မြူနစ် (NSS) - နိုဝင်ဘာ ၂၇

လက်ရှိ ပြင်းထန်နေသည့် ပြည်တွင်းပဋိပက္ခကို NUG က ဦးဆောင်ခြင်းမဟုတ်ဘဲ တိုင်းရင်းသားလက်နက်ကိုင် အဖွဲ့များက ဦးဆောင်နေခြင်းသာဖြစ်ကြောင်း ရခိုင့်ဦးဆောင်ပါတီဥက္ကဋ္ဌဒေါက်တာအေးမောင်က သုံးသပ်ထားသည်။

နိုင်ငံအတွင်းရှိ ရှမ်း၊ ကရင်၊ ကချင်၊ ရခိုင်၊ စစ်ကိုင်း၊ ချင်းနှင့် ကယား စသော ဒေသများတွင် တပ်မတော်နှင့် လက်နက်ကိုင်အဖွဲ့များကြား တိုက်ပွဲများ ဖြစ်ပွားလျက်ရှိသည်။

“လက်ရှိ ပြည်တွင်းဖြစ်နေတဲ့ပဋိပက္ခကို ကြည့်ရင် NUG က ဦးဆောင်တာ မဟုတ်ဘူး။ တိုင်းရင်းသားလက်နက်ကိုင် တော် လှန်ရေးအဖွဲ့တွေက ဦးဆောင်ကြတာ။ အရှေ့မြောက်ပိုင်းမှာပဲ ပြောပြော၊ ရခိုင်ပဲ ပြောပြော၊ ကရင်နီ ဒေသမှာပဲပြောပြောပေါ့။ စစ်ကိုင်းလွင်ပြင်ပဲ ပြောပြောပေါ့ တိုင်းရင်းသားလက်နက်ကိုင်အဖွဲ့တွေက ဦးဆောင်တာ။ NUG က နောက်က လိုက်တာ။ အဲဒီတော့ ဒီအခင်းအကျင်းမှာ သံခင်း၊ တမန်ခင်းဘက်ကို သူ့ဘက်က ဖွင့်ပြတဲ့ သဘောပဲရှိပါတယ်” ဟု ဒေါက်တာအေးမောင်က ပြောသည်။

သို့သော် NUG၊ CRPH အနေဖြင့် အရှေ့တောင်အာရှ၊ ဥရောပ စသည့် ပြည်ပနိုင်ငံများတွင် ခြေလှမ်းကျဲစွာဖြင့် သံခင်း၊ တမန်ခင်းကိစ္စရပ်များကို ဆောင်ရွက်နေခြင်းမျိုး ရှိကြောင်း ၎င်းက ဆက်လက်သုံးသပ်ထားသည်။

ကိုးကန့်လက်နက်ကိုင်အဖွဲ့ MNDAA ဦးဆောင်ကာ TNLA၊ AA မဟာမိတ်(၃)ဖွဲ့သည် ပြီးခဲ့သော အောက်တိုဘာ ၂၇ ရက်မှ စတင်ကာ (၁ဝ၂၇ စစ်ဆင်ရေး)အမည်ဖြင့် ရှမ်းပြည်နယ်အရှေ့မြောက်ပိုင်းအတွင်းရှိ လုံခြုံရေးစခန်းများကို အင်အားအလုံးအရင်းဖြင့် ဝင်ရောက်တိုက်ခိုက်ခဲ့သည်။

အလားတူ KNPP၊ PDF ပူးပေါင်းအဖွဲ့များသည်လည်း ယခု နိုဝင်ဘာ ၁၁ ရက်တွင် (၁၁.၁၁ စစ်ဆင်ရေး) အမည်ဖြင့် ကယားပြည်နယ်၊ လွိုင်ကော်မြို့နှင့်တစ်ဝိုက်ရှိ လုံခြုံရေးစခန်းများကို ဝင်ရောက်တိုက်ခိုက်ခဲ့သည်။

ထို့ပြင် KIA၊ PDF ပူးပေါင်းအဖွဲ့များသည်လည်း ကချင်ပြည်နယ်နှင့် စစ်ကိုင်းတိုင်းအတွင်းရှိ လုံခြုံရေးစခန်းများကို အထက်ပါလက်နက်ကိုင်အဖွဲ့အစည်းနည်းတူ တစ်ချိန်တည်း၌ ဝင်ရောက်တိုက်ခိုက်မှုများ ပြုလုပ်ခဲ့သည်။

ရခိုင်လက်နက်ကိုင်အဖွဲ့ ULA/AA သည်လည်း နိုဝင်ဘာ ၁၃ ရက်တွင် ရခိုင်ပြည်နယ်အတွင်း၌ တစ်ကျော့ပြန် စစ်ပွဲများကို ပြန်လည်ဖော်ဆောင်ခဲ့ပြီး တပ်မတော်၏ လုံခြုံရေးစခန်းများကို တိုက်ခိုက်လျက်ရှိသည်။

ထိုသို့ တိုင်းရင်းသားလက်နက်ကိုင်အဖွဲ့အစည်းများက တပ်မတော်လုံခြုံရေးစခန်းများအား ဝင်ရောက်တိုက်ခိုက် နေမှုအပေါ် တပ်မတော်ဘက်ကလည်း လက်နက်ကြီးပစ်ကူ၊ လေကြောင်းပစ်ကူများဖြင့် တန်ပြန်တိုက်ခိုက်မှုများ ပြုလုပ်လျက်ရှိသည်။

လက်ရှိ မြန်မာနိုင်ငံတွင် ဖြစ်ပွားနေသော မြန်မာ့အရေးနှင့်ပတ်သက်၍ နိုဝင်ဘာ ၂ဝ ရက်မှ ၂၂ ရက်အတွင်း အင်ဒိုနီးရှားနိုင်ငံ၌ အင်ဒိုနီးရှားအစိုးရမှ ဦးဆောင်ကာ NCA ရေးထိုးထားသော EAO အချို့မှ ကိုယ်စားလှယ်များ၊ NUG ကိုယ်စားလှယ်များ နှင့် ဆွေးနွေးပွဲ ကျင်းပခဲ့ကြောင်း သိရသည်။

အဆိုပါမြန်မာ့အရေးဆွေးနွေးပွဲသည် အားလုံးပါဝင်သော နိုင်ငံရေးတွေ့ဆုံဆွေးနွေးပွဲအတွက် ရလဒ်ကောင်း ထွက်ရှိနိုင်သည်ဟု ယူဆကြောင်းလည်း အင်ဒိုနီးရှားအစိုးရက ဆိုသည်။

“တစ်ဖက်ဖက်က နိုင်မှ ဖြစ်မယ်ဆိုတာမျိုးနဲ့ သွားနေတဲ့ပုံပဲ။ အဲဒီတော့ အပြတ်ကို ရှင်းကြမယ်သဘော။ လုံးဝကို နောက်ကို ပြန်မကြည့်တော့ဘူး ဆွေးနွေးပွဲဆိုတာမျိုးထက် ထိပ်တိုက်ရင်ဆိုင်မှုကနေ အဖြေတစ်ခုကို မရရအောင် ယူမယ်။ တစ်နည်းအားဖြင့် တစ်ဖက်ဖက်က အင်အားအလွန်တရာကြီးမှပဲ ဆွေးနွေးပွဲက ဖြစ်လာမယ်။ အင်အား မတိမ်းမယိမ်းနဲ့ နှစ်ဖက်ဆွေးနွေးပွဲက မအောင်မြင်နိုင်ဘူးဆိုတဲ့သဘောကို နှစ်ဖက်လုံးက သုံးသပ်လာကြတဲ့ပုံ ပေါက်ပါတယ်” ဟု ဒေါက်တာ အေးမောင်က ဆက်လက်သုံးသပ်ထားသည်။

လက်ရှိအချိန်တွင် နိုင်ငံအတွင်း၌ တပ်မတော်နှင့် လက်နက်ကိုင်အဖွဲ့များကြားတွင် တိုက်ပွဲများ ဆက်လက် ပြင်းထန်လျက်ရှိသည်။