NP News - မတ် ၁၁

ပင်လယ်ရေကြောင်းမှတစ်ဆင့် ပြည်ပသို့သယ်ဆောင်သွားမည့် ငွေကျပ်ဘီလျံ(၃၀)တန်ဖိုးရှိသော မူးယစ်ဆေးဝါးများ ဖမ်းဆီးရမိခဲ့ကြောင်း သတင်းရရှိသည်။

မြန်မာနိုင်ငံမူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ မတ်လ(၁၀)ရက်တွင် အထက်ပါကဲ့သို့ အသိပေးထုတ်ပြန်ခဲ့ခြင်းဖြစ်သည်။

မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့က မတ်လ(၄)ရက်၊ နေ့လည်(၁၂)နာရီအချိန်တွင် မန္တလေးတိုင်း၊ သာစည်မြို့နယ်၊ ကျွဲတပ်ဆုံရှာဖွေစစ်ဆေးရေးစခန်းတွင် ကလောမြို့ဘက်မှ  သာစည်မြို့ဘက်သို့ မောင်းလာသည့် ဆီဘောက်ဆာ(၈)ဘီးယာဥ်ကို ရှာဖွေစစ်ဆေးမှုများ ဆောင်ရွက်ခဲ့ကြောင်း သိရသည်။

ထိုသို့ရှာဖွေခဲ့ရာ ကိုသိန်းဝင်းဆွေ မောင်းနှင်ပြီး ကိုကျော်ခိုင်ထွေး လိုက်ပါလာသည့် အဆိုပါ(၈)ဘီး မော်တော်ယာဥ်၏ ကိုယ်ထည်အတွင်း လက်ဖက်ခြောက်အိတ်များဖြင့် ထုတ်ပိုးပြီး သိုဝှက်သယ်ဆောင်လာသည့် ဒေသကာလတန်ဖိုးငွေကျပ် (၃၀)ဘီလျံ တန်ဖိုးရှိသော အိုက်စ်(မက်သ်အဖက်တမင်း) (၁ ဒသမ ၅)တန်ကို သိမ်းဆည်းရမိခဲ့ကြောင်း သိရသည်။

စစ်ဆေးဖော်ထုတ်ချက်အရ ဖမ်းဆီးရမိခဲ့သည့် မူးယစ်ဆေးဝါးများကို သယ်ဆောင်ရာတွင် ပူးပေါင်းပါဝင်သည့် ကိုဘုန်းနိုင်ဝင်းအား  မတ်လ(၅)ရက်၊ နေ့လည်(၁၂)နာရီအချိန်တွင် တောင်ကြီးမြို့၊ ကျောင်းကြီးစုရပ်ကွက်၊ နယ်မြေ(၁၂)ရှိ နေအိမ်တွင် FORD ယာဥ် (၁)စီးနှင့်အတူ ဆက်လက်ဖမ်းဆီး ရမိခဲ့‌ကြောင်းသိရသည်။

ယခင်က ဖမ်းဆီးရမိသည့် အိုက်စ်(မက်သ်အဖက်တမင်း)များသည် လက်ဖက်ခြောက်အိတ်ခွံအမျိုးမျိုးဖြင့် ထုတ်ပိုးခြင်းဖြစ်ပြီး ယခုထပ်မံဖမ်းဆီးရမိခဲ့သည့် မူးယစ်ဆေးများသည် လက်ဖက်ခြောက်အိတ်ထုတ်ပိုးခွံ အမှတ်တံဆိပ်အသစ်ဖြင့် ထုတ်ပိုးထား‌ခြင်းဖြစ်သည်။

စစ်ဆေးဖော်ထုတ်ချက်အရ အဆိုပါ မူးယစ်ဆေးများသည် ရှမ်းပြည်နယ်မှ ရန်ကုန်တိုင်းသို့ သယ်ဆောင်ပြီး ၎င်းမှတဆင့် ပင်လယ်ရေကြောင်း အသုံးပြု၍ ပြည်ပသို့ ဆက်လက်သယ်ဆောင်သွားမည်ဖြစ်ကြောင်း သိရသည်။

ထို့ကြောင့် ဖမ်းဆီးရမိသူများအား ဥပဒေအရ အရေးယူထားပြီး ကွင်းဆက်ပြစ်မှုကျူးလွန်သူများကို ဆက်လက်စစ်ဆေးဖော် ထုတ်လျက်ရှိကြောင်း မြန်မာနိုင်ငံမူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ ထုတ်ပြန်ထားသည်။