ဂျန်ဇက် (NSS) - ဒီဇင်ဘာ ၁၃ 

မြန်မာနိုင်ငံရဲ့ပြည်တွင်းလက်နက်ကိုင်ပဋိပက္ခတွေကို ဖြေရှင်းနိုင်အောင် ကြိုးပမ်းရာမှာ ထိုင်းနိုင်ငံဟာ အဓိက အခန်းကဏ္ဍက ပါဝင်သင့်တယ်လို့ ထိုင်းဝန်ကြီးချုပ်က ထုတ်ဖော်ပြောကြားလိုက်ပါတယ်။ 

ထိုင်းဝန်ကြီးချုပ်ဆာရက်သာတာဗီဆင်ဟာ ထိုင်းဝန်ကြီးချုပ်အဆောက်အဦးမှာ ကျင်းပတဲ့   Nikkei Asia သတင်းဌာနနဲ့ အင်တာဗျူးအစီအစဉ်မှာ အခုလိုမျိုးပြောဆိုခဲ့တာဖြစ်ပါတယ်။ ဝန်ကြီးချုပ်ဆာရက်သာတာဗီဆင် က "အာဆီယံသဘောတူညီချက်ငါးချက်ကို လိုက်နာဆောင်ရွက်သွားမယ်။ ဒါပေမယ့် ကျွန်တော်တို့ဟာ မြန်မာနိုင်ငံနဲ့ အနီးစပ်ဆုံးရှိနေတဲ့နိုင်ငံဖြစ်တယ်။ ကျွန်တော်တို့ဟာ မြန်မာနိုင်ငံနဲ့ ကီလိုမီတာ ၂ဝဝဝ ကျော် နယ်နိမိတ်ချင်းထိစပ်နေတယ်။ ဒါကြောင့် ထိုင်းနိုင်ငံဟာ မြန်မာနိုင်ငံရေး အငြင်းပွားမှုတွေကို စေ့စပ်ဆွေးနွေးရာမှာ ပါဝင်ဖို့ သင့်တော်မယ်လို့ထင်ပါတယ်" လို့ ပြောပါတယ်။ 

ထိုင်းဝန်ကြီးချုပ်က "မြန်မာနိုင်ငံရဲ့ပြည်တွင်းရေးပြသာနာတွေက နေရာတိုင်းမှာစစ်ပွဲတွေအဖြစ် အရှိန်မြင့်တက် နေတယ်။ ဒါကြောင့် မြန်မာနိုင်ငံအတွင်းရှိ ပြည်တွင်းလက်နက်ကိုင်အဖွဲ့အစည်းတွေဟာ မူးယစ်ဆေးဝါးရောင်းချမှု ကနေ ဝင်ငွေရရှိဖို့ လိုအပ်တယ်။ ကျွန်တော်တို့ဟာ နယ်စပ်ဒေသကို ပိုမိုကောင်းမွန်စွာလုပ်ဆောင်ဖို့ လိုအပ်တယ်" လို့ ပြောပါတယ်။

မြန်မာနိုင်ငံမှာ လက်နက်ကိုင်ပဋိပက္ခတွေကြောင့် နေရပ်စွန့်ခွာတိမ်းရှောင်သူတွေနဲ့ နယ်စပ်ဖြတ်ကျော် မူးယစ်မှောင်ခိုတင်သွင်းမှုတွေကြောင့် ထိုင်းနဲ့ မြန်မာနယ်စပ်ဒေသကို ကာကွယ်ဖို့ လိုအပ်တယ်လို့လည်း ထိုင်းဝန်ကြီးချုပ် ဆာရက်သာတာဗီဆင်က ပြောပါတယ်။ မြန်မာနိုင်ငံမှာ ၂ဝ၂၁ ခုနှစ်က အာဏာသိမ်းမှုဖြစ်ပွားခဲ့ပြီးနောက် အာဆီယံအဖွဲ့ကြီးဟာ မြန်မာနိုင်ငံရေးအခက်အခဲတွေကို ဖြေရှင်းနိုင်အောင် ကြားဝင်ဆောင်ရွက်ခဲ့ပြီး အာဆီယံသဘောတူညီချက် ငါးချက်ကို ရယူနိုင်ခဲ့ပါတယ်။ အဲဒီအာဆီယံသဘောတူညီချက်ငါးချက် အကောင်အထည်ဖော်ရေးဟာလည်း လက်ရှိအချိန်အထိ သိသာတိုးတက်မှုတွေမရှိဘူးလို့ ဝေဖန်မှုတွေ ရှိနေဆဲဖြစ်ပါတယ်။