည်ကို အားလုံးအသိပင်ဖြစ်ကြောင်း နစကဥက္ကဋ္ဌက ပြောသည်။

“ကျွန်တော်တို့ရဲ့ ဘိုးဘွားမိဘတွေဟာ ကိုလိုနီချဲ့တွေရဲ့ ဆိုးညစ်ယုတ်မာမှုတွေ၊ သွေးခွဲသတ်လျှိုအုပ်ချုပ်မှုတွေကြားက တိုင်းချစ်ပြည်ချစ်စိတ်နဲ့ ပြည်ထောင်စုစိတ် ဓာတ်ကို အရင်းပြုပြီး ပြန်လည်လွတ်မြောက်အောင် အသက်၊ သွေး၊ ချွေးတွေ ပေးဆပ်ရယူပေးခဲ့တာ (၇၆)နှစ်တိုင်ခဲ့ပြီဖြစ်ပါတယ်။ ဒီလိုအချိန်မှာ ကိုယ်လိုနီနယ်ချဲ့တို့ရဲ့ သွေးခွဲသတ်လျှိုအုပ်ချုပ်မှုရဲ့ အကျိုးဆက်ဟာ တိုင်းရင်းသားများကြာမှာ ယနေ့အချိန်ထိ ကျန်ရှိနေဆဲဖြစ်တယ်ဆိုတာ ကျွန်တော်တို့အားလုံး သတိပြု ကြရမှာဖြစ်ပါတယ်” ဟု ၎င်းက ပြောသည်။

ထို့ကြောင့် နိုင်ငံတော်ပြိုကွဲပျက်စီးမှု မဖြစ်ရန်အတွက် ဝိုင်းဝန်းကာကွယ်ဆောင်ရွက်ရန် လိုအပ်သကဲ့သို့ ခေတ်သစ်ကိုလိုနီဝါဒ၏ လုပ်နည်းလုပ်ဟန်များကိုလည်း မျက်ခြေမပြတ်စောင့်ကြည့်ကာ မျိုးဆက်သစ်လူငယ်များကို အသိပညာပေးကြရန် လိုအပ်သည်ဟုလည်း ဗိုလ်ချုပ်မှူးကြီးမင်းအောင်လှိုင်က တိုက်တွန်းထားသည်။

လက်ရှိတွင် အင်အားကြီးနိုင်ငံများသည် ဖွံ့ဖြိုးဆဲနိုင်ငံများကို ၎င်းတို့၏ သြဇာခံပုဆိန်ရိုးများ၊ ကြိုးဆွဲခံရုပ် သေးရုပ်များဖြင့် ထိုးဖောက်ဝင်ရောက်ကာ လူမျိုးရေး၊ ဘာသာရေးမှိုင်းတိုက်ပြီးနောက် မတည်မငြိမ်ဖြစ်ရန် လုပ်ကြံဖန်တီးနေကြောင်းလည်း ၎င်းက ထပ်မံသတိပေးထားသည်။

“လူ့အခွင့်အရေး၊ ဒီမိုကရေစီအရေးဆိုတဲ့ စကားလုံးတွေကို ရောင်းကုန်ပစ္စည်းလိုသဘောထားပြီး လိုသလိုပုံဖော်ဖိအားပေးတာတွေနဲ့ နည်းလမ်းပေါင်းစုံ၊ အကြံအစည်ပေါင်းစုံအသုံးပြုပြီး သူတို့ရဲ့ သြဇာလောင်းရိပ်အောက်ကို သွတ်သွင်းနိုင်ဖို့ ကြိုးစားနေကြပါတယ်” ဟု ဗိုလ်ချုပ်မှူးကြီးမင်းအောင်လှိုင်က ပြောသည်။

ထို့ကြောင့် မြန်မာနိုင်ငံအပါအဝင် နိုင်ငံငယ်များအနေဖြင့် နိုင်ငံတော်အား စည်းလုံးညီညွတ်စွာ ထိန်း သိမ်းကာကွယ်နိုင်စွမ်း မရှိပါက ဖရိုဖရဲပြိုကွဲသွားနိုင်ကြောင်းလည်း ၎င်းက ဆက်လက်သတိပေးထား သည်။

လက်ရှိတွင် အမေရိကန်နိုင်ငံသည် ခေါင်းစဉ်အမျိုးမျိုးဖြင့် အကြမ်းဖက်လက်နက်ကိုင်အဖွဲ့များကို ကူညီနေ လျက်ရှိပြီး မြန်မာနိုင်ငံအား ရန်သူသဖွယ် သဘောထားနေကြောင်းလည်း နစကဘက်က ဖွင့်ဟပြောကြားခဲ့ဖူးသည်။