မြူနစ် (NSS) - နိုဝင်ဘာ ၂၂

MNDAA၊ TNLA၊ AA တို့၏ ဖော်ဆောင်စစ်ပွဲ နှင့် တက္ကသိုလ်ဆရာ၊ ဆရာမများ ဖမ်းဆီးထိန်းသိမ်းခံရမှုအပေါ် အရပ်ဖက်အဖွဲ့အစည်းအသီးသီးနှင့် လူပုဂ္ဂိုလ်များက ကန့်ကွတ်ရှုတ်ချထားသည်။

ကိုးကန့်လက်နက်ကိုင်အဖွဲ့ MNDAA ဦးဆောင်သော မဟာမိတ်(၃)ဖွဲ့သည် ပြီးခဲ့သော အောက်တိုဘာလ ၂၇ ရက်တွင် ရှမ်းပြည်နယ်အရှေ့မြောက်ပိုင်းရှိ လုံခြုံရေးစခန်းများကို (၁၀၂၇ စစ်ဆင်ရေး)အမည်ဖြင့် စတင်တိုက်ပွဲဖော်ဆောင်ခဲ့သည်။

ထိုသို့တိုက်ပွဲဖော်ဆောင်ခြင်းသည် အပြစ်မဲ့ပြည်သူများကို ထိခိုက်ပျက်စီးစေရန်နှင့် နိုင်ငံနစ်နာစေရန် ရည်ရွယ်ဆောင်ရွက်နေခြင်းဖြစ်သည့်အတွက် အရပ်ဖက်အဖွဲ့အစည်းအသီးသီးက ကန့်ကွက်ရှုတ်ချထားသည်။

လက်နက်ကိုင်မဟာမိတ်(၃)ဖွဲ့၏ တိုက်ပွဲဖော်ဆောင်သည့်လုပ်ရပ်အပေါ် ဘာသာရေးအသင်းအဖွဲ့များ ဖြစ်သည့် ဗုဒ္ဓဘာသာကလျာဏယုဝအသင်း(YMBA)၊ မြန်မာနိုင်ငံမက်သဒစ်အသင်းတောင် (အောက်မြန်မာပြည်)၊ မြန်မာနိုင်ငံလုံးဆိုင်ရာအစ္စလာမ်ဘာသာရေးအဖွဲ့ကြီး၊ မြန်မာနိုင်ငံလုံးဆိုင်ရာဟိန္ဒူဘာသာရေးဗဟို အဖွဲ့ချုပ်၊ ဘာသာပေါင်းစုံချစ်ကြည်ညီညွတ်ရေးအဖွဲ့(ဗဟို) တို့က ကန့်ကွက်ခဲ့ကြသည်။

အလားတူ အနုပညာအသိုင်းအဝိုင်းဖြစ်သည့် မြန်မာနိုင်ငံရုပ်ရှင်အစည်းအရုံး၊ မြန်မာနိုင်ငံဂီတအစည်းအရုံး(ဗဟို)၊ မြန်မာနိုင်ငံသဘင်အစည်းအရုံး(ဗဟို)၊ မြန်မာနိုင်ငံပန်းချီပန်းပုအစည်းအရုံး(ဗဟို) တို့ကလည်း ကန့်ကွက်ခဲ့ကြသည်။

သတင်း နှင့် စာပေအသိုင်းအဝိုင်းဖြစ်သည့် မြန်မာနိုင်ငံသတင်းမီဒီယာကောင်စီ၊ မြန်မာနိုင်ငံစာရေး ဆရာအသင်းတို့ကလည်း ကန့်ကွက်ခဲ့ကြသည်။

ထို့ပြင် မြန်မာနိုင်ငံစစ်မှုထမ်းဟောင်းအဖွဲ့ကလည်း ကန့်ကွက်ခဲ့သည်။

အဆိုပါလုပ်ရပ်များသည် နိုင်ငံတော်နှင့် နိုင်ငံသားများ အကျိုးယုတ်စေသော အဖျက်လုပ်ရပ်များသာဖြစ်ကြောင်း အရပ်ဖက်အဖွဲ့အစည်းအသီးသီးက ရှုမြင်ထားကြသည်။

အလားတူ MNDAA ဦးဆောင်သော မဟာမိတ်(၃)ဖွဲ့၏ အကြမ်းဖက်ဝင်ရောက်တိုက်ခိုက်မှုများနှင့်ပတ်သက်၍လည်း ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ(USDP)က အပြင်းအထန်ကန့်ကွတ်ရှုတ်ချထားသည်။

ပြည်တွင်းတည်ငြိမ်မှုပျက်စီးရန် အကြမ်းဖက်တိုက်ခိုက်ဖျက်ဆီးခြင်းသည် ငြိမ်းချမ်းရေးကို မျက်ကွယ်ပြုကာ နိုင်ငံတော်နှင့် နိုင်ငံသားများ အကျိုးစီးပွားပျက်ပြားစေရန် ဆောင်ရွက်သည့် အကြမ်းဖက်လုပ်ရပ်သာဖြစ်ကြောင်း USDP ပါတီက ဆိုသည်။

ထို့ပြင် ယင်းကဲ့သို့ တိုက်ပွဲဖော်ဆောင်ကာ အကြမ်းဖက်လုပ်ဆောင်နေမှုများနှင့်ပတ်သက်၍ မလိုလားကြောင်းနှင့် ကန့်ကွတ်ရှုတ်ချကြောင်းလည်း ပြည်တွင်းရှိ နိုင်ငံရေးပါတီကြီးတစ်ခုမှ ခေါင်းဆောင်တစ်ဦးက NSS ကို ပြောသည်။

“ကျွန်တော်တို့လည်း မလိုလားပါဘူး။ ကန့်ကွက်ပါတယ်။ ဒါက အကြမ်းဖက်ပုံစံမျိုးပေါ့။ လက်နက်ကိုင်တော်လှန်ပြီး အကြမ်းဖက်လုပ်နေတဲ့ ပုံစံမျိုးတွေ့လည်း တွေ့ရတာပေါ့။ တိုင်းရင်းသားလက်နက်ကိုင်တွေနဲ့ပေါင်းပြီးတော့ တစ်ပြည်လုံးအတိုင်းအတာနဲ့ စစ်ရေးလှုပ်ရှားမှုလုပ်တယ်ဆိုတဲ့ သဘောမျိုးပါ။ အဓိက ထိခိုက်နစ်နာတာကတော့ ပြည်သူလူထုပါပဲ” ဟု ၎င်းက ပြောသည်။

ထိုသို့ လက်နက်ကိုင်မဟာမိတ်(၃)ဖွဲ့က ရှမ်းပြည်နယ်မြောက်ပိုင်းဒေသများ၌ (၁၀၂၇ စစ်ဆင်ရေး) အမည်ဖြင့် တိုက်ပွဲစတင် ဖော်ဆောင်မှုနှင့်အတူ စစ်ကိုင်း၊ ချင်း၊ ကယားနှင့် ရခိုင်ပြည်နယ်တို့တွင်လည်း စစ်ပွဲများ ကူးစက်လာခဲ့သည်။

KNPP နှင့် PDF ပူးပေါင်းအဖွဲ့သည် ပြီးခဲ့သော နိုဝင်ဘာလ ၁၁ ရက်တွင် ကယားပြည်နယ်၊ လွိုင်ကော်မြို့နှင့်တစ်ဝိုက်ရှိ လုံခြုံရေးစခန်းများကို (၁၁.၁၁ စစ်ဆင်ရေး)အမည်ဖြင့် စတင်တိုက်ပွဲဖော်ဆောင်ခဲ့သည်။

၎င်းစစ်ဆင်ရေးအတွင်း လွိုင်ကော်တက္ကသိုလ်မှ ပါမောက္ခချုပ်ဒေါက်တာအောင်ခင်မြင့်အပါအဝင် ဆရာ/မ၊ ဝန်ထမ်း စုစုပေါင်း (၂၀၄)ဦးကိုလည်း KNPP နှင့် PDF အဖွဲ့က အတင်းအဓမ္မဖမ်းဆီးခေါ်ဆောင်သွားခဲ့ကြောင်း နစကဘက်က ထုတ်ပြန်ခဲ့သည်။

ထိုသို့ တက္ကသိုလ်ပါမောက္ခချုပ်အပါအဝင် ဆရာ/မ၊ ဝန်ထမ်းများ ဖမ်းဆီးခံရခြင်းနှင့် ပညာရေးဆိုင်ရာအဆောက်အဦးများ ထိခိုက်ပျက်စီးခဲ့ခြင်းအပေါ် အထက်ပါအရပ်ဖက်အဖွဲ့ အစည်းအသီးသီး နှင့် အားကစားမီဒီယာများအဖွဲ့ချုပ်၊ ဘူးသီးတောင်မောင်တောဒေသဖွံ့ဖြိုးရေးအသင်း၊ ဟာသပညာရှင်များအစည်းအရုံး၊ ယုံကြည်ခြင်း ဧဝံဂေလိအသင်းတော်(ပဲခူး)၊ မြန်မာနိုင်ငံဆိုင်ရာ တမီးလ်ဟိန္ဒူဖောင်ဒေးရှင်း(ဗဟို)၊ လွတ်မြောက်ခြင်းအသင်းတော်(ရန်ကုန်)၊ ပိန္နဲကုန်းရခိုင်ဂျာမေဗလီ၊ မြန်မာနိုင်ငံ ဧဝံဂေလိခရစ်ယာန် မဟာမိတ်အဖွဲ့ချုပ်တို့ကလည်း အပြင်းအထန်ကန့်ကွတ်ရှုတ်ချထားသည်။

ယင်းကဲ့သို့ အကြမ်းဖက်လုပ်ဆောင်မှုများသည် နိုင်ငံ၏အရေးပါသော ပညာရေးကဏ္ဍကို ဖျက်ဆီးမှုတစ်ရပ်သာဖြစ်ကြောင်း အရပ်ဖက်အဖွဲ့အစည်းများက ဆိုသည်။

MNDAA ဦးဆောင်သော မဟာမိတ်(၃)ဖွဲ့သည် အောက်တိုဘာလ ၂၇ ရက်မှစ၍ ရှမ်းပြည်နယ်အတွင်း၌ တိုက်ပွဲများ ဖော်ဆောင်ခဲ့ပြီးနောက်ပိုင်းတွင် အခြားသောဒေသများသို့ စစ်ပွဲများ ကူးစက်မှုများရှိခဲ့ပြီး ၎င်းစစ်ပွဲများနှင့်ပတ်သက်၍လည်း လူပုဂ္ဂိုလ်များက ကန့်ကွက်ရှုတ်ချမှုများ ရှိခဲ့သည်။

နေပြည်တော်၊ ရန်ကုန်၊ မန္တလေး၊ ပဲခူး စသောဒေသများတွင် လူပုဂ္ဂိုလ်များက “တရုတ်နိုင်ငံအနေဖြင့် မြန်မာပြည်မြောက်ပိုင်းမှ အကြမ်းဖက်သောင်းကျန်းသူများကို ကူညီပံ့ပိုးနေမှုများ ရပ်တန့်ရန်”၊ “ပြည်တွင်းရေးကို ဝင်ရောက်နှောင့်ယှက်သူများအား ဆန့်ကျင်ကြ”၊ “အမိမြေကို ကာကွယ်ကြ”၊ “ရှေ့တန်းရောက် တပ်မတော်သားများ ကျန်းမာပါစေ”၊ “TNLA၊ KIA၊ MNDAA၊ AA အလိုမရှိ” စသောဆိုင်းဘုတ်များ ကိုင်ဆောင်ကာ ဆန္ဒပြမှုများရှိခဲ့သည်။

“တစ်ဖက်နိုင်ငံရဲ့ ပံ့ပိုးမှုတွေ ရှိနေတယ်လို့ မြင်တယ်။ ဒါကျွန်တော် တစ်ယောက်တည်းရဲ့ အမြင်ပါ။ သူတို့ဘက်က မပါဘဲနဲ့တော့ အဆင့်မြင့် ဒရုန်းကြီးတွေက EAO လက်ထဲရောက်စရာ အကြောင်းမရှိဘူး။ အဲဒါကြောင့်မိုလို့ ဆန္ဒပြတဲ့သူတွေက တရုတ်သံရုံးရှေ့မှာ သွားရောက်ပြီးတော့ ဆန္ဒပြတယ်လို့ မြင်ပါတယ်” ဟု နိုင်ငံရေးပါတီကြီးတစ်ခုမှ ခေါင်းဆောင်တစ်ဦးက ပြောသည်။

လက်ရှိတွင် နိုင်ငံအတွင်း၌ ဖြစ်ပွားနေသော တိုက်ပွဲများကြောင့် နေရပ်စွန့်ခွာစစ်ဘေးရှောင်နေရသည့်ပြည်သူလူထုများစွာရှိနေပြီး လိုအပ်ချက်များစွာဖြင့် ရင်ဆိုင်နေရလျက်ရှိသည့်အပြင် အရပ်သားသေဆုံး၊ နေအိမ်အဆောက်အဦးများ ပျက်စီးဆုံးရှုံးမှု နှင့် လမ်းတံတားများစွာ ပျက်စီးဆုံးရှုံးမှုများ ဖြစ်ပေါ်လျက်ရှိနေသည်။