ဂျန်ဇက် (NSS) - ဒီဇင်ဘာ ၁၁ 

တောင်းဆိုချက်တွေကို မလိုက်လျော့ဘူးဆိုရင် ဖမ်းဆီးထားသူများ အားလုံးအသက်ရှင်သန်နိုင်တော့မှာ မဟုတ်ကြောင်း ဟားမက်စ်လက်နက်ကိုင်အဖွဲ့က သတိပေးပြောဆိုလိုက်ပါတယ်။

ဟားမက်စ်လက်နက်ကိုင်အဖွဲ့ဟာ အစ္စရေးနိုင်ငံနဲ့ အကျဉ်းသားများ အပြန်အလှန်လဲလှယ်မှုတွေ လုပ်ဆောင်ဖို့ တောင်းဆိုထားကြောင်း သိရပါတယ်။ ဟားမက်စ်အဖွဲ့ဟာ အစ္စရေးနိုင်ငံကို အောက်တိုဘာ ၇ ရက်က စတင် တိုက်ခိုက်ခဲ့ပြီး အစ္စရေးစစ်သားတွေ အပါအဝင် လူပေါင်း ၂ဝဝ ကျော်ကို ဖမ်းဆီးခဲ့ကြောင်း သိရပါတယ်။

ဟားမက်စ်အဖွဲ့ရဲ့တိုက်ခိုက်မှုတွေကို လက်တုံ့ပြန်ဖို့ အစ္စရေးဟာ ဂါဇာဒေသကို လေကြောင်းတိုက်ခိုက်မှုအပြင် မြေပြင်ထိုးစစ်ဆင်နွှဲခဲ့ပြီးတိုက်ခိုက်ခဲ့ကြောင်း သိရပါတယ်။  အစ္စရေးဟာ ဂါဇာဒေသကို တိုက်ခိုက်နေတာ နှစ်လ ကျော်ကြာနေပြီဖြစ်တဲ့အတွက် ကျန်းမာရေးစနစ်များ ချို့ယွင်းပျက်စီးနေပြီဖြစ်ကြောင်း ကမ္ဘာ့ကျန်းမာရေးအဖွဲ့က ပြောပါတယ်။ အစ္စရေးနဲ့ဟားမက်စ်လက်နက်ကိုင်အဖွဲ့ဟာ ကာတာနိုင်ငံရဲ့ကြားဝင်စေ့စပ်ပေးမှုကြောင့် ၇ ရက် ကြာ ယာယီအပစ်ခတ်ရပ်စဲရေးရရှိခဲ့ပြီး၊ အဲဒီကာလအတွင်း အကျဉ်းသားတွေ အပြန်အလှန်လွှတ်ပေးခဲ့ကြောင်း သိရပါတယ်။

အဲဒီယာယီအပစ်ခတ်ရပ်စဲရေး ရပ်တန့်သွားခဲ့ပြီးနောက် အစ္စရေးဟာ ဂါဇာဒေသကို ထိုးစစ်ဆင်တိုက်ခိုက်မှုတွေ တစ်ကျော့ပြန်လုပ်ဆောင်ခဲ့ကြောင်း သိရပါတယ်။ ဟားမက်စ်လက်နက်ကိုင်အဖွဲ့ပြောရေးဆိုခွင့်ရှိသူက တောင်းဆို ချက်တွေကို တွေ့ဆုံဆွေးနွေးတာ၊ ညှိနှိုင်းတာမျိုး မလုပ်ဘူးဆိုရင်တော့ အစ္စရေးဟာ ဖမ်းဆီးခံထားရတဲ့သူတွေကို အသက်ရှင်လျက် ပြန်ရမှာမဟုတ်ကြောင်း ပြောပါတယ်။ 

အစ္စရေးဝန်ကြီးချုပ်နေတန်ရာဟုကတော့ ဟားမက်စ်လက်နက်ကိုင်အဖွဲ့အနေနဲ့တောင်းဆိုချက်တွေကို စွန့်လွှတ် ရမှာဖြစ်ကြောင်း ၎င်းတို့ကိုအပြီးသတ်ချေမှုန်းဖို့ စတင်လုပ်ဆောင်နေကြောင်း ဆိုပါတယ်။ 

နေတန်ရာဟုက "ဟားမက်စ်လက်နက်ကိုင်အဖွဲ့ကို ပြောလိုတယ်။ ဟားမက်စ်လက်နက်ကိုင်အဖွဲ့ခေါင်းဆောင် ယာဟာဆင်ဝါ သေဆုံးမှုမရှိသေးဘူး။ စစ်ပွဲပြီးဆုံးချင်ရင် လက်နက်ချအညံခံရမယ်" လို့ ပြောပါတယ်။