Pika (NSS) - ဒီဇင်ဘာ ၁၈ 

စစ်မှုထမ်းရန် အတင်းအကြပ်စေခိုင်းခံခဲ့ရသော ယူကရိန်းနိုင်ငံသားများသည် ရှေ့တန်းစစ်မြေမျက်နှာပြင်တွင် ကောင်းမွန်စွာ စွမ်းဆောင်နိုင်ခြင်းမျိုးမရှိကြကြောင်း ယူကရိန်း၏ စစ်ဘက်ဆိုင်ရာထောက်လှမ်းရေးအကြီးအကဲ ကီရေးဘူဒါနော့ဗ်က ဝန်ခံပြောဆိုခဲ့သည်။

သို့သော်လည်း ယူကရိန်းနိုင်ငံတွင် စစ်မှုထမ်းရန်အတွက် လူသစ်စုဆောင်းမှုများကို ဆက်လက်လုပ်ဆောင်ရမည် ဖြစ်ပြီး စစ်သားသစ်စုဆောင်းခြင်းမှ မည်သူကမှ လွတ်မြောက်နိုင်မည်မဟုတ်ကြောင်း ၎င်းက သတိပေးခဲ့သည်။ ၂ဝ၂၄ ခုနှစ် စိန်ခေါ်မှုများနှင့်အလားအလာများ ခေါင်းစဉ်ဖြင့် ဆွေးနွေးပွဲတစ်ခုအတွင်း ကီရေးဘူဒါနော့ဗ်က ယခုကဲ့သို့ မှတ်ချက်ပြုပြောဆိုခဲ့ခြင်းဖြစ်ကြောင်း သိရသည်။

ထို့အပြင် ယူကရိန်းစစ်တပ်တွင် အတင်းအကြပ်စစ်မှုထမ်းစေခိုင်းရန် စိတ်ကူးကို ကီရေးဘူဒါနော့ဗ်က ကျောထောက်နောက်ခံပြုခဲ့ကြောင်းလည်း သိရသည်။ အဆိုပါအချက်သည် ယူကရိန်းစစ်တပ်တွင်ရှိသော စစ်သား အရေအတွက်ကို ဆက်လက်ထိန်းသိမ်းထားနိုင်မည့် တစ်ခုတည်းသောနည်းလမ်းဖြစ်ကြောင်း ကီရေးဘူဒါနော့ဗ် က ပြောခဲ့သည်။

၎င်းက "စစ်သားသစ်စုဆောင်းခြင်းကနေ လွတ်မြောက်နိုင်ဖို့ဆိုတာ မဖြစ်နိုင်ပါဘူး။ လက်ရှိအချိန်မှာ ယူကရိန်း စစ်တပ်မှာ လူပေါင်း(၁ ဒသမ ၁) သန်းခန့် တာဝန်ထမ်းဆောင်နေပါတယ်။ လက်တွေ့မှာတော့ အရာအားလုံးကို လုပ်ဆောင်ဖို့ဆန္ဒရှိတဲ့လူမျိုးတွေ ကျွန်တော်တို့မှာ မရှိပါဘူး။ ကျွန်တော်ပြောချင်တာက တိုက်ပွဲအကြောင်း မဟုတ်ပါဘူး။ ယူကရိန်းနိုင်ငံသားအများစုဟာ လက်နက်ကိုင်တပ်ဖွဲ့တွေကို ရှေ့တန်းစစ်မြေမျက်နှာပြင်ရဲ့ အဝေးကနေ ကူညီပံ့ပိုးမှုတွေလုပ်ဆောင်ပေးတာမျိုးကိုပဲ သဘောကျကြပါတယ်" ဟု ပြောခဲ့သည်။

၂ဝ၂၂ ခုနှစ် ဖေဖော်ဝါရီလတွင် ရုရှား-ယူကရိန်း ပဋိပက္ခစတင်ဖြစ်ပွားခဲ့ပြီးနောက်မကြာမီ ယူကရိန်းအစိုးရသည် စစ်သားသစ်စုဆောင်းမှုများကို စတင်လုပ်ဆောင်ခဲ့ပြီး အသက်(၁၈)နှစ်မှ (၆ဝ)နှစ်ကြားရှိ အမျိုးသားအများစုကို နိုင်ငံအတွင်းမှ ထွက်ခွာခြင်းအား တားမြစ်ပိတ်ပင်ခဲ့ကြောင်း သိရသည်။

သို့သော်လည်း အကျင့်ပျက်ခြစားမှုများနှင့် စစ်မှုထမ်းခြင်းမှ လွတ်မြောက်ရန် ရှောင်တိမ်းမှုများကြောင့် စစ်မှုထမ်း ခြင်းလုပ်ငန်းများတွင် အခက်အခဲများ နှင့် ရင်ဆိုင်ခဲ့ရကြောင်း သိရသည်။ ထို့အပြင် နောက်ထပ် စစ်သားသစ် စုဆောင်းရန် လုပ်ငန်းစဉ်များသည် ရှုပ်ထွေးမှုများရှိလာနိုင်ကြောင်း ယူကရိန်းသမ္မတဇီလန်စကီး၏ ထိပ်တန်း လက်ထောက်တစ်ဦးဖြစ်သည့် မီခေးလ်ပိုဒိုလိယက်ခ်က ယခုလအစောပိုင်းတွင် ဝန်ခံပြောဆိုခဲ့သည်။

ယူကရိန်းအစိုးရသည် စစ်သားသစ်စုဆောင်းရန် ဆွဲဆောင်မှုများအတွက် ၎င်း၏ ဝါဒဖြန့်မှုအပိုင်းကို ပိုမိုအရှိန်မြှင့်ရန်လည်း လိုအပ်ကြောင်း မီခေးလ်ပိုဒိုလိယက်ခ်က အကြုံပြုခဲ့သည်။