ကျော် (NSS) - နိုဝင်ဘာ ၂၅

နိုင်ငံကူးလက်မှတ်သက်တမ်းတိုးလျှောက်ထားရာ၌ စာရွက်စာတမ်းမပြည့်စုံသူနှင့် အဆက်အသွယ်မရသူ (၄ဝဝ) နီးပါးရှိကြောင်း ဂျပန်နိုင်ငံဆိုင်ရာ မြန်မာသံရုံးကအသိပေးခဲ့သည်။

မြန်မာသံရုံး၊ တိုကျိုမြို့မှ နိုင်ငံကူးလက်မှတ်သက်တမ်းတမ်းတိုးလျှောက်ထားရာတွင် အောက်တိုဘာလ ၂၀ ရက်အထိ အချက်အလက်မပြည့်စုံသူများ၊ အဆက်အသွယ်မရသူများ၏ အမည်စာရင်းနှင့်လိုအပ်သည့် စာရွက်စာတမ်းများနှင့်ပတ်သက်၍ ယမန်နေ့ (နိုဝင်ဘာလ ၂၄ ရက်)က အသိပေးခဲ့ခြင်းဖြစ်သည်။

နိုင်ငံကူးလက်မှတ်သက်တမ်းတိုးလျှောက်ထားသူများသည် မြန်မာသံရုံး၊ တိုကျိုမြို့သို့ စာတိုက်မှ တစ်ဆင့်ပေးပို့လျှောက်ထားကြောင်း သိရသည်။

ထိုသို့ ပေးပို့ရာ၌ အချက်အလက်မပြည့်စုံသူများအား သံရုံးမှတစ်ဦးချင်းအလိုက် ဆက်သွယ်အကြောင်း ကြားပေးလျက်ရှိသော်လည်း အဆက်အသွယ်မရသူများလည်းရှိနေကြောင်း သိရသည်။

အဆက်အသွယ်မရရှိသူများကြောင့် နိုင်ငံကူးလက်မှတ်သက်တမ်းတိုးလုပ်ငန်းများ ဆောင်ရွက်နိုင်ခြင်းမရှိ၍ ကြန့်ကြာလျက်ရှိသည်ဟုလည်း မြန်မာသံရုံး၊ တိုကျိုမြို့က အသိပေးထားသည်။

ထို့ကြောင့် ကြန့်ကြာနေသည့် နိုင်ငံကူးလက်မှတ် လျှောက်ထားသူ(၃၈၄)ဦး၏ စာရင်းနှင့်လိုအပ်သည့် စာရွက်စာတမ်းများကို မြန်မာသံရုံး၊ တိုကျိုမြို့၏ website ဖြစ်သည့် http://www. myanmar-embassy-tokyo.net/2023/passport/5/5.htm တွင် အသိပေးထုတ်ပြန်ထားကြောင်း သိရသည်။

ထို့ပြင် စာရွက်စာတမ်း၊ အထောက်အထားများ ပေးပို့ရာ၌ လျှောက်ထားသူ၏ အမည်၊ မွေးသက္ကရာဇ်၊ နိုင်ငံကူးလက်မှတ်အမှတ်၊ သံရုံးသို့ စာရွက်စာတမ်းများစတင်ပေးပို့ခဲ့သည့် နေ့ရက်တို့ကို ဖော်ပြရမည် ဖြစ်ကြောင်း အသိပေးထားသည်။