News Services Station

မော်လမြိုင်တောင်ဝိုင်းတောင်တက်ကားလမ်းအား နံနက် ၆ နာ ရီ မှ ညနေ ၆ နာရီအထိသာ ဖြတ်သန်းခွင့်ပြု

အထွေထွေ , ပြည်တွင်း | 13 Dec 2023 | 292 | 0 |

ကျော် (NSS) - ဒီဇင်ဘာ ၁၃

မွန်ပြည်နယ်၊ မော်လမြိုင်မြို့ရှိ မော်လမြိုင်တောင်ဝိုင်းတောင်တက်ကားလမ်းအား မော်လမြိုင်မြို့နယ် အထွေထွေအုပ်ချုပ်ရေးဦးစီးဌာနမှ နံနက် ၆ နာရီမှ ညနေ ၆ နာရီအထိ ဖြတ်သန်းသွား လာခွင့်ပေးမည်ဖြစ်ကြောင်း မော်လမြိုင်မြို့အခြေစိုက်လူမှုကူညီရေးအသင်းများထံမှ သိရသည်။

ထို့ကြောင့် မော်လမြိုင်တောင်ဝိုင်းတောင်တက်ကားလမ်းအား လမ်းလျှောက်တက်ရောက်၍ နံနက်ခင်း နှင့် ညနေပိုင်းအလှများအား ကြည့်ရှုလိုသူများ၊ ကျန်းမာရေးအရလမ်းလျှောက်လိုသူများအနေဖြင့် အဆိုပါအချိန်အတွင်းသာ လမ်းလျှောက်ခွင့်ရတော့မည်ဖြစ်ကြောင်း သိရသည်။

မော်လမြိုင်မြို့ရှိ မော်လမိုင်တောင်ဝိုင်းတောင်တက်ကားလမ်း၏ တောင်တက်လမ်းလျှောက်ရာသီအား တောင်တက်လမ်းလျှောက်လိုသူများ၊ တောင်တက်လမ်းလျှောက်ဘုရားဖူးသူများအတွက် ယခုနှစ် ဒီဇင်ဘာလမှစတင်၍ ၂၀၂၄ ခုနှစ်၊ ဖေဖော်ဝါရီ လအထိ (၃)လသတ်မှတ်ထားသည်။

"တောင်တက်လမ်းလျှောက် ရာသီစဖွင့်ခါစက မနက် ၄ နာရီကနေ ည ၈ နာရီအထိ လမ်းလျှောက်တက်ခွင့်ရတယ်။ ပြီးခဲ့တဲ့ရက် ပိုင်းကမှစပြီး မော်လမြိုင်မြို့နယ်ထွေအုပ်က တောင်တက်ကားလမ်းပေါ်မှာ ည ၆ နာရီကနေ မနက် ၆ နာရီအထိ ဖြတ်သန်းခွင့်မပြုဘူးလို့ အမိန့်ထုတ်တယ်ဆိုတဲ့ ဗီနိုင်းလာချိတ်သွားတာ။ ဒေသန္တရအမိန့်လို့ပြောတယ်"ဟု မော်လမြိုင်မြို့အခြေစိုက်လူမှုကူညီရေးအသင်းဝင်တစ်ဦးက ပြောသည်။

အဆိုပါ မော်လမြိုင်တောင်ဝိုင်းတောင်တက်ကားလမ်း၏ တောင်တက်လမ်းလျှောက်ရာသီစတင်ဖွင့်လှစ်ချိန်က နံနက် ၄ နာရီမှစ၍ ည ၈ နာရီအထိ လမ်းလျှောက်ခွင့်ပြုခဲ့သဖြင့် နံနက်ပိုင်းနေထွက်ချိန်အလှအားကြည့်ရှုသူများ နှင့် ညပိုင်းနေဝင်ချိန်အလှအားကြည့်ရှုရန် လမ်းလျှောက်လာသူများဖြင့် စည်ကားခဲ့ကြောင်း သိရသည်။

"အရင်ကဆိုရင် တောင်တက်လမ်းလျှောက်ရာသီစဖွင့်ချိန် ကျွန်တော်တို့အဖွဲ့က စက်ဘီးတွေနဲ့သွားကြတယ်။ ကားနဲ့ဆိုင်ကယ်တွေကို အဲဒီ(၃)လအတွင်းမှာ တက်ခွင့်မပေးပေမယ့် စက်ဘီးတွေနဲ့တော့တက်လို့ရတယ်။ မနက်ပိုင်းဆိုရင် အရမ်းပျော်ဖို့ကောင်းတာ သူငယ်ချင်းတွေစုပြီး လမ်းလျှောက်တဲ့လူတွေ မိသားစုလိုက်လမ်းလျှောက်တဲ့လူတွေ အများကြီးပဲ။ မနက်ပိုင်းအချိန်နဲ့ညပိုင်းက ရှုခင်းတွေကြည့်လို့အကောင်းဆုံးအချိန်လေ"ဟု မော်လမြိုင်မြို့ခံတစ်ဦးက ပြောသည်။

ထိုသို့ တောင်တက်လမ်းလျှောက်ရာသီဖွင့်လှစ်ချိန်မှစတင်၍ နေ့စဥ်လမ်းလျှောက်သူများပြားလျက်ရှိရာမှ မော်လမြိုင်မြို့နယ် အထွေထွေအုပ်ချုပ်ရေးဦးစီးဌာနက လတ်တလောဖြစ်ပေါ်နေ သည့် အခြေအနေများကြောင့် လုံခြုံရေးအခြေအနေအရ ည ၆ နာရီမှ နံနက် ၆ နာရီအထိ တောင်တက်ကားလမ်းအား ဖြတ် သန်းတက်ရောက်ခွင့်မပြုကြောင်း အမိန့်ထုတ်ပြန်ခဲ့သဖြင့် လာရောက်လမ်းလျှောက်သူနည်းပါးသွားကြောင်း သိရသည်။

"ဖြတ်သန်းခွင့်ပိတ်တဲ့အချိန်က လမ်းလျှောက်လို့အကောင်းဆုံးအချိန်တွေပါ ည ၆ နာရီဆိုတာ တောင်ပေါ်လမ်းမှာအေးအေးလေးနဲ့လမ်းလျှောက်လို့ကောင်းတယ်။ နောက်မနက် ၄ နာရီဆိုရင်လည်း ဒီဇင်ဘာလရဲ့အအေးဓာတ်လေးနဲ့ လမ်းလျှောက်လို့ကောင်းတယ်။ မနက်ခင်းအစောပိုင်းရဲ့အရသာအပြည့်ရတယ်။ အခုကြတော့ လမ်းလျှောက်ခွင့်ပေးတဲ့အချိန်က အဆင်မပြေဘူး"ဟု မော်လမြိုင်မြို့အခြေစိုက်လူမှုကူညီရေးအသင်းဝင်တစ်ဦးကပြောသည်။

ထိုသို့ ဖြတ်သန်းခွင့်ပိတ်ထားသဖြင့် ပြီးခဲ့သည့်ရက်ပိုင်းအတွင်းက တောင်တက်လမ်းလျှောက်သူများဖြင့်စည်ကားခဲ့သော မော်လမြိုင်တောင်ဝိုင်းတောင်တက်ကားလမ်းသည် လက်ရှိအချိန်၌ သွားလာသူနည်းပါးသွားခဲ့သဖြင့် လမ်းလျှောက်သူများနှင့်ဘုရား ဖူးများကို အဓိကဦးတည်ရောင်းချနေရသည့် စျေးရောင်းသူများသည် အခက်အခဲများကြုံတွေ့နေရကြောင်း သိရသည်။

မော်လမြိုင်တောင်ဝိုင်းတောက်တက်ကားလမ်းအား လမ်း လျှောက်တက်ရောက်သူများအနေဖြင့် ဆေးလိပ်သောက်သုံးခြင်းမပြုရန်နှင့် အမှိုက်များကို အမှိုက်ပုံးများအတွင်းသို့ စည်းကမ်းတကျစွန့်ပစ်ပေးရန်၊ စျေးရောင်းသူများအနေဖြင့် လမ်းလျှောက်သူ များ စိတ်အနှောင့်အယှက်မဖြစ်စေရန် ကွန်ကရစ်လမ်းပေါ်သို့တက်ရောက်၍ စျေးရောင်းချခြင်း၊ ညှော်နံ့ထွက်သော အစားအ သောက်များ၊ အရက်၊ ဘီယာရောင်းချခြင်းများမပြုလုပ်ရန် တောင်တက်လမ်းအားဦးဆောင်ပြုလုပ်ခဲ့သည့် သာသနာ့နွယ်ဖောင်ဒေးရှင်းမှ မေတ္တာရပ်ခံတားမြစ်ထားကြောင်း သိရသည်။