Pika (NSS) - ဒီဇင်ဘာ ၁၉ 

မြောက်ကိုရီးယားနိုင်ငံနယ်စပ်နှင့်ထိစပ်နေသော ပန်မွန်ဂျွန်ရွာရှိ တောင်ကိုရီးယားနိုင်ငံဘက်ခြမ်းတွင် တပ်စွဲထားသော နိုင်ငံတကာတပ်ဖွဲ့ဝင်များကို သေနတ် ပြန်လည်ကိုင်ဆောင်ခွင့်ပြုလိုက်ပြီဖြစ်ကြောင်း ကုလသမဂ္ဂကွပ်ကဲမှု အဖွဲ့ (UNC) က ဒီဇင်ဘာလ(၁၉)ရက်တွင် ပြောကြားခဲ့သည်။

အမေရိကန်ဦးဆောင်သော (UNC) သည် နိုင်ငံပေါင်းစုံစစ်အင်အား အဖွဲ့တစ်ခုဖြစ်ပြီး ကိုရီးယားနှစ်နိုင်ငံကြားရှိ စစ်မဲ့ဇုန် (DMZ) အရေးကိစ္စများကို ကြီးကြပ်ကွပ်ကဲမှုများ လုပ်ဆောင်သည့်အဖွဲ့တစ်ခုဖြစ်ကြောင်း သိရသည်။

ပန်မွန်ဂျွန်သည် ကမ္ဘာ့လှည့်ခရီးသွားများလာရောက်လည်ပတ်ရာ နေရာတစ်ခုဖြစ်ပြီး Joint Security Area (JSA) ဟု လူသိများကြောင်းလည်း သိရသည်။ ထို့အပြင် အဆိုပါနေရာသည် ကိုရီးယားနှစ်နိုင်ငံကြား ဆွေးနွေးပွဲများ လုပ်ဆောင်သည့်နေရာတစ်ခုဖြစ်သလို နှစ်ဖက်လုံးမှတပ်ဖွဲ့ဝင်များ မျက်နှာချင်းဆိုင်လုနီးပါး ရပ်နေရသည့် အဆောက်အဦး အစုအဝေးတစ်ခုဖြစ်ကြောင်း သိရသည်။

မြောက်ကိုရီးယားစစ်တပ်သည် ပန်မွန်ဂျွန်ရွာရှိ ၎င်းတို့ဖက်ခြမ်းတွင်ရှိသော တပ်ဖွဲ့များကို လက်နက်ကိုင်လုံခြုံရေး အနေအထားများ ပြန်လည်စတင်ရန် ညွှန်ကြားခဲ့ပြီးနောက် တောင်ကိုရီးယားဘက်ခြမ်းရှိ UNC တပ်ဖွဲ့များကို သေနတ် ပြန်လည်ကိုင်ဆောင်ခွင့်ပြုသည့် ဆုံးဖြတ်ချက်ထွက်ပေါ်လာခြင်းဖြစ်ကြောင်း UNC ပြောရေးဆိုခွင့်ရှိသူ ဗိုလ်မှူးကြီး Isaac Taylor က ပြောကြားခဲ့သည်။

အဆိုပါလှုပ်ရှားမှုသည် နယ်စပ်ဒေသရှိ အရပ်သားများနှင့် စစ်ဘက်ဆိုင်ရာဝန်ထမ်းများကို အကာအကွယ်ပေးရန် ရည်ရွယ်ထားကြောင်း Isaac Taylor က ပြောကြားခဲ့သည်။ 

၎င်းက "ကျွန်တော်တို့ ဒီလုပ်ရပ်ကို သတိကြီးကြီးထားပြီး အရေးယူဆောင်ရွက်နေပါတယ်။ ပြီးတော့ JSA ဧရိယာမှာ လက်နက်ကိုင်ဆောင်ခြင်းမျိုးမရှိတာဟာ ကိုရီးယားကျွန်းဆွယ်အတွက် ပိုလုံခြုံပြီး ငြိမ်းချမ်းစေတယ်ဆို တာကိုလည်း တောင်ကိုရီးယားနဲ့ မြောက်ကိုရီးယားအစိုးရတို့ကို အကြောင်းကြားထားပါတယ်" ဟု ပြောခဲ့သည်။

မြောက်ကိုရီးယားနှင့် တောင်ကိုရီးယားတို့သည် ၂ဝ၁၈ ခုနှစ်က လက်မှတ်ရေးထိုးခဲ့သော စစ်ရေးသဘောတူညီများ အရ  JSA ဧရိယာရှိ ၎င်းတို့တပ်ဖွဲ့ဝင်များကို သေနတ်ကိုင်ဆောင်ခွင့်မပြုရန် သဘောတူညီခဲ့ကြကြောင်း သိရသည်။ သို့သော်လည်း နှစ်နိုင်ငံကြား စစ်ရေးသဘောတူညီချက်များကို နှစ်ဖက်စလုံးက ဆိုင်းငံ့ခဲ့ပြီးနောက် မြောက်ကိုရီး ယားတပ်ဖွဲ့ဝင်များသည် ပြီးခဲ့သည့်နိုဝင်ဘာလတည်းက သေနတ်များကို ပြန်လည်ကိုင်ဆောင်ခဲ့ခြင်းဖြစ်ကြောင်း သိရသည်။