ဂျန်ဇက် (NSS) - ဒီဇင်ဘာ ၄ 

မြန်မာနိုင်ငံမှာ၂ဝ၂၂ ခုနှစ်အတွင်းဖြစ်ပွားခဲ့တဲ့ အကြမ်းဖက်တိုက်ခိုက်မှုများကို  PDF၊ CDF နဲ့ KNDF လက်နက်ကိုင်အဖွဲ့တို့ အများဆုံးကျူးလွန်ခဲ့တယ်လို့ အမေရိကန်နိုင်ငံခြားရေးဝန်ကြီးဌာနက ထုတ်ပြန်တဲ့ Annex of Statistical Information အချက်အလက်များအရ သိရပါတယ်။

အဆိုပါအဖွဲ့ဟာ ကမ္ဘာတဝန်းရှိ နိုင်ငံများကို လေ့လာစောင့်ကြည့်ခဲ့ပြီးနောက် ၂ဝ၂၂ ခုနှစ်အတွင်း ကမ္ဘာနိုင်ငံတွေထဲ အကြမ်းဖက်တိုက်ခိုက်ခံရမှုဖြစ်ပွားမှု အများဆုံးဖြစ်ပွားခဲ့တဲ့နိုင်ငံတွေစာရင်းကို ထုတ်ပြန်ခဲ့ရာ မြန်မာနိုင်ငံက ထိပ်ဆုံး ၁ဝ နိုင်ငံစာရင်းထဲမှာ ပါဝင်နေတယ်လို့ Annex of Statistical Information က ထုတ်ပြန်တဲ့အချက် အလက်များအရ သိရပါတယ်။ 

၂ဝ၂၂ ခုနှစ်အတွင်း ကမ္ဘာနိုင်ငံတွေထဲ အကြမ်းဖက်တိုက်ခိုက်ခံရမှုဖြစ်ပွားမှုအများဆုံးနိုင်ငံတွေရဲ့ထိပ်ဆုံး ၁ဝ နိုင်ငံ စာရင်းမှာ မြန်မာနိုင်ငံက ကမ္ဘာ့အဆင့် ၈ နေရာမှာ ရပ်တည်နေပြီး  ကွန်ဂို၊ ဆီးရီးယား၊ နိုင်ဂျီးရီးယား၊ ပါကစ္စတန်၊ အိန္ဒိယ၊ အီရတ်၊ ယီမင်၊ မြန်မာ၊ ဘာကီနာဖာဆို၊ ဆိုမာလီယာနိုင်ငံတို့က အစဉ်လိုက်ရပ်တည်နေကြောင်း သိရပါတယ်။

မြန်မာနိုင်ငံမှာ အကြမ်းဖက်တိုက်ခိုက်ခံရမှုအရေအတွက်ဟာ ၂ဝ၁၈ ခုနှစ် နောက်ပိုင်းကတည်းက တစ်ဖြည်းဖြည်း မြင့်တက်လာခဲ့ပြီး ၂ဝ၂၂ ခုနှစ်အတွင်းမှာ အကြမ်းဖက်တိုက်ခိုက်ခံရမှု ၃၉၁ ကြိမ် ဖြစ်ပွားခဲ့ကြောင်း သိရပါတယ်။

ဒါ့အပြင် မြန်မာနိုင်ငံဟာ ၂ဝ၂၂ ခုနှစ်အတွင်း အကြမ်းဖက်တိုက်ခိုက်ခံရမှုကြောင့် လူသေဆုံးမှု အများဆုံးထိပ်ဆုံး နိုင်ငံတွေထဲမှာ ကမ္ဘာ့အဆင့် ၃ နေရာမှာ ရပ်တည်နေကြောင်း သိရပါတယ်။ မြန်မာနိုင်ငံမှာ အကြမ်းဖက် တိုက်ခိုက်ခံရမှုကြောင့် သေဆုံးသူအရေအတွက်ဟာ ၂ဝ၂၁ ခုနှစ်က ၁ဝ၅၂ ဦးရှိခဲ့ပြီး၊ ၂ဝ၂၂ ခုနှစ်မှာ ၂၁၃ဝ ဦး ရှိခဲ့ ကြောင်း Annex of Statistical Information အချက်အလက်တွေမှာ ဖော်ပြထားပါတယ်။

မြန်မာနိုင်ငံမှာ ပြီးခဲ့တဲ့ ၂ဝ၂၂ ခုနှစ်အတွင်း အကြမ်းဖက်တိုက်ခိုက်ခံရမှု ၃၉၁ ကြိမ် ဖြစ်ပွားခဲ့ပြီး ၂၁၃ဝ ဦး သေဆုံးခဲ့ ကြောင်း သိရပါတယ်။ မြန်မာနိုင်ငံမှာ ၂ဝ၂၂ ခုနှစ်အတွင်းဖြစ်ပွားခဲ့တဲ့ အကြမ်းဖက်တိုက်ခိုက်မှုအားလုံးရဲ့ ၅ဝ ရာခိုင်နှုန်းကျော်ကို PDF လက်နက်ကိုင်အဖွဲ့က ကျူးလွန်ခဲ့တာဖြစ်ကြောင်း အဆိုပါအဖွဲ့က ဖော်ပြထားပါတယ်။ 

PDF လက်နက်ကိုင်အဖွဲ့ဟာ ၂ဝ၂၂ ခုနှစ်အတွင်းဖြစ်ပွားခဲ့တဲ့ အကြမ်းဖက်တိုက်ခိုက်မှုတွေအနက် ၁၉၈ ကြိမ်ကို ကျူးလွန်ခဲ့ခြင်းဖြစ်ကြောင်း သိရပါတယ်။ 

ဒါ့အပြင် ချင်းလက်နက်ကိုင်အဖွဲ့ဟာ ၂ဝ၂၂ ခုနှစ်အတွင်းဖြစ်ပွားခဲ့တဲ့ အကြမ်းဖက်တိုက်ခိုက်မှုအားလုံးရဲ့ ၇ ရာခိုင်နှုန်းကို ကျူးလွန်ခဲ့ပြီး အကြမ်းဖက်တိုက်ခိုက်မှုပေါင်း ၂၉ ကြိမ် လုပ်ဆောင်ခဲ့ပြီး ကရင်နီလက်နက်ကိုင်အဖွဲ့ (KNDF) အဖွဲ့က အကြမ်းဖက်တိုက်ခိုက်မှုအကြိမ်ရေ ၂၇ ကြိမ်ရှိခဲ့ကြောင်း Annex of Statistical Information အချက်အလက်တွေမှာ ဖော်ပြထားပါတယ်။

၂ဝ၂၂ ခုနှစ်အတွင်းဖြစ်ပွားခဲ့တဲ့အကြမ်းဖက်တိုက်ခိုက်မှုအားလုံးရဲ့ ၅၈ ရာခိုင်နှုန်းက တပ်မတော်ကို ပစ်မှတ်ထား တိုက်ခိုက်ခဲ့ခြင်းဖြစ်ကြောင်း၊ အခြား ၁၅ ရာခိုင်နှုန်းက တပ်မတော်နဲ့ဆက်နွယ်တဲ့သူတွေကို ကျူးလွန်ခြင်းဖြစ်ပြီး ၉ ရာခိုင်နှုန်းက ပြည်သူတွေကို ကျူးလွန်ခဲ့ခြင်းမျိုးဖြစ်ကြောင်း သိရပါတယ်။ 

၂ဝ၂၂ ခုနှစ်အတွင်း မြန်မာနိုင်ငံမှာဖြစ်ပွားခဲ့တဲ့ အကြမ်းဖက်တိုက်ခိုက်မှုများအနက် စစ်ကိုင်းတိုင်းဒေသကြီးမှာ အများဆုံးဖြစ်ပွားခဲ့ပြီး၊ စစ်ကိုင်းဒေသကြီးမှာ အကြမ်းဖက်တိုက်ခိုက်မှုအကြိမ်ပေါင်း ၁ဝ၇ ကြိမ် ဖြစ်ပွားခဲ့ကာ ရန်ကုန်တိုင်းဒေသကြီးမှာ ၄၂ ကြိမ်၊ ကချင်ပြည်နယ်မှာ ၃၆ ကြိမ်ဖြစ်ပွားခဲ့ကြောင်း Annex of Statistical Information အချက်အလက်တွေမှာ ဖော်ပြထားပါတယ်။