မျိုးကြီး (NSS) - နိုဝင်ဘာ ၂၀

ပြည်သူများ၏ အပ်နှံငွေများ ဆုံးရှုံးမှုမရှိနိုင်ကြောင်း ဗဟိုဘဏ်က အပြည့်အဝအာမခံထားပြီး ငွေသားကို မလိုအပ်ဘဲထုတ်ယူနေပါက ရာခိုင်နှုန်းတစ်ရပ်ပေး၍ လဲလှယ်ရခြင်းမျိုး ပြန်ဖြစ်လာနိုင်ကြောင်း သတိပေးထားသည်။

မြန်မာနိုင်ငံတော်ဗဟိုဘဏ်ဒုဥက္ကဋ္ဌ ဒေါက်တာလင်းအောင်က ယမန်နေ့ (နိုဝင်ဘာလ ၁၉ ရက်) တွင် မီဒီယာများနှင့်တွေ့ဆုံစဉ် အထက်ပါကဲ့သို့ အသိပေးပြောကြားခဲ့ခြင်းဖြစ်သည်။

လက်ရှိတွင် ပုဂ္ဂလိကဘဏ်များ နှင့် ဗဟိုဘဏ်တို့၌ ငွေသားအလုံအလောက်ရှိပြီး မြန်မာ နိုင်ငံ၏ ဘဏ်လုပ်ငန်းစနစ်သည် ဘဏ်ခွဲအချင်းချင်း ချိတ်ဆက်ဝန်ဆောင်မှုပေးသည့် Core Banking System ကို အသုံးပြုနေကြောင်း ဗဟိုဘဏ်ဒုဥက္ကဋ္ဌက ပြောသည်။

ထို့ကြောင့် ဘဏ်ခွဲတစ်ခုအနေဖြင့် အကြောင်းအမျိုးမျိုးကြောင့် ရပ်တန့်သွားပါက ပြည်သူများအနေဖြင့် အပ်ငွေပြန်လည် မရရှိခြင်းမျိုးမဖြစ်ပေါ်ဘဲ နိုင်ငံတစ်ဝန်းရှိ မည်သည့်ဘဏ်ခွဲတွင်မဆို ပြန်လည်ရယူနိုင်ကြောင်း ၎င်းက ထပ်မံပြောသည်။

“ဘဏ်စနစ် ခိုင်မာယုံကြည်မှုရှိဖို့ မြန်မာနိုင်ငံတော်ဗဟိုဘဏ်က ဆုံးရှုံးနိုင်ခြေများကို အခြေခံပြီး စောင့်ကြည့်ကြီးကြပ်နေတဲ့အတွက် အများပြည်သူရဲ့အပ်နှံငွေတွေ ဆုံးရှုံးမှုမရှိနိုင်ကြောင်း မြန်မာနိုင်ငံတော်ဗဟိုဘဏ်က အပြည့်အဝအာမခံပါတယ်”ဟု ဒေါက်တာလင်းအောင်က ပြောသည်။

ယခင်ဖြစ်စဉ်များအရ ကောလာဟလများကြောင့် ပြည်သူများအနေဖြင့် ဘဏ်များရှိ ငွေများကို အစုလိုက်အပြုံလိုက်ထုတ်ယူခဲ့မှုအပေါ် ဗဟိုဘဏ်က စီမံထိန်းကျောင်းကာ ပြန်လည် လည်ပတ်နိုင်ခဲ့ကြောင်း တွေ့ရှိရသည်။

ထို့ကြောင့် ပြည်သူများအနေဖြင့် စိုးရိမ်မှုလွန်ကဲကာ ငွေများကို လိုသည်ထက်ပိုမိုထုတ်ယူပါက အခက်အခဲများဖြစ်ပေါ်နိုင်သည့်အပြင် စီးပွားရေး၊ လူမှုရေးတည်ငြိမ်မှုများကိုလည်း ပျက်ပြားစေနိုင်သည့်အတွက် အဖျက်သမားမီဒီယာများ၏ ရေးသားမှုများကို စဉ်းစားချင့်ချိန်ပြုမူဆောင်ရွက်ရန်လည်း ဒုဥက္ကဋ္ဌဒေါက်တာလင်းအောင်က အကြံပြုထားသည်။

ဆက်လက်ပြီး ဗဟိုဘဏ်ဒုဥက္ကဋ္ဌဒေါက်တာလင်းအောင်က “ယခင်ကလို မိမိငွေတွေကို ရာခိုင်နှုန်းတစ်ရပ်ပေးပြီး လဲလှယ်ရယူခြင်းများကို ပြန်လည်ဖိတ်ခေါ်နေသကဲ့သို့ ဖြစ်လာနိုင်ပါတယ်”ဟုလည်း သတိပေးပြောကြားသည်။

ပြီးခဲ့သော ၂၀၂၁ ခုနှစ်အတွင်း ပြည်သူများအနေဖြင့် ဘဏ်များရှိ ၎င်းတို့၏ ငွေများကို ငွေသားလက်ဝယ်ရှိသူများထံမှ (၅)ရာခိုင်နှုန်း၊ (၁၀)ရာခိုင်နှုန်းပေးဆောင်ကာ လဲလှယ်ရယူခဲ့ရသော အခြေအနေများ ရှိခဲ့ဖူးသည်။

လက်ရှိတွင် ဘဏ်များ၌ ငွေထုတ်ယူမှုများပြားနေသူများကို ဗဟိုဘဏ်၊ စသုံးလုံးတို့က အနီးကပ်စောင့်ကြည့်လျက်ရှိပြီး ဈေးကစားမှုများတွင် ပါဝင်ပတ်သက်နေပါက ထိရောက်စွာအရေးယူသွားရန် ပြင်ဆင်ထားကြောင်း သိရသည်။

ထို့ပြင် ဘဏ်များထံမှ ပြည်သူများငွေထုတ်ယူရန် လှုံ့ဆော်ရေးသားသူ၊ ဝါဒဖြန့်နေသူများကိုလည်း အရေးယူနိုင်ရေးအတွက် တရားဥပဒေစိုးမိုးရေးအဖွဲ့အစည်းများက စီစဉ်ပြင်ဆင်လျက်ရှိကြောင်း သိရသည်။