မြူနစ် (NSS) - ဒီဇင်ဘာ ၂

ကရင်ပြည်နယ်၊ ကော့ကရိတ်မြို့နှင့်တစ်ဝိုက်တွင် တိုက်ပွဲများ ဆက်လက်ပြင်းထန်လျက်ရှိပြီး ကော့ကရိတ်မြို့ခံအများစုသည် နေရပ်စွန့်ခွာစစ်ဘေးရှောင်ခဲ့ရကြောင်း ကော့ကရိတ်မြို့ခံများထံမှ သိရသည်။

ယမန်နေ့(ဒီဇင်ဘာလ ၁ ရက်)မှစတင်ကာ KNU၊ PDF ပူးပေါင်းအဖွဲ့သည် ကော့ကရိတ်မြို့နှင့်တစ်ဝိုက်ရှိ လုံခြုံရေးစခန်းများကို အင်အားအလုံးအရင်းဖြင့် ဝင်ရောက်တိုက်ခိုက်ခဲ့သည်။

ယနေ့တွင်လည်း ကော့ကရိတ်မြို့နှင့်အနီးတစ်ဝိုက်တွင် KNU၊ PDF ပူးပေါင်းအဖွဲ့နှင့် တပ်မတော်ကြားတွင် တိုက်ပွဲများ ဆက်လက်ပြင်းထန်လျက်ရှိပြီး လက်နက်ကြီး၊ လက်နက်ငယ်အပါအဝင် လေယာဉ်ပစ်ကူများဖြင့် ပစ်ခတ်တိုက်ခိုက်လျက်ရှိကြောင်း မြို့ခံများက ပြောသည်။

“အခုတော့ တိုက်ပွဲတွေက ပြင်းထန်နေတုန်းပဲ။ ကော့ကရိတ်မြို့အဝင် ကြာပန်းနေရာတစ်ဝိုက်ကို ပူးပေါင်းအဖွဲ့တွေက ထိန်းချုပ်ထားတယ်လို့ သိရတယ်။ အဲဒီနေရာက တပ်နဲ့ တော်တော်နီးတဲ့နေရာမှာ ရှိတယ်။ မြို့ပတ်ပတ်လည် တစ်ဝိုက်မှာလည်း တိုက်ပွဲတွေက ပြင်းထန်နေတဲ့ သဘောရှိတယ်”ဟု ကော့ကရိတ်မြို့ခံတစ်ဦးက NSS ကို ပြောသည်။

ထိုသို့ပစ်ခတ်တိုက်ခိုက်နေမှုများကြောင့် ကော့ကရိတ်ဒေသခံအများစု မြို့အား စွန့်ခွာကာ စစ်ဘေးရှောင်ခဲ့ရပြီး မြဝတီမြို့၊ မဲကနယ်ကွက်သစ်ရှိ သဗ္ဗသုခတပ်ပေါင်းစုကျောင်း၊ မင်္ဂလာရွာဦးကျောင်းများတွင်လည်း သွားရောက်စစ်ဘေးရှောင်နေသူများရှိကြောင်း သိရသည်။

“ကျွန်တော်တော့ စစ်ဘေးရှောင်လိုက်ပြီ။ တော်တော်ဆိုးဆိုးဝါးဝါးကို ဖြစ်နေတာလေ။ လေကြောင်းတိုက်ခိုက်မှုတွေရော၊ လက်နက်ကြီးတွေရော တော်တော်လေးကို ပစ်နေတယ်။ နောက်ပြီးတော့ အခင်းဖြစ်ပွားတဲ့နေရာကလည်း တော်တော်လေးကို စုံလာတယ်။ ကော့ကရိတ် အရှေ့၊ အနောက်၊ တောင်၊ မြောက်မှာကို ဖြစ်နေတာ။ အဲဒီတော့ ကျွန်တော်တို့ မြို့ထဲမှာ ဆက်နေလို့ မဖြစ်တော့ဘူး မိသားစုနဲ့ ကော့ကရိတ်ကနေထွက်သွားပြီ”ဟု မြို့ခံတစ်ဦးက ပြောသည်။

ထို့ပြင် ကော့ကရိတ်မြို့နှင့်အနီးတစ်ဝိုက်၌ ယခုဖြစ်ပွားလျက်ရှိသော တိုက်ပွဲများကြောင့် အရပ်သားထိခိုက်သေဆုံးမှု၊ အရပ်သားနေအိမ်ပျက်စီးဆုံးရှုံးများ ဖြစ်ပေါ်လျက်ရှိကြောင်း သိရသည်။

“အရပ်သားတွေ ထိခိုက်သေဆုံးတာ၊ အိမ်တွေ ပျက်စီးတာတွေ ရှိတယ်။ ကျွန်တော်သိသလောက် ကော့ကရိတ်မြို့ထဲမှာဆိုရင် အိမ်နှစ်လုံးလောက် ပျက်စီးသွားတယ်။ မြို့အစွန့်အဖျားမှာရှိတဲ့ အိမ်နှစ်လုံးလည်း ပျက်စီးသွားတယ်။ အရပ်သားတွေ ထိခိုက်သေဆုံးတာတွေလည်း ရှိတယ်။ ဘယ်သူမှလည်း သွားမကယ်ရဲကြဘူး အဲဒီလို ဖြစ်နေတယ်”ဟု ကော့ကရိတ်ဒေသခံက ပြောသည်။

ထို့အတူ ကော့ကရိတ်မြို့ပေါ်ရှိ အစိုးရဌာနဆိုင်ရာအဆောက်အဦးများသည်လည်း ထိခိုက်ပျက်စီးမှုများ ဖြစ်ပေါ်လျက်ရှိကြောင်း သိရသည်။

ယခုကဲ့သို့ ပြန်လည်ဖြစ်ပွားလာခဲ့သော တိုက်ပွဲများကြောင့် မြဝတီ-ကော့ကရိတ်အာရှလမ်းသည် ပိတ်ဆို့သွားခဲ့သည့်အတွက် ကုန်စည်စီးဆင်းမှုများ ရပ်တန့်လျက်ရှိသည်။