Pika (NSS) - ဒီဇင်ဘာ ၇ 

ယူကရိန်းအတိုက်အခံလွှတ်တော်အမတ်ဟောင်း Ilya Kiva ၏ ရုပ်အလောင်းကို ရုရှားနိုင်ငံ မော်စကိုမြို့အနီးတွင် တွေ့ရှိခဲ့ကြောင်း ရုရှားမီဒီယာများက ဒီဇင်ဘာလ(၆)ရက်တွင် ဖော်ပြခဲ့သည်။ 

ထို့အပြင် Ilya Kiva သည် ယူကရိန်းသမ္မတဇီလန်စကီးကို ဝေဖန်မှုများ လုပ်ဆောင်သူအဖြစ် လူသိများကြောင်း သိရသည်။ 

Ilya Kiva ၏ ရုပ်အလောင်းကို ၎င်းနေထိုင်ရာအိမ်အနီးရှိ Velich Country Club ဟိုတည်တွင် တွေ့ရှိခဲ့ခြင်းဖြစ် ကြောင်း သိရသည်။ Ilya Kiva ကို နှင်းထုများကြားထဲရှိ သွေးအိုင်ထဲတွင် မှောက်လျက်သား အနေအထားဖြင့် တွေ့ရှိခဲ့ခြင်းဖြစ်ကြောင်း ရုရှားမီဒီယာအများအပြားက ဖော်ပြခဲ့သည်။

Ilya Kiva သည် ဦးခေါင်းတွင် ဒဏ်ရာများဖြင့် သေဆုံးနေခြင်းဖြစ်ကြောင်း TASS သတင်းအေဂျင်စီက ဖော်ပြခဲ့သည်။ အဆိုပါတိုက်ခိုက်မှု၏ နောက်ကွယ်တွင် ယူကရိန်းလုံခြုံရေးဝန်ဆောင်မှုအဖွဲ့များ ပါဝင်ဆက်နွယ် ဖွယ်ရှိနေကြောင်း ထင်ကြေးပေးမှုများရှိနေသည်။ 

သို့သော်လည်း အဆိုပါလုပ်ကြံသတ်ဖြတ်မှုကို ယူကရိန်းနိုင်ငံ ပြည်တွင်းလုံခြုံရေးဝန်ဆောင်မှုအဖွဲ့များက ကြိုးကိုင် ထားခြင်းဖြစ်ကြောင်း အခြားမီဒီယာများက ဖော်ပြခဲ့သည်။ ရုရှားအစိုးရတာဝန်ရှိသူများသည် အဆိုပါဖြစ်ရပ်နှင့် ပတ်သက်ပြီး မှတ်ချက်ပြုပြောဆိုခြင်းမျိုးမရှိသေးကြောင်း သိရသည်။

Ilya Kiva သည်  ၂ဝ၁၉ ခုနှစ်မှ ၂ဝ၂၂ ခုနှစ်အထိ ယူကရိန်းလွှတ်တော်အမတ်ဖြစ်ခဲ့ပြီး ၂ဝ၂၂ ခုနှစ် ဇွန်လတွင် တရားဝင်ပိတ်ပင်ခံခဲ့ရသည့်အတိုက်အခံပါတီ For Life ၏ အဖွဲ့ဝင်တစ်ဦးဖြစ်ကြောင်းလည်း သိရသည်။Ilya Kiva သည် ယူကရိန်းသမ္မတဇီလန်စကီးနှင့် အစိုးရတို့၏ နေတိုးအဖွဲ့ လိုလားသော မူဝါဒများကို ပြင်းပြင်းထန်ထန် ဝေဖန်ခဲ့သူဖြစ်ကြောင်းလည်း သိရသည်။

ထို့အပြင် အမေရိကန်နှင့် နေတိုးအဖွဲ့တို့သည် ရုရှားကို ပဋိပက္ခစတင်အောင် လှုံ့ဆော်ရန်အတွက် ယူကရိန်းကို ငါးစာအဖြစ် အသုံးပြုခဲ့ကြောင်း Ilya Kiva ကပြီးခဲ့သည့် ၂ဝ၂၂ ခုနှစ်တွင် ပြစ်တင်ဝေဖန်ပြောဆိုခဲ့သည်။ Ilya Kiva သည် ၂ဝ၂၂ ခုနှစ် ဖေဖော်ဝါရီလတွင် ရုရှားက ယူကရိန်းကို ကျူးကျော်တိုက်ခိုက်မှုများ မလုပ်ဆောင်မီ ယူကရိန်းနိုင်ငံမှ ထွက်ခွာကာ စပိန်နိုင်ငံသို့ သွားရောက်ခဲ့ပြီးနောက် ရုရှားနိုင်ငံသို့ ပြောင်းရွှေ့ခဲ့ကြောင်း သိရသည်။

ရုရှားက ကျူးကျော်တိုက်ခိုက်မှုများ လုပ်ဆောင်ပြီးနောက် တစ်လမပြည့်မီအချိန် ၂ဝ၂၂ ခုနှစ် မတ်လလယ်တွင် ယူကရိန်းအစိုးရသည် Ilya Kiva ၏ လုပ်ပိုင်ခွင့်အာဏာများအားလုံးကို ဖယ်ရှားပစ်ခဲ့ကြောင်း သိရသည်။ ထို့အပြင် ယူကရိန်းဥပဒေစိုးမိုးရေးကလည်း ၎င်းကို နိုင်ငံတော်ပုန်ကန်မှုဖြင့် စွဲချက်တင်ခဲ့ပြီး ရုရှားစစ်သားများကို ယူကရိန်းနိုင်ငံအတွင်းသို့ ဖိတ်ခေါ်ရန်အတွက် အရာရာတိုင်းကိုလုပ်ဆောင်ခဲ့သူဖြစ်ကြောင်း စွပ်စွဲပြောဆိုခဲ့သည်။