MNDAA ပူးပေါင်းအဖွဲ့က လောက်ကိုင်မြို့ကို ကျူးကျော်တိုက်ခိုက်လာသည့်အတွက် တပ်မတော်က လေကြောင်းပစ်ကူဖြင့် တန်ပြန်ပစ်ခတ်
မြူနစ် (NSS) - နိုဝင်ဘာ ၂၆
MNDAA ဦးဆောင်သော ရှမ်းမြောက်မဟာမိတ် ၃ ဖွဲ့သည် ရှမ်းပြည်နယ်၊ လောက်ကိုင်မြို့နှင့်အနီးတစ်ဝိုက်သို့ ကျူးကျော်တိုက်ခိုက်မှုများပြုလုပ်လာသဖြင့် တပ်မတော်ဘက်မှ လေကြောင်းပစ်ကူများဖြင့် တန်ပြန် တိုက်ခိုက်မှုများလုပ်ဆောင်လျက်ရှိကြောင်း သိရသည်။
ပြီးခဲ့သော ရက်ပိုင်းအတွင်းမှစ၍ လောက်ကိုင်မြို့နှင့်တစ်ဝိုက်တွင် တပ်မတော်နှင့် MNDAA ပူးပေါင်းအဖွဲ့များကြား တိုက်ပွဲများ ဖြစ်ပွားခဲ့ပြီး ယနေ့(နိုဝင်ဘာ ၂၆ ရက်)တွင်လည်း တိုက်ပွဲများ ဆက်လက်ဖြစ်ပွားနေကြောင်း မြို့ခံများ ထံမှ သိရသည်။
တိုက်ပွဲများသည် လောက်ကိုင်မြို့သစ်ဟု ခေါ်ဆိုလေ့ရှိသော တုန်ချိန်ဒေသ နှင့် လောက်ကိုင်မြို့အတွင်း နေရာ အချို့တွင် ဖြစ်ပွားနေခြင်းဖြစ်ကြောင်း သိရသည်။
“တုန်ချိန်မှာက အခုရက်ပိုင်း နေ့တိုင်းလိုလို ဖြစ်နေတာ။ ဒီနေ့လည်း ဆက်ဖြစ်နေတယ်။ တော်တော်ပြင်းထန်တဲ့ သဘောရှိတယ်။ လေယာဉ်နဲ့ပစ်တာတွေ၊ လက်နက်ကြီးနဲ့ပစ်တာတွေ တွေ့နေရတယ်။ အသံပေါင်းစုံကိုကြား နေတယ်။ လောက်ကိုင်မြို့ထဲမှာလည်း ပစ်ခတ်မှုတာတွေ ဖြစ်ပွားသေးတယ်” ဟု လောက်ကိုင်မြို့ခံတစ်ဦးက NP News ကို ပြောသည်။
လောင်ကိုင်မြို့နှင့်တစ်ဝိုက်သို့ ချဉ်းကပ်လာသော MNDAA ပူးပေါင်းအဖွဲ့များကို တပ်မတော်လုံခြုံရေးအဖွဲ့က တိုက်ထုတ်လျက်ရှိပြီး လေကြောင်းပစ်ကူများပါ အသုံးပြု၍ တန်ပြန်ချေမှုန်းလျက်ရှိကြောင်း သိရသည်။
MNDAA ဦးဆောင်သော TNLA၊ AA မဟာမိတ်လက်နက်ကိုင်(၃)ဖွဲ့သည် ပြီးခဲ့သော အောက်တိုဘာ ၂၇ ရက်မှ စတင်ကာ (၁ဝ၂၇ စစ်ဆင်ရေး) အမည်ဖြင့် ရှမ်းပြည်နယ်အရှေ့မြောက်ပိုင်းရှိ တပ်မတော်လုံခြုံရေးစခန်းများကို အင်အားအလုံးအရင်းဖြင့် ဝင်ရောက်တိုက်ခိုက်ခဲ့သည်။
လက်ရှိအခြေအနေတွင် တပ်မတော်၏ လုံခြုံရေးစခန်း (၁ဝဝ)ကျော်ကို သိမ်းပိုက်ရရှိထားပြီးဖြစ်ကြောင်းလည်း MNDAA ဘက်က ထုတ်ပြန်ထားသည်ကို တွေ့ရှိရသည်။
ထို့ပြင် မကြာခင်အချိန်တွင်လည်း လောက်ကိုင်မြို့သိမ်းတိုက်ပွဲကို ဖော်ဆောင်သွားမည်ဖြစ်ကြောင်း MNDAA က အသိပေးထားသည်ကို တွေ့ရသည်။
ထိုသို့ လောက်ကိုင်မြို့အား တိုက်ခိုက်မည့်ဟု ကြွေးကြော်ထားမှုကြောင့် လောင်ကိုင်မြို့၌ အလုပ်လာရောက် လုပ်ကိုင်သူများ အပါအဝင် မြို့ခံအချို့သည် နေရပ်စွန့်ခွာစစ်ဘေးရှောင်နေမှုများရှိကြောင်း သိရသည်။
ရှမ်းပြည်နယ်အရှေ့မြောက်ပိုင်းဒေသများ၌ ဖြစ်ပွားနေသည့်တိုက်ပွဲများကြောင့် ဒေသခံပြည်သူအများအပြား နေရပ်စွန့်ကာ တိမ်းရှောင်နေရလျက်ရှိသည့်အပြင် မြန်မာ-တရုတ်နယ်စပ် BP-125 အနီးတွင် ဖွင့်လှစ်ထားသော စစ်ရှောင်စခန်း၌ စစ်ဘေးရှောင်ဦးရေ (၄ဝဝဝဝ)နီးအထိ တိမ်းရှောင်နေရကြောင်း သိရသည်။
အလားတူ မြန်မာ-တရုတ်နယ်စပ် BP-127 အနီးရှိ နယ်စပ်စည်းမျဉ်း၌ စစ်ဘေးရှောင်နေသော လောက်ကိုင်မြို့မှ စစ်ဘေးရှောင်များသည် တရုတ်လုံခြုံရေးအဖွဲ့၏ မျက်ရည်ယိုဗုံးဖြင့် ပစ်ခတ်နှင်ထုတ်ခြင်းကို ခံခဲ့ရကြောင်း သိရသည်။
လက်ရှိတွင် စစ်ဘေးရှောင်အများစုသည် စားနပ်ရိက္ခာ၊ သောက်သုံးရေ၊ ဆေးဝါး အပါအဝင် လိုအပ်ချက်များစွာဖြင့် ရှင်သန် ရပ်တည်နေရလျက်ရှိကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ယနေ့ နိုဝင်ဘာလ ၂၆ ရက်အတွင်းဖြစ်ပွားခဲ့သည့် ပြည်တွင်းနှင့် ပြည်ပက ထူးခြားဖြစ်စဥ် သတင်းထူးများ
RELATED POSTS
22 Sep 2024 | နိုင်ငံရေး,နိုင်ငံတကာ
22 Sep 2024 | နိုင်ငံရေး,နိုင်ငံတကာ
22 Sep 2024 | နိုင်ငံရေး,ပြည်တွင်း