Pika (NSS) - ဒီဇင်ဘာ ၁၅ 

ထိုင်းအစိုးရရှေ့နေများသည် ငွေကြေးခဝါချမှု၊ နိုင်ငံဖြတ်ကျော် ရာဇဝတ်အဖွဲ့အစည်းများကို ကူညီထောက်ပံ့မှုဖြင့် အထက်လွှတ်တော်အမတ် Upakit Pachariyangkun ကို ဒီဇင်ဘာလ(၁၄)ရက်က ရာဇဝတ်တရားရုံးတွင် တရားစွဲဆိုမှုများ လုပ်ဆောင်ခဲ့ကြောင်း သိရသည်။

ရှေ့နေချုပ်ရုံး(OAG) သည် Upakit Pachariyangkun ကို ငွေကြေးခဝါချမှု၊ နိုင်ငံဖြတ်ကျော် ရာဇ၀တ်မှုဆိုင်ရာ အဖွဲ့အစည်းတွင် ပါဝင်မှု၊ တရားမဝင် မူးယစ်ဆေးဝါးကွန်ရက်တွင် ပူးပေါင်းကူညီမှု (သို့မဟုတ်) ပူးပေါင်းပါဝင်မှုတို့ ဖြင့် စွဲချက်တင်ခဲ့ပြီးနောက် ယခုကဲ့သို့  တရားစွဲဆိုမှုများ လုပ်ဆောင်ခဲ့ခြင်းဖြစ်ကြောင်း သိရသည်။

အထက်လွှတ်တော်အမတ် Upakit Pachariyangkun သည် မူးယစ်ဆေးဝါးရောင်းဝယ်ဖောက်ကားမှု၊ ငွေကြေး ခဝါချမှုတို့ဖြင့် ပြီးခဲ့သည့်နှစ် စက်တင်ဘာလတွင် ဖမ်းဆီးခံခဲ့ရသော မြန်မာနိုင်ငံသားဦးထွန်းမင်းလတ် နှင့် ဆက်ဆံ ရေးများရှိသည်ဟု စွပ်စွဲခံခဲ့ရကြောင်းလည်း သိရသည်။

Upakit Pachariyangkun သည် ၎င်း၏ ရှေ့နေနှင့်အတူ ဒီဇင်ဘာလ(၁၄)ရက်တွင် တရားရုံးသို့ရောက်ရှိလာခဲ့ပြီး စွဲချက်အားလုံးကို ငြင်းဆန်ပယ်ချခဲ့ကြောင်းလည်း သိရသည်။ OAG ပြောရေးဆိုခွင့်ရှိသူ Prayut Phetkhun က "အစိုးရရှေ့နေတွေဟာ Upakit Pachariyangkun ကို တရားမဝင်မူးယစ်ဆေးဝါးများကွန်ရက်တွင် ပါဝင်မှု၊ ကတ်တမင်းဆေးပြားများ တရားမဝင်လက်ဝယ်ထားရှိမှု၊ ငွေကြေးခဝါချမှု၊ နိုင်ငံဖြတ်ကျော်ရာဇဝတ်အဖွဲ့အစည်း များတွင် ပါဝင်မှုနဲ့ အခြားဆက်စပ်အမှုတွေ အပါအဝင် ပြစ်မှု(၆)မှုနဲ့ တရားစွဲဆိုထားပါတယ်။ ဒီအမှုကို တရားရုံးက လက်ခံခဲ့ပြီး လာမယ့်နှစ်မေလ(၁၃)ရက်မှာ သက်သေတွေကို စစ်ဆေးဖို့ စီစဉ်ထားပါတယ်" ဟု ပြောခဲ့သည်။

ပြီးခဲ့သည့်မတ်လ(၁၇)ရက်တွင် အသက်(၆၁)နှစ်အရွယ် Upakit Pachariyangkun သည် ၎င်းကို မြန်မာနိုင်ငံသား ဦးထွန်းမင်းလတ်နှင့်ဆက်စပ်သည်ဟု ပြောဆိုခဲ့သော ရှေ့သို့ချီပါတီလွှတ်တော်အမတ် Rangsiman Rome ၏ ပြောဆိုချက်များကို တုံ့ပြန်ပြောဆိုရန်အတွက် သတင်းစာရှင်းလင်းပွဲတစ်ခုကို ကျင်းပခဲ့ကြောင်းလည်း သိရသည်။

ထိုင်း-မြန်မာနယ်စပ်တွင် လည်ပတ်နေသော လျှပ်စစ်ဓါတ်အားပေးဝေရေးလုပ်ငန်းမှတစ်ဆင့် မူးယစ်ဆေးဝါး ရောင်းဝယ်မှုများလုပ်ကာ ငွေကြေးခဝါချမှုများ လုပ်ခဲ့သည်ဆိုသည့် စွပ်စွဲချက်များကို  Upakit Pachariyangkun က ငြင်းဆိုခဲ့ကြောင်းလည်း သိရသည်။ 

OAG သည် Upakit Pachariyangkun ၏ အမှုကို စစ်ဆေးရန်အတွက် အကြီးတန်းအစိုးရရှေ့နေ Watcharin Phanurat ဦးဆောင်သော စုံစမ်းစစ်ဆေးရေးအဖွဲ့ကို ဖွဲ့စည်းခဲ့ကြောင်း သိရသည်။ အဆိုပါအဖွဲ့မှ တွေ့ရှိချက်များ ကို တာဝန်ခံရှေ့နေများထံ တင်ပြကာ OAG ကို အစီရင်ခံစာတင်ပြခဲ့ပြီးနောက် စွဲချက်တင်ရန် ဆုံးဖြတ်ခဲ့ခြင်းဖြစ် ကြောင်း သိရသည်။

ပြီးခဲ့သည့်လတွင် မူးယစ်ဆေးဝါးထိန်းချုပ်ရေးဘုတ်အဖွဲ့(ONCB) သည် မူးယစ်ဆေးဝါးကွင်းဆက်များတွင် ပါဝင်မှု၊ ငွေကြေးခဝါချမှုများကဲ့သို့သော စွပ်စွဲချက်များနှင့် ဆက်စပ်နေသော Upakit Pachariyangkun ၏ ပိုင်ဆိုင်မှု ဘတ်(၂၈၅) သန်းကို သိမ်းဆည်းခဲ့ကြောင်း သိရသည်။ ထို့အပြင် နိုဝင်ဘာလ(၃ဝ)ရက်တွင် (ONCB) သည် ဘတ်(၄၇၆ ဒသမ ၆) သန်း တန်ဖိုးရှိ နောက်ထပ်ပိုင်ဆိုင်မှုများကို ထပ်မံသိမ်းဆည်းခဲ့ကြောင်း သိရသည်။