စော (NSS) - နိုဝင်ဘာ ၃၀

2023 Best Ambassador Award ဆုကို ကိုရီးယားနိုင်ငံဆိုင်ရာ မြန်မာသံအမတ်ကြီး ဦးသန့်စင်ရရှိခဲ့ကြောင်း နိုင်ငံခြားရေးဝန်ကြီးဌာနထံမှ သိရသည်။

ကိုရီးယားနိုင်ငံ၊ ဆိုးလ်မြို့ရှိ Korea Press Center ၌ ကျင်းပသည့် Korea Consumer Global Council က Korea Consumer Brand Grand Prize Awards ၏ တစ်စိတ်တစ် ဒေသဖြစ်သော 2023 Best Ambassador Award ကို ယမန်နေ့(နိုဝင်ဘာလ ၂၉ ရက်)တွင် ရရှိခဲ့ခြင်းဖြစ်ကြောင်း သိရသည်။ 

ကိုရီးယားနိုင်ငံဆိုင်ရာ မြန်မာသံအမတ်ကြီး ဦးသန့်စင်သည် ကိုရီးယားနိုင်ငံတွင် သံတမန်အခန်းကဏ္ဍ၌ ပါဝင်ခြင်း၊ Korea Consumer Global Council သို့ စဉ်ဆက်မပြတ်ကူညီ ဆောင်ရွက်ပေးခဲ့ခြင်း နှင့် နှစ်နိုင်ငံကြား ယဉ်ကျေးမှုကဏ္ဍတွင် ပူးပေါင်းဆောင်ရွက်မှုများ မြှင့်တင်နိုင်ခဲ့ခြင်းတို့ကြောင့်  2023 Best Ambassador Award ဆုကို ရရှိခဲ့ခြင်းဖြစ်ကြောင်း သိရသည်။

အဆိုပါဆုသည် မြန်မာနိုင်ငံနှင့် ကိုရီးယားနိုင်ငံတို့ကြား ရှိရင်းစွဲချစ်ကြည်ရင်းနှီးမှုတို့ ပိုမိုခိုင်မာစေရန် အားဖြည့်ပေးခြင်းဖြစ်ကြောင်း မြန်မာသံအမတ်ကြီးဦးသန့်စင်က ပြောကြားခဲ့သည်။

ကိုရီးယားနိုင်ငံ၏ Polytechnic University နှင့် မြန်မာနိုင်ငံတို့အကြား ပူးပေါင်းဆောင်ရွက်မှုများကို တိုးမြှင့်သွားမည်ဖြစ်ကာ သံတမန်ကဏ္ဍ၊ စီးပွားရေး နှင့် ယဉ်ကျေးမှု နယ်ပယ်များတွင် ပူးပေါင်းဆောင်ရွက်မှုများကို Korea Consumer Global Council နှင့်အတူ ပူးပေါင်း ဆောင်ရွက်သွားမည်ဟု ပြောကြားခဲ့သည်။ 

သံအမတ်ကြီး ဦးသန့်စင်သည် Best Ambassador Award ဆုကို ယခုနှစ်တွင် ဒုတိယအကြိမ်မြောက်အဖြစ် လက်ခံရရှိခဲ့ခြင်းဖြစ်ပြီး ၂၀၂၁ ခုနှစ်ကလည်း ပထမဆုံးအကြိမ်လက်ခံရရှိထားသည်။

အဆိုပါဆုအား မြန်မာသံအမတ်ကြီး ဦးသန့်စင်နှင့်အတူ ဖိလစ်ပိုင်နိုင်ငံ နှင့် အယ်လ်ဂျီးရီးယားနိုင်ငံတို့မှ သံအမတ်ကြီးများလည်း ရရှိခဲ့ကြောင်း သိရသည်။