စော (NSS) - နိုဝင်ဘာ ၂၆

ပြည်ပအလုပ်အကိုင်သက်သေခံကတ် (OWIC) ထုတ်ပေးမည့်ကာလကို တိုးမြှင့်သတ်မှတ်လိုက်ကြောင်း ထိုင်းနိုင်ငံ ရှိ မြန်မာအလုပ်သမားသံအရာရှိရုံးက ယနေ့ (နိုဝင်ဘာ ၂၆ ရက်) တွင် အသိပေးကြေညာထားသည်။

ထိုင်းနိုင်ငံ၊ ဘန်ကောက်မြို့ရှိ မြန်မာသံရုံးတွင် ၂ဝ၂၂ ခုနှစ်၊ နိုဝင်ဘာလ ၇ ရက်မှ ၂ဝ၂၃ ခုနှစ်၊ ဩဂုတ်လ ၁၇ ရက် အထိ သာမန်မြန်မာနိုင်ငံကူးလက်မှတ် (PJ) သက်တမ်းတိုးဆောင်ရွက်ရာ၌ ‌ ပြည်ပအလုပ်အကိုင်သက်သေခံကတ် (OWIC) ထုတ်ယူရန်အတွက် ငွေပေးသွင်းခဲ့သည့် အလုပ်သမားများရှိခဲ့ကြောင်း သိရသည်။

ထို့သို့ငွေပေးသွင်းခဲ့သော မြန်မာအလုပ်သမားများကို ၂ဝ၂၃ ခုနှစ်၊ ဩဂုတ်လ ၂၄ ရက်မှစ၍ (၃)လအတွင်း သာမန် မြန်မာနိုင်ငံကူးလက်မှတ်ထုတ်ပေးရေးဌာနစိတ်၊ ယာယီအချက်အလက်ကောက်ယူရေးစင်တာ (TDCC၊ မဟာချိုင်) ရုံး၌ (OWIC)ကတ်များကို ထုတ်ပေးလျက်ရှိကြောင်း သိရသည်။

သို့သော် (OWIC)ကတ်ထုတ်ယူရန်  အကြောင်းအမျိုးမျိုးကြောင့် နှောင့်နှေးနေသည့် မြန်မာအလုပ်သမားများ အဆင်ပြေစေရေးအတွက် ၎င်းကတ်များကို လာမည့် ၂ဝ၂၄ ခုနှစ်၊ မတ်လ ၃၁ ရက်အထိ ဆက်လက် ထုတ်ပေးသွား မည်ဖြစ်ကြောင်း ကြေညာထားသည်။

မြန်မာနိုင်ငံမှ ပြည်ပနိုင်ငံ (၉၃)နိုင်ငံသို့ သွားရောက်အလုပ်လုပ်ကိုင်မည့် အလုပ်သမား (၁၆၈၄၉၃၄) ဦးကို OWIC ကတ် ပြုလုပ်ခွင့်ပြုပြီး စေလွှတ်ခွင့်ပြုခဲ့ကြောင်း အလုပ်သမားဝန်ကြီးဌာန၏ အချက်အလက်အရ သိရသည်။

ထို့သို့စေလွှတ်ရာတွင် ထိုင်းနိုင်ငံ သို့ (၁၁၁ဝ၅၉၅) ဦးဖြင့် အများဆုံးစေလွှတ်နိုင်ခဲ့ပြီး  စင်ကာပူနိုင်ငံသို့ (၅၂ဝ၃၅) ဦး၊ ကိုရီးယားနိုင်ငံသို့ (၆၄၃၆၄) ဦး၊ ဂျပန်နိုင်ငံသို့ (၆ဝဝ၁၃) ဦး၊ မလေးရှားနိုင်ငံသို့ (၃၈၅၅၆၆) ဦးတို့ကို စေလွှတ်နိုင် ခဲ့ကြောင်း အလုပ်သမားဝန်ကြီးဌာနက ဆိုသည်။