ဂျန်ဇက် (NSS) - နိုဝင်ဘာ ၁၆ 

ကုလသမဂ္ဂအတွင်းရေးမှူးချုပ်ဂူတာရက်စ် သည်  မြန်မာနိုင်ငံအတွင်း ပြီးခဲ့သော လမှစတင်ပြီး လက်နက်ကိုင် ပဋိပက္ခများ တိုးမြင့်ဖြစ်ပွားနေသည့်အပေါ်  စိုးရိမ်နေကြောင်း ၎င်း၏ ပြောရေးဆိုခွင့်ရှိသူက ထုတ်ဖော်ပြောဆိုလိုက်သည်။ 

ပြီးခဲ့သော အောက်တိုဘာ ၂၇ ရက်မှစတင်ပြီး မြန်မာနိုင်ငံ ရှမ်းပြည်နယ်၊ စစ်ကိုင်း၊ ကယား၊ မွန်ပြည်နယ် အပါအဝင် ပြည်နယ်နှင့် တိုင်းဒေသများတွင် တိုက်ပွဲဖြစ်ပွားမှု အရှိန်မြင့်တက်လာခဲ့ရာ လူပေါင်း ၂ သိန်းကျော် နေရပ်စွန့်ခွာ ထွက်ပြေးခဲ့ရပြီး၊ မြန်မာနိုင်ငံတွင် နေရပ်စွန့်ခွာနေထိုင်နေရသူ ၂ သန်းခန့်ရှိလာကြောင်း ကုလသမဂ္ဂက ပြောသည်။

ကုလသမဂ္ဂအတွင်းရေးမှူးချုပ်ဂူတာရက်စ်က သက်ဆိုင်သူအားလုံးအနေဖြင့် နိုင်ငံတကာ လူသားချင်းစာနာမှု ဆိုင်ရာဥပဒေကို လေးစားလိုက်နာရန် နှင့် အရပ်သားပြည်သူများအား ကာကွယ်စောင့်ရှောက်ရေး  အစွမ်းကုန် ဆောင်ရွက်ရန်တို့ကိုလည်း  တောင်းဆိုလိုက်ကြောင်း ကုလသမဂ္ဂအတွင်းရေးမှူးချုပ်၏ ပြောရေးဆိုခွင့်ရှိသူ Stephane Dujarric က ထုတ်ဖော်ပြောလိုက်သည်။

မြန်မာနိုင်ငံတွင် လက်နက်ကိုင်ပဋိပက္ခများဖြစ်ပွားနေခြင်းကြောင့် လက်ရှိအချိန်အထိ နေရပ်စွန့်ခွာထွက်ပြေးရ သူအရေအတွက် ၂ သန်းကျော် ရှိနေကြောင်း ကုလသမဂ္ဂအဖွဲ့က ပြောသည်။ ကုလသမဂ္ဂအတွင်းရေးမှူးချုပ်၏ ပြောရေးဆိုခွင့်ရှိသူ Stephane Dujarric က " ကုလသမဂ္ဂအတွင်းရေးမှူးချုပ်ဟာ လုံခြုံရေးကောင်စီ ဆုံးဖြတ်ချက် ၂၆၆၉ (၂ဝ၂၂) နဲ့ အကြမ်းဖက်မှုများ အဆုံးသတ်စေရေးအတွက် အာဆီယံအဖွဲ့၊ ဒေသတွင်းနဲ့  နိုင်ငံတကာ မိတ်ဖက် အဖွဲ့အစည်းတွေနဲ့ ဆက်လက်လက်တွဲလုပ်ဆောင်ဖို့ကတိပြုထားတယ်။ ပြည်သူများကို အကာအကွယ်ပေးဖို့နဲ့ ဥပဒေကို ချိုးဖောက်မှုများအတွက် တာဝန်ရှိသူများကိုလည်း တာဝန်ခံမှု၊ တာဝန်ယူမှု ရှိစေရေး လုပ်ဆောင်သွားမှာ ဖြစ်ပါတယ်" ဟု ပြောသည်။