မြူနစ် (NSS) - နိုဝင်ဘာ ၁ဝ

တပ်မတော်အနေဖြင့် မြန်မာနိုင်ငံ၏ လုံခြုံရေး၊ ကာကွယ်ရေးနှင့်ပတ်သက်၍ ဆောင်ရွက်နိုင်သည်ကို အာမခံကြောင်း နစကပြောခွင့်ရ ဗိုလ်ချုပ်ဇော်မင်းထွန်းက ပြောသည်။

နိုင်ငံအတွင်းဖြစ်ပွားနေသည့်တိုက်ပွဲများနှင့်ပတ်သက်၍ ယနေ့ (နိုဝင်ဘာ ၁ဝ ရက်) တွင် NP News သတင်းဌာန အနေဖြင့် ဗိုလ်ချုပ်ဇော်မင်းထွန်းအား မေးမြန်းစဉ် ၎င်းက အထက်ပါကဲ့သို့ ထည့်သွင်းပြောဆိုခဲ့ခြင်းဖြစ်သည်။

ရှမ်းပြည်နယ်မြောက်ပိုင်းအတွင်းရှိ လုံခြုံရေးစခန်းများကို MNDAA ဦးဆောင်သော မဟာမိတ်(၃)ဖွဲ့သည် အောက်တိုဘာ ၂၇ ရက်မှစတင်ကာ (၁ဝ၂၇ စစ်ဆင်ရေး) အမည်ဖြင့် တိုက်ခိုက်နေလျက်ရှိသည်။

ထိုသို့ ရှမ်းပြည်နယ်မြောက်ပိုင်း၌ တိုက်ပွဲများဖြစ်ပွားနေချိန် တစ်ပြိုင်နက်တည်းတွင် စစ်ကိုင်းတိုင်းအတွင်းရှိ ကောလင်းမြို့၊ တမူးမြို့နှင့် ထီးချိုင့်မြို့တစ်ဝိုက်တွင်လည်း KIA၊ PDF ပူးပေါင်းအဖွဲ့များက တိုက်ပွဲများ ဖော်ဆောင်နေလျက်ရှိသည်။

ယင်းကဲ့သို့ တိုက်ပွဲများဖြစ်ပွားနေမှုနှင့်အတူ တပ်မတော်၏ လုံခြုံရေးစခန်းများ၊ မြို့များ သိမ်းပိုက်ထိန်းချုပ်ခံခဲ့ရ သည်ဆိုသော သတင်းများသည်လည်း တစ်ပြိုင်နက်တည်း ပျံ့နှံ့နေလျက်ရှိသည်။

“ဒါတွေနဲ့ပတ်သက်ပြီးတော့ ကျွန်တော်ပြောချင်တာက ကောလဟာလကို နည်းမျိုးစုံနဲ့ ဖြန့်ပါလိမ့်မယ်။ ဝါဒဖြန့်ပါ လိမ့်မယ်။ ဒါတွေနဲ့ပတ်သက်ပြီး ပြည်သူလူထုအနေနဲ့ ယုံကြည်မှုမရှိကြဖို့ ပြောချင်ပါတယ်။ တစ်ခု ခိုင်ခိုင်မာမာ အာမခံနိုင်တာကတော့ မြန်မာ့တပ်မတော်အနေနဲ့ မြန်မာနိုင်ငံရဲ့လုံခြုံရေး၊ ကာကွယ်ရေးနဲ့ပတ်သက်ပြီးတော့ ဆောင်ရွက်လျက်ရှိတယ်။ ဆောင်ရွက်နိုင်တယ်။ ဆောင်ရွက်သွားမယ်။ ဒါကိုပဲ ကျွန်တော်အနေနဲ့ အတိအလင်း ပြောချင်ပါတယ်” ဟု ဗိုလ်ချုပ်ဇော်မင်းထွန်းက NP News ကို ပြောသည်။

မြန်မာနိုင်ငံ၏ လုံခြုံရေး၊ ကာကွယ်ရေးနှင့်ပတ်သက်၍ တပ်မတော်အနေဖြင့် ဆောင်ရွက်နိုင်သည်ကို အာမခံ ကြောင်း ဗိုလ်ချုပ်ဇော်မင်းထွန်းက ပြောဆို အသိပေးထားခြင်းဖြစ်သည်။

ရှမ်းပြည်နယ်ရှိ ကွမ်းလုံမြို့၌ တပ်မတော်နှင့် MNDAA အဖွဲ့တို့အကြား တိုက်ပွဲများ ဆက်လက်ဖြစ်ပွားနေလျက်ရှိပြီး ကွမ်းလုံမြို့အတွင်းရှိ နေရာအချို့သို့ MNDAA အဖွဲ့ဝင်များ ရောက်ရှိနေသည့်အတွက် ကွမ်းလုံဗျူဟာ နှင့် တပ်ဖွဲ့ဝင်များက ပြင်းပြင်းထန်ထန် ခုခံတိုက်ခိုက်နေကြောင်း နစကဘက်က ဆိုသည်။

ထို့ပြင် ရှမ်းပြည်နယ်အတွင်းရှိ မုံးကိုးမြို့နှင့် ချင်းရွှေဟော်မြို့တို့တွင် တပ်မတော်ဘက်က လက်လွတ်ခဲ့ရသော နေရာများကို ပြန်လည်ရရှိရေးအတွက် ချီတက်ဆောင်ရွက်နေကြောင်းလည်း ဗိုလ်ချုပ်ဇော်မင်းထွန်းက ပြောသည်။

လက်ရှိ၌ ရှမ်းပြည်နယ်မြောက်ပိုင်းအတွင်း ဖြစ်ပွားနေသော တိုက်ပွဲများကြောင့် ဒေသခံပြည်သူဦးရေ (၅ဝဝဝဝ) နီးပါးသည် နေရပ်စွန့်ခွာထွက်တိမ်းရှောင်နေရလျက်ရှိကြောင်း UNOCHA က အသိပေးထုတ်ပြန်ထားသည်။