Pika (NSS) - နိုဝင်ဘာ ၂၆ 

အစ္စရေးနှင့် ဟားမက်လက်နက်ကိုင်အဖွဲ့ကြားဖြစ်ပွားနေသော စစ်ပွဲကြောင့် သတင်းထောက်များနှင့် မီဒီယာသမားများ အနည်းဆုံး(၅၇)ဦး သေဆုံးခဲ့ကြောင်း နယူးယောက်မြို့အခြေစိုက်သတင်းသမားများ ကာကွယ်စောင့်ရှောက် ရေးကော်မတီ (CPJ) ၏ ဖော်ပြချက်များအရ သိရသည်။

အစ္စရေးနှင့် ဟားမက်လက်နက်ကိုင်အဖွဲ့ကြား စစ်ပွဲစတင်ဖြစ်ပွားခဲ့သည့် အောက်တိုဘာလ(၇)ရက်မှ စတင်ပြီး နိုဝင်ဘာလ(၂၅)ရက်အထိ သတင်းထောက် အနည်းဆုံး(၅၇)ဦးသေဆုံးခဲ့ပြီး အခြားသတင်းထောက်(၃)ဦးမှာ ပျောက်ဆုံးနေဆဲဖြစ်ကြောင်း  CPJ ၏ နောက်ဆုံးထုတ်ပြန်ချက်များအရ သိရသည်။

စစ်ပွဲအတွင်း သေဆုံးခဲ့သော သတင်းထောက်အများစုမှာ ပါလက်စတိုင်းနိုင်ငံသားများဖြစ်ပြီး အစ္စရေး၏ လေကြောင်းမှ တိုက်ခိုက်မှုများကြောင့် ဒေသတွင်းမီဒီယာသမား (၅ဝ) ဦးခန့် သေဆုံးခဲ့ကြောင်း CPJ ၏ ဖော်ပြချက်များအရ သိရသည်။

အစ္စရေး-ဟားမက်စစ်ပွဲအတွင်း သေဆုံးခဲ့သော သတင်းထောက်များထဲတွင် အစ္စရေးသတင်းထောက် (၄)ဦး နှင့် လက်ဘနွန်သတင်းထောက်(၃)ဦးတို့ ပါဝင်ကြောင်း NGOအဖွဲ့၏ အချက်အလက်များအရ သိရသည်။ အစ္စရေးနှင့် ဟားမက်လက်နက်ကိုင်အဖွဲ့ကြား စစ်ပွဲစတင်ဖြစ်ပွားခဲ့သည့် ပထမဆုံးနေ့သည် မီဒီယာသမားများ အများဆုံး သေဆုံးသည့် နေ့တစ်နေ့ဖြစ်ခဲ့ပြီး သတင်းထောက်(၆)ဦး သေဆုံးခဲ့ကြောင်း သိရသည်။

ထို့နောက် စစ်ပွဲဖြစ်ပွားသည့် ဒုတိယမြောက်နေ့တွင် သတင်းထောက်(၅)ဦးသေဆုံးခဲ့ကြောင်း တာဝန်ရှိသူများက အတည်ပြုပြောကြားခဲ့သည်။ ဂါဇာကမ်းမြောင်ဒေသတွင် အလုပ်လုပ်နေကြသော သတင်းထောက်များသည် အစ္စရေး၏ လေကြောင်းမှတိုက်ခိုက်မှုများ အပါအဝင် မြေပြင်ထိုးစစ်ဆင်မှုများ၊ ဆက်သွယ်ရေးပြတ်တောက်မှုများ၊ ထောက်ပံ့ရေးပစ္စည်း ပြတ်လပ်မှုများ နှင့် လျှပ်စစ်ဓါတ်အားပြတ်တောက်မှုများကို ဖော်ပြရန် ကြိုးပမ်းခဲ့ပြီး ကတည်းက အန္တရာယ်များနှင့်ရင်ဆိုင်နေရကြောင်း CPJ က ဖော်ပြခဲ့သည်။

CPJ ၏ အရှေ့အလယ်ပိုင်းနှင့် မြောက်အာဖရိက ပရိုဂရမ်ညှိနှိုင်းရေးမှူး Sherif Mansour က "ဂါဇာကမ်းမြောင် ဒေသမှာရှိတဲ့သတင်းထောက်တွေဟာ ဒီပဋိပက္ခကို လူသိရှင်ကြား ဖော်ပြဖို့အတွက် ကြီးမားတဲ့စတေးမှုတွေကို လုပ်ဆောင်နေကြရပါတယ်။ ဂါဇာကမ်းမြောင်ဒေသမှာရှိတဲ့သတင်းထောက်တွေဟာ ခြိမ်းခြောက်မှုတွေနဲ့လည်း ရင်ဆိုင်နေရပါတယ်။ သတင်းထောက် အများစုဟာ လုပ်ဖော်ကိုင်ဖက်တွေ၊ မိသားစုဝင်တွေနဲ့ မီဒီယာ အဆောက်အဦးတွေကို ဆုံးရှံးခဲ့ကြရပြီး ဘေးကင်းရာနေရာတွေကို ထွက်ပြေးခဲ့ကြရပါတယ်" ဟု ပြောခဲ့သည်။

ထို့အပြင် မီဒီယာသမားအများအပြားသည် နှိပ်စက်ညှင်းပန်းမှုများ၊ ခြိမ်းခြောက်မှုများ၊ ဆိုက်ဘာတိုက်ခိုက်မှုများ နှင့် ၎င်းတို့၏ မိသားစုဝင်များ သတ်ဖြတ်ခံရခြင်းတို့တောင် ကြုံတွေ့ခဲ့ရကြောင်း CPJ က ဖော်ပြခဲ့သည်။

အစ္စရေး-ဟားမက်စစ်ပွဲအတွင်း လက်ရှိအချိန်အထိ သတင်းထောက် အနည်းဆုံး(၁၁)ဦး ထိခိုက်ဒဏ်ရာရရှိခဲ့ပြီး အခြားသတင်းထောက်(၁၉)ဦးမှာ ဖမ်းဆီးခံထားရကြောင်း CPJ က မှတ်ချက်ပြုခဲ့သည်။