ဂျန်ဇက် (NSS) - နိုဝင်ဘာ ၂၁

ဖိလစ်ပိုင်နိုင်ငံအနေနဲ့ ပိုင်နက်နယ်မြေ တစ်လက်မမှ စွန့်လွှတ်ဆုံးရှုံးခံသွားမှာမဟုတ်ကြောင်း သမ္မတ ဖာဒီနန်မာကိုစ့်ဂျူနီယာက ထုတ်ဖော်ပြောဆိုလိုက်ပါတယ်။

ဖိလစ်ပိုင်နိုင်ငံဟာ လက်ရှိအချိန်မှာ တောင်တရုတ်ပင်လယ်အတွင်း တရုတ်နိုင်ငံ နဲ့ ပိုင်နက်နယ်မြေ အငြင်းပွားမှုတွေရှိနေရာ တရုတ်နိုင်ငံနဲ့ထိပ်တိုက်ရင်ဆိုင်နေရပါတယ်။ သမ္မတဖာဒီနန်မာကိုစ့်ဂျူနီယာဟာ ပြီးခဲ့တဲ့ ရက်ပိုင်းက အမေရိကန်နိုင်ငံမှာ တရုတ်သမ္မတ ရှီကျင့်ဖျင့်နဲ့တွေ့ဆုံဆွေးနွေးခဲ့ပြီးနောက် ရက်ပိုင်းအကြာမှာ အခုလိုမျိုးပြောခဲ့တာပါ။ 

ဖိလစ်ပိုင်သမ္မတက တောင်တရုတ်ပင်လယ်အခြေအနေတွေဟာ အရင်ထက် ပိုဆိုးလာနေကြောင်း ပြောပါတယ်။ တရုတ်စစ်တပ်ဟာ ဖိလစ်ပိုင်ကမ်းရိုးတန်းနဲ့ အနီးစပ်ဆုံးနေရာတွေမှာ အခြေစိုက်စခန်းတွေ ဆောက်လုပ်ဖို့ စိတ်ဝင်စားမှုများရှိနေကြောင်း ဖိလစ်ပိုင်သမ္မတက ပြောပါတယ်။

သမ္မတဖာဒီနန်မာကိုစ့်ဂျူနီယာက "အရင်တုန်းက ကျွန်တော်ပြောခဲ့ဖူးသလိုပါပဲ။ ဖိလစ်ပိုင်နိုင်ငံဟာ နိုင်ငံပိုင်နက် နယ်မြေတစ်လက်မမှ နိုင်ငံခြားတိုင်းပြည်ထံစွန့်လွှတ်ပေးမှာ မဟုတ်ဘူး။ နိုင်ငံပိုင်နက်၊ အချုပ်အခြာအာဏာ ထိန်းသိမ်းခြင်းတွေ လုပ်ဆောင်သွားမယ်။ အဲဒီအတွက်လည်း နိုင်ငံတကာမဟာမိတ်အဖွဲ့တွေနဲ့ ပူးပေါင်း ဆောင်ရွက်နေတယ်" လို့ ပြောပါတယ်။

ဖိလစ်ပိုင်နဲ့ တရုတ်နိုင်ငံဟာ တောင်တရုတ်ပင်လယ်မှာ ပိုင်နက်နယ်မြေအငြင်းပွားမှုတွေ နှစ်အတန်ကြာဖြစ်ပွား ခဲ့ပြီး ပြီးခဲ့တဲ့သီတင်းပတ်တွေမှာ တောင်တရုတ်ပင်လယ်အတွင်း တရုတ်စစ်သင်္ဘောတွေနဲ့ ဖိလစ်ပိုင်ကမ်းခြေ စောင့်တပ်ဖွဲ့ သင်္ဘောတွေ ထိပ်တိုက်တွေ့ဆုံအထိ တင်းမာမှုမြင့်တက်ခဲ့ပါတယ်။

တရုတ်နဲ့ ဖိလစ်ပိုင်တို့ဟာ ပိုင်နက်နယ်မြေအငြင်းပွားခဲ့ပြီးနောက် နိုင်ငံတကာခုံရုံးအထိ ရောက်ရှိခဲ့ပြီး ခုံရုံးက အငြင်းပွားနေတဲ့နယ်မြေတွေနဲ့ပတ်သက်ကာ ဖိလစ်ပိုင် ပိုင်နက်ဖြစ်တယ်လို့ သတ်မှတ်ဆုံးဖြတ်ခဲ့ပါတယ်။ ဒါပေမယ့် တရုတ်နိုင်ငံဟာ ခုံရုံးဆုံးဖြတ်ချက်ကို မသိကျိူးကျွံ့ပြုကာ ဖိလစ်ပိုင်ရဲ့တောင်တရုတ်ပင်လယ်အတွင်းရှိ နယ်မြေပိုင်နက်တွေကို သင်္ဘောတွေဖြန့်ကြတ်ချထားတာ၊ ကျွန်းတုဆောက်တာတွေ လုပ်ဆောင်ခဲ့ကြောင်း သိရပါတယ်။