ဂျန်ဇက် (NSS) - နိုဝင်ဘာ ၁၁

အစ္စရေးနဲ့ ဟားမက်စ် လက်နက်ကိုင်အုပ်စုကြား ဂါဇာဒေသမှာစစ်ပွဲဖြစ်ပွားနေချိန်မှာပဲ အာရပ်နိုင်ငံများရဲ့ခေါင်းဆောင်တွေနဲ့ အီရန်သမ္မတို့ဟာ ဆော်ဒီအာရေဗျနိုင်ငံမှာတွေ့ဆုံဆွေးနွေးသွားမယ်လို့သိရပါတယ်။ဆွေးနွေးပွဲမှာ စစ်ပွဲဟာ အခြားနိုင်ငံတွေထံ ထပ်မံမကူးစက်ခင် စစ်ပွဲကိုအမြန်ဆုံးအဆုံးသတ်ဖို့ အဓိကထားဆွေးနွေးတောင်းဆိုသွားဖွယ်ရှိနေကြောင်းသိရပါတယ်။ အဆိုပါဆွေးနွေးပွဲကို Organisation of Islamic Cooperation (OIC)အဖွဲ့ဝင်နိုင်ငံများလည်း ပူးပေါင်းပါဝင်လာဖွယ်ရှိနေကြောင်း ဆော်ဒီအာရေဗျအစိုးရက သတင်းထုတ်ပြန်ထားပါတယ်။

အင်ဒိုနီးရှားနိုင်ငံရဲ့ထိပ်တန်း ဘာသာရေးခေါင်းဆောင်တစ်ဦးက အစ္စရေးနိုင်ငံကိုထောက်ခံနေတဲ့အနောက်အုပ်စုနိုင်ငံ ကုမ္ပဏီတွေရဲ့ကုန်ပစ္စည်းများနဲ့ ဝန်ဆောင်မှုတွေကို သပိတ်မှောက်သွားဖို့

တိုက်တွန်းတောင်းဆိုလိုက်ပါတယ်။ ပါလက်စတိုင်းပြည်သူတွေနဲ့တစ်သားတည်းရှိကြောင်းပြသဖို့ အစ္စရေးနဲ့ ဆက်နွယ်တဲ့ ကုန်ပစ္စည်းများကိုလည်း သပိတ်မှောက်သွားရမှာဖြစ်ကြောင်း အင်ဒိုနီးရှားထိပ်တန်းဘာသာရေးခေါင်းဆောင်တစ်ဦးဖြစ်သူက ပြောပါတယ်။ 

ကိုလံဘီယာသမ္မတက ၎င်းတို့နိုင်ငံအနေနဲ့ အစ္စရေးဝန်ကြီးချုပ်နေတန်ရာဟုကို နိုင်ငံတကာရာဇဝတ်တရားရုံး (ICC) မှာတရားစွဲဖို့ ကြိုးပမ်းသွားမယ်လို့ ထုတ်ဖော်ပြောဆိုလိုက်ပါတယ်။ ကိုလံဘီယာ နိုင်ငံခြားရေးဝန်ကြီးဟာ (ICC) တာဝန်ရှိသူများနဲ့တွေ့ဆုံပြီး ပါလက်စတိုင်းကလေးငယ်ထောင်ချီကိုသေဆုံးစေခဲ့တဲ့ အစ္စရေးဝန်ကြီးချုပ်နေတန်ရာဟုကို တရားစွဲဆိုရေးအတွက် ဆွေးနွေးသွားဖွယ်ရှိနေပါတယ်။

ပြင်သစ် သမ္မတမက်ခရွန်ဟာ ဂါဇာကမ်းမြောင်ဒေသမှာဖြစ်ပွားနေတဲ့ လူသားချင်းဆိုင်ရာစာနာမှုအကူအညီလိုအပ်ချက်ဆိုးရွားနေခြင်းနဲ့ပတ်သက်ပြီး အလွန်အမင်းစိတ်ပျက်မိကြောင်းပြောပါတယ်။ ဒါ့ပြင် ပြင်သစ် သမ္မတက ဂါဇာကမ်းမြောင်ဒေသမှာ ဖြစ်ပွားနေတဲ့ စစ်ပွဲနဲ့ပတ်သက်ပြီး ကုလသမဂ္ဂ လုံခြုံရေးကောင်စီရဲ့တာဝန်ယူခြင်းတာဝန်ခံခြင်း ရှိဖို့ပျက်ကွက်နေတာတွေ၊ နိုင်ငံတကာအဖွဲ့စည်းတွေက အရေးယူဆောင်ရွက်ခြင်းမရှိတာတွေအတွက် စိတ်ပျက်မိကြောင်း ပြောပါတယ်။

အာရပ်နိုင်ငံတွေရှိ အမေရိကန်သံတမန်တွေက ဂါဇာဒေသမှာဖြစ်ပွားနေတဲ့ စစ်ပွဲနဲ့ပတ်သက်ပြီး အမေရိကန်နိုင်ငံက ကူညီပေးနေတာတွေနဲ့ပတ်သက်ပြီး သမ္မတ ဂျိုးဘိုင်ဒန်ကိုသတိပေးပြောဆိုလိုက်ကြောင်းသိရပါတယ်။ အမေရိကန်အစိုးရဟာ အစ္စရေးနဲ့ ဟားမက်စ်လက်နက်ကိုင်အဖွဲ့ကြားစစ်ပွဲဖြစ်ပွားခဲ့ပြီး နောက်ပိုင်း အစ္စရေးနိုင်ငံဘက်မှရပ်တည်ခဲ့ကာ အစ္စရေးကို လိုအပ်တဲ့အကူညီများပံ့ပိုးပေးခဲ့ပြီး အလုံးစုံ အပစ်ခတ်ရပ်စဲရေးကိုလည်း ငြင်းဆန်ပယ်ချထားကြောင်းသိရပါတယ်။ အာရပ်နိုင်ငံတွေရှိ အမေရိကန်သံတမန်တွေက " အမေရိကန်အစိုးရရဲ့ ရပ်တည်မှုတွေဟာ အာရပ်နိုင်ငံတွေကြားမှာ နောက်မျိုးဆက်တစ်ခုလောက်အထိ ဆုံးရှုံးဖွယ်ရှိနေပါတယ်"လို့ပြောပါတယ်။