မြူနစ် (NSS) - ဒီဇင်ဘာ ၁

ပြည်တွင်း၌ ဝယ်ယူသုံးစွဲမှုအများဆုံးဖြစ်သော စက်သုံးဆီ 92 တစ်လီတာလျှင် ငွေကျပ် (၃၄၀)အထိ ရုတ်တရက်မြင့်တက်လာခဲ့သည်။

ယနေ့(ဒီဇင်ဘာလ ၁ ရက်)တွင် စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက ရန်ကုန်တိုင်းအတွင်းရှိ ဆီဆိုင်များအနေဖြင့် 92 တစ်လီတာလျှင် (၂၅၁၀)ကျပ်၊ 95 တစ်လီတာလျှင် (၂၆၄၀)ကျပ်နှုန်းဖြင့် ရောင်းချရန် ရည်ညွှန်းဈေးနှုန်းသတ်မှတ်ထားသည်။

ယမန်နေ့(နိုဝင်ဘာလ ၃၀ ရက်)တွင် ရန်ကုန်တိုင်းအတွင်း၌ စက်သုံးဆီဈေးနှုန်းသည် 92 တစ်လီတာလျှင် (၂၁၇၀)ကျပ် နှင့် 95 တစ်လီတာလျှင် (၂၃၀၀)ကျပ်နှုန်းသာရှိခဲ့ပြီး ယနေ့တွင် ရုတ်တရက် ငွေကျပ် (၃၄၀)အထိ ထိုးတက်လာခဲ့ခြင်းဖြစ်သည်။

“စက်သုံးဆီဈေးက ၃၄၀ အထိ တက်လာတာဆိုတော့ တော်တော်လေးကို ပြင်းတာပေါ့။ တစ်ခါမှ အဲဒီလိုကြီး ထိုးမတက်ဖူးဘူး။ အဲဒီလို တက်ရင်တော့ ကုန်ဈေးနှုန်းတွေ၊ ဘာတွေက အကုန်လုံးလိုက်တက်မှာပေါ့။ နဂိုကမှ တက်ချင်နေကြတာလေ။ မတက်နဲ့လို့ ပြောတာတောင်မှ တအားတက်နေကြတာလေ”ဟု စီးပွားရေးလုပ်ငန်းရှင်တစ်ဦးက NSS ကို ပြောသည်။

ယနေ့တွင် ရန်ကုန်မြို့ရှိ စက်သုံးဆီအရောင်းဆိုင်များ၌ ဒီဇယ်တစ်လီတာလျှင် (၂၂၁၀)ကျပ်နှင့် ပရီမီယံဒီဇယ်တစ်လီတာလျှင် (၂၃၀၅)ကျပ်ဖြင့် သတ်မှတ်ရောင်းချပေးလျက်ရှိပြီး ယမန်နေ့ထက် အနည်းငယ်သာ မြင့်တက်ခဲ့ကြောင်း တွေ့ရသည်။

လက်ရှိတွင် စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ၌ ဥက္ကဋ္ဌအဖြစ် စွမ်းအင်ဝန်ကြီးဌာနမှ ဒုဝန်ကြီးဦးသန့်စင်က တာဝန်ယူထားပြီး ၎င်းကော်မတီကို ပြီးခဲ့သော အောက်တိုဘာလ ၁၃ ရက်တွင် ပြင်ဆင်ဖွဲ့စည်းခဲ့ခြင်း ဖြစ်သည်။

ပြည်ပမှ တင်သွင်းသုံးစွဲနေရသည့် စက်သုံးဆီ တင်သွင်း၊ သိုလှောင်၊ ဖြန့်ဖြူးခြင်းကဏ္ဍကို ပိုမိုထိရောက်စွာ ထိန်းကျောင်းရန်နှင့် ပြည်သူများ ဈေးနှုန်းတည်ငြိမ်စွာဖြင့် ဝယ်ယူသုံးစွဲနိုင်ရေး ကြီးကြပ်ကွပ်ကဲမှုများပြုလုပ်ရန်ဝန်ကြီးဌာန နှင့် ပုဂ္ဂလိက ကဏ္ဍမှ သက်ဆိုင်ရာ Stake Holder များကို ထည့်သွင်းကာ အထက်ပါကော်မတီအား ပြင်ဆင်ဖွဲ့စည်းခဲ့ခြင်းဖြစ်သည်။

“ဆီဈေးတက်လာရင် ဘယ်လိုလုပ်အဆင်ပြေမလဲ။ customer အပေါ်ကို ပိုက်ဆံတိုးကောက်ဖို့ကလည်း မလွယ်ဘူးလေ။ အခုခေတ်က ဘယ်သူမှ အဆင်ပြေနေတာ မဟုတ်ဘူး။ အားလုံးအခက်အခဲတွေနဲ့ချည်ပဲ။ ဆီဈေးထပ်တက်လာရင် အကုန်လုံးက လိုက်တက်ရမှာပဲပေါ့” ဟု တက္ကစီယာဉ်မောင်းတစ်ဦးက ပြောသည်။

လက်ရှိ နစကအစိုးရလက်ထက်တွင် ဆန်ဈေးနှုန်းအပါအဝင် အခြေခံစားသောက်ကုန်ဈေးနှုန်းများသည် ပုံမှန်ထက် မြင့်တက်လျက်ရှိပြီး အခြေခံပြည်သူများအတွက် အကြပ်အတည်းများ ဖြစ်ပေါ်လျက်ရှိသည်။