Htay Oung (NSS) - ဒီဇင်ဘာ ၁၄ 

တရုတ်ပြည်တွင်းစစ်ရဲ့ နောက်ဆုံးနှစ်များအတွင်း မော်စီတုံးရဲ့ကွန်မြူနစ်များကို တွန်းလှန်တိုက်ခိုက်ရင်း အရှုံးကြီး ရှုံးနိမ့်ခဲ့သူ ဆွန်ကူရှီဟာ ၁၉၄၉ ခုနှစ် ထိုင်၀မ်ရေလက်ကြားကို ၈ ရက်ကြာ အသက်လုဖြတ်သန်းခဲ့စဉ် ပရမ်းပတာ အဖြစ်အပျက်များကို ယခုတိုင် ပြတ်ပြတ်ထင်ထင် အမှတ်ရနေတယ်လို့ Reuters က ဒီနေ့ ဒီဇင်ဘာလ ၁၄ ရက်က ရေးသားခဲ့ပါတယ်။ 

“ဆိုက်ကပ်စရာ ဆိပ်ကမ်းရယ်လို့ ရှိတာ မဟုတ်ဘူး၊ လှေထဲဝင်လာတဲ့ရေတွေကို လူတိုင်းက မနားတမ်း ခပ်ထုတ်နေရတယ်” လို့ ထိုင်ဝမ်မြောက်ပိုင်း ထော့ယွမ်မြို့ အစိုးရစစ်မှုထမ်းဟောင်းများ စောင့်ရှောက်ရေးစင်တာ မှာ အသက် ၁၁ဝ နှစ်ရှိပြီဖြစ်တဲ့ ဆွန်က ပြောပါတယ်။ 

“အခုခေတ်လူငယ်တွေနဲ့ စကားစမြည်ပြောရတဲ့အခါ အဲဒီလိုအချိန်ကာလမျိုးဆိုတာ မတွေးတတ်ကြဘူး။ ဂရုလဲ မစိုက်ဘူး၊ အဲဒါတွေက ပြီးခဲ့တဲ့အကြောင်းအရာတွေပဲလို့ နားမထောင်ချင်တဲ့သူ မရှိဘူး” လို့ ကွန်မြူနစ်တရုတ်တို့နဲ့ တိုက်ခိုက်ခဲ့ဖူးများအနက် နောက်ဆုံးကျန်ရှိနေတဲ့ ထိုင်ဝမ်မျိုးဆက်ကြီးက ဆိုပါတယ်။

လွန်ခဲ့သောဆယ်စုနှစ် ၇ ခုကျော်က အရေးနိမ့်ခဲ့တဲ့ တရုတ်သမ္မတနိုင်ငံ (ကူမင်တန်) အစိုးရဟာ ထိုင်ဝမ်ကို တိမ်းရှောင်နိုင်ခဲ့ပါတယ်။ ယနေ့တိုင် ဆက်လက်တည်ရှိနေပေမယ့် တရုတ်ပြည်သူ့သမ္မတနိုင်ငံ လို့ခေါ်တဲ့ ပြည်မကြီးအစိုးရနဲ့ စစ်ပွဲအဆုံးသတ်ကြောင်း ငြိမ်းချမ်းရေးစာချုပ်ချုပ်ဆိုတယ်လို့ ဘယ်တုန်းကမှ မရှိခဲ့ပါဘူး။ အစိုးရအသီးသီးတို့ကလည်း တစ်ဖက်နဲ့ တစ်ဖက် အသိအမှတ်မပြုခဲ့ကြပါဘူး။

လွန်ခဲ့တဲ့ လေးနှစ်တာကာလအတွင်း တရုတ်နိုင်ငံဟာ သူတို့ရဲ့ပိုင်နက်နယ်မြေအဖြစ် သတ်မှတ်ထားတဲ့  ကျွန်းမြေ အပေါ် စစ်ရေးအရ ဖိအားပေးမှုများကို အရှိန်မြှင့်လုပ်ဆောင်ခဲ့ပါတယ်။ အင်အားအလုံးအရင်းနဲ့ စစ်ရေးလေ့ကျင့်မှု ကို နှစ်ကြိမ်တိုင်တိုင်ပြုလုပ်ခဲ့အတွက် အမေရိကန်အနေနဲ့ စစ်မက်ဖြစ်ပွားလာမှာကို စိုးရိမ်နေရပါတယ်။

အဲဒီတင်းမာမှုတွေဟာ ထိုင်ဝမ်ရဲ့ဇန်နဝါရီ ၁၃ ရက်မှာ ကျင်းပမယ့်  သမ္မတနဲ့ ပါလီမန်ရွေးကောက်ပွဲများရဲ့ မဲဆွယ် စည်းရုံးရေးများအပေါ်မှာ အရိပ်ထိုးနေပါတယ်။ ၁၉၄၉ ခုနှစ် တရုတ်နိုင်ငံမှ ထွက်ပြေးခဲ့ပြီး  လက်ရှိအစိုးရရဲ့အဓိက အတိုက်အခံဖြစ်နေတဲ့ ကူမင်တန်ပါတီ (KMT) က ပေကျင်းရဲ့လေသံအတိုင်း စစ်ပွဲနဲ့ ငြိမ်းချမ်းရေး ကြိုက်ရာရွေး”  ဆောင်ပုဒ်ကို ရွေးကောက်ပွဲကို မူဝါဒအဖြစ် ကိုင်စွဲထားပါတယ်။

ထိုင်ဝမ်ရဲ့ သီးခြားဝိသေသလက္ခဏာကို အသားပေးရာမှာ အထူးထင်ရှားသူ လက်ရှိအာဏာရ (ဆိုင်အင့်၀မ်ရဲ့) ဒီမိုကရက်တစ်တိုးတက်ရေးပါတီ (DPP) ကတော့ ထိုင်ဝမ်လူမျိုးများကသာ ထိုင်၀မ်ရဲ့အနာဂတ်ကို ဆုံးဖြတ်နိုင် တယ်လို့ ခံယူထားပြီး ဘယ်သူမျှ စစ်ပွဲကိုမလိုလားဘူးလို့ အကြောက်တရားနဲ့ဘောင်ခတ်ခြင်းကို ဒေါသတကြီး ပယ်ချထားပါတယ်။

ဒုတိယကမ္ဘာစစ်နဲ့အတူ တရုတ်ပြည်တွင်းစစ်အပြီး ၁ဝ နှစ်ကျော်အကြာ ၁၉၅၈ ခုနှစ်မှာ ဒုတိယထိုင်ဝမ် ရေလက်ကြားပဋိပက္ခဖြစ်ပွားခဲ့ပါတယ်။ ပြည်မကြီး (ခေါ်) တရုတ်ပြည်သူ့သမ္မတနိုင်ငံ PRC မှ တပ်တွေဟာ အဲဒီအချိန် တရုတ်သမ္မတနိုင်ငံ ROC ထိုင်၀မ်တို့က ထိန်းချုပ်ထားတဲ့ ကင်မင်းကျွန်းပေါ်ကို အမြောက်ကြီးများနဲ့ ပစ်ခတ်ပြီး သိန်းနဲ့ချီတဲ့တရုတ်ပြည်သူ့လွတ်မြောက်ရေးတပ်က စစ်သားတွေဟာ ကုန်းရေနှစ်သွယ်မှ ကမ်းတက်ဖို့ အသင့်ပြင်ခဲ့ကြဖူးပါတယ်။ အမေရိကန်ရဲ့အကူအညီနဲ့ ထိုင်ဝမ်အမျိုးသားတပ်က ခုခံတိုက်ခိုက်ရာမှာ “ဒေါင်းဒင်ကျွန်း” တစ်ဝှိုက် ရေကြောင်းတိုက်ပွဲဖြစ်ပွားခဲ့ပါတယ်။

၁၉၅၄-၅၅-ခုနှစ် ပထမထိုင်၀မ်ရေလက်ကြားပဋိပက္ခနဲ့ ဆက်တိုက်ဆိုသလိုဖြစ်ပွားခဲ့တဲ့ အဲဒီစစ်ရေးထိပ်တိုက် တွေ့မှုဟာ ကမ္ဘာ့အရှေ့အနောက် စစ်အေးတိုက်ပွဲရဲ့ တစ်စိတ်တစ်ပိုင်းလို့ ဆိုနိုင်ပါတယ်။ ဝါရှင်တန်က ပေကျင်းကို နျူကလီယာဗုံး ကြဲရမတတ်ဖြစ်ခဲ့ရတဲ့ စစ်ပွဲမှာ နှစ်ဘက်စလုံးမှ စစ်သား ၅ဝဝ ခန့်စီ အသီးသီး ကျဆုံးခဲ့ရပါတယ်။ ကြောက်မက်ဖွယ် အဲဒီဖြစ်ရပ်ကို ထိုင်၀မ်စစ်ပြန်အချို့က ကောင်းကောင်းကြီး မှတ်မိနေပါတယ်။ 

အသက် ၉၃ နှစ်အရွယ် ရင်တေချွန်ဟာ ၁၉၅ဝ-၅၃ ကိုရီးယားစစ်ပွဲဖြစ်ပွားစဉ် တရုတ်နိုင်ငံအတွက် တိုက်ပွဲဝင်ခဲ့သူ ဖြစ်ပါတယ်။ ကိုရီးယားစစ်မြေပြင်မှာ (အမေရိကန်ဦးဆောင်) ကုလသမဂ္ဂတပ်များရဲ့ ဖမ်းဆီးခြင်းကို ခံခဲ့ရပါတယ်။

ကိုရီးယားစစ်ပွဲပြီးသွားတဲ့အခါ သူ့ရဲ့ဆန္ဒအလျောက် ထိုင်ဝမ်ကို ရောက်ရှိလာပြီး ကျွန်းနိုင်ငံသား ဖြစ်သွားခဲ့ပါတယ်။ သူဟာ အခြားစစ်ပြန်များနည်းတူ တရုတ်ကွန်မြူနစ်များကို ရည်ညွှန်းပြီး "ဓားပြအမာခံနယ်မြေကို ဖြိုခွင်းရေး" လို့ အဓိပ္ပါယ်ရတဲ့စာလုံးများကို သူ့ကိုယ်ပေါ်မှာ တက်တူးထိုးထားပါတယ်။ တရုတ်ဒုတိယသမ္မတနဲ့ ပြည်သူ့ လွတ်မြောက်ရေးတပ်အကြီးအကဲ “ဇူဒီကို အပြတ်ရှင်း” လို့လည်း ရေးထားပါတယ်။ 

ရင်တေချွန်ဟာ ဒုတိယထိုင်၀မ်ရေလက်ကြားပဋိပက္ခမှာ ပြည်မကြီး ရှားမင်းမြို့ (ယခင် အမွိုင်) ကမ်းလွန် ကင်မင်းကျွန်းအရေးအခင်းမှာ ထိုင်၀မ်စစ်သားတစ်ဦးအဖြစ် ပါ၀င်တိုက်ခိုက်ခဲ့ပါတယ်။ “တိုက်ပွဲတွေ ထပ် ဖြစ်ဦး မလား မသိဘူး..” ရင်တေချွန်က ဆိုပါတယ်။ "ဒါဟာ DPP ပါတီအပေါ်မှာ မူတည်တယ်။ သူတို့ ဒီအတိုင်း ဆက်သွားနေမယ်ဆိုရင် တကယ်ဖြစ်လာမှာပဲ" လို့ ပြောပါတယ်။

တရုတ်နိုင်ငံဟာ  ခွဲထွက်ရေးသမားတွေလို့ သူတို့သတ်မှတ်ထားတဲ့ DPP ပါတီကို မနှစ်သက်ပဲ ဆွေးနွေးဖို့အတွက် ကမ်းလှမ်းမှုများကို အကြိမ်ကြိမ် ပယ်ချခဲ့ပါတယ်။ လက်ရှိ ဒုတိယသမ္မတဖြစ်သူ လိုင်ချင်တေဟာ DPP ပါတီရဲ့ သမ္မတလောင်းဖြစ်ပြီး  ရွေးကောက်ပွဲမှာ ဦးဆောင်နေပါတယ်။

ကူမင်တန်အစိုးရစစ်သားဟောင်း ဆွန်ကူရှီနဲ့ သူတို့ရဲ့တရုတ်လူမျိုး ဝိသေသလက္ခဏာကို နီးကပ်စွာ ဖက်တွယ်ထား တဲ့ အခြားစစ်ပြန်တွေဟာ ပင်မရေစီးထိုင်၀မ်လူ့အဖွဲ့အစည်းကို ကိုယ်စားပြုခြင်းမရှိပါဘူး။ လက်ရှိ ကျွန်းနိုင်ငံ အတွင်း နေထိုင်သူတွေဟာ သူတို့ဟာ ထိုင်ဝမ်လူမျိုးဖြစ်ပြီး တရုတ်မဟုတ်ဖူးလို့ တခဲနက်ခံယူထားကြောင်း စစ်တမ်းများအရ သိရှိရပါတယ်။

“မျိုးဆက် အရွေ့ဆိုတာ သေချာပေါက်ရှိပါတယ်၊ ရှေးကျတဲ့မျိုးဆက်တွေက တရုတ်လူမျိုးတစ်မျိုးတည်း ဖြစ်နိုင်ချေ နည်းနည်းပိုများပြီး မျိုးဆက်သစ်လူငယ်တွေမှာတော့ အများကြီးနည်းပါတယ်” လို့ သြစတြေးလျ နေရှင်နယ်တက္ကသိုလ် ထိုင်ဝမ်အရေးလေ့လာသူ နိုင်ငံရေးသိပ္ပံပညာရှင် ဆောင်ဝမ်တေက မှတ်ချက်ပေးပါတယ်။  

“လူငယ်တွေမှာ တရုတ်အမျိုးသားရေးလက္ခဏာနဲ့ ဆန့်ကျင်ပြီး သီးခြား၊ ကွဲပြားလုနီးပါးရှိတဲ့ ထိုင်ဝမ်အမျိုး သားရေးလက္ခဏာတွေ ရှိတတ်ပါတယ်၊” “အဲဒါကြောင့် တရုတ်လူမျိုးတစ်မျိုးတည်း အယူအဆအပေါ်  ထောက်ခံ တဲ့လမ်းကြောင်းက နိမ့်ကျသွားတဲ့ သဘောပဲ” လို့ ဆိုပါတယ်။

ထိုင်ဝမ်စစ်မှုထမ်းဟောင်းဌာနက တရုတ်နဲ့ စစ်တိုက်ခဲ့တဲ့ စစ်သားအရေအတွက်ကို အတိအကျ မဖော်ပြထားပါဘူး။ ပြီးခဲ့တဲ့နှစ်စာရင်းအရ အသက် ၈၅ နှစ်နှင့်အထက် စစ်မှုထမ်းဟောင်း အမျိုးသား ၅၆,ဝဝဝ ခန့်ကို စာရင်းပြုစုထားပါတယ်။

ကျွန်းမြောက်ပိုင်း ထောက်ယွမ်မြို့ စစ်မှုထမ်းဟောင်းကြီးရဲ့ နားခိုရာနေရာ၀င်ပေါက်ဟာ တိုက်လေယာဉ်ဟောင်း တစ်စီး၊ ဆေးသား လွင့်ပြယ်နေတဲ့ တင့်ကားတစ်စီးအပါအ၀င် အတိတ်ကာလ ပဋိပက္ခများရဲ့အမှတ်တရတို့နဲ့ ဝန်းရံ ထားပါတယ်။ အာဏာရှင်တစ်ဦးအဖြစ် ထိုင်၀မ်အများအပြားက ဝေဖန်ကြပေမယ့်  မော်ကွန်မြူနစ်များကို တိုက်ခိုက်သူအဖြစ် အခြားသူများက လေးစားခြင်းခံရတဲ့ သမ္မတဟောင်း ချန်ကေရှိတ်ရဲ့ ရုပ်တုကြီးဟာ စစ်မှုထမ်း ဟောင်းများ လေ့ကျင့်ခန်း (သို့မဟုတ်) ဘီးတပ်ကုလားထိုင်ဖြင့် တွန်းသွားခံနေရတဲ့ ဝင်းကြီးထဲမှာ မတ်တပ်ရပ်နေ ပါတယ်။

ကိုရီးယားစစ်ပွဲမှာ စစ်သုံ့ပန်းတစ်ဦးအဖြစ် ဖမ်းဆီးခံရပြီး ထိုင်ဝမ်ကို ရောက်ရှိလာသူ ၀မ်ချင်းချွမ်ဟာ ဒုတိယ ထိုင်၀မ်ရေလက်ကြား ပဋိပက္ခ ကင်မင်းတိုက်ပွဲမှာ ကျွန်းနိုင်ငံဘက်က စစ်သားအဖြစ် ပါဝင်ခဲ့သူဖြစ်ပါတယ်။ ယခု အသက် ၉၃ နှစ်ရှိပြီဖြစ်တဲ့ ၀မ်ချင်းချွမ်ဟာ ကိုရီးယားစစ်ပွဲမှာ တရုတ်ဘက်က ၀င်ရောက်တိုက်ခိုက်ပေးခဲ့စဉ် ၁၃ နှစ် သားအရွယ်သာ ရှိပါသေးတယ်။

“ဒီမှာ တပ်ထဲ စရောက်တော့ အုပ်စုဖွဲ့ ဖိနှိပ်ခံရတယ်။ ပြည်တွင်းစစ်သာဖြစ်ခဲ့ရင် သူတို့တွေ ကလေး အဖေတောင် ဖြစ်ခွင့်ရမှာ မဟုတ်ဖူး၊ "ဒီနေ့အထိ ရုပ်မြင်သံကြားကနေ စစ်ပွဲတွေလာရင်ကို မကြည့်ချင်ဘူး။ စစ်ပွဲက ရက်စက် ကြမ်းကြုတ်တယ်" လို့ ကွန်မြူနစ်စစ်သားဟောင်းတစ်ဖြစ်လဲ ထိုင်ဝမ်စစ်ပြန်ကြီးက မှတ်ချက်ပေးပါတယ်။

#မော်စီတုံးတရုတ်ကွန်မြူနစ် #ထိုင်၀မ်အထွေထွေရွေးကောက်ပွဲ #ထော့ယွမ်မြို့ #ကူမင်တန်ပါတီ #တရုတ်သမ္မတနိုင်ငံ(ထိုင်၀မ်) တရုတ်ပြည်သူ့သမ္မတနိုင်ငံ(ပြည်မကြီး) #ဒီမိုကရက်တစ် တိုးတက်ရေးပါတီ #ဒုတိယထိုင်၀မ်ရေလက်ကြားပဋိပက္ခ 

(Reuters., 14 Deecember, “Taiwan's last generation to fight China” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။)