စော (NSS) - နိုဝင်ဘာ ၁ဝ

စစ်ကိုင်းတိုင်း၊ ရွှေဘိုမြို့နယ်၊ PDF အဖွဲ့က ပစ်ခတ်သော Drop Bomb များ မင်္ဂလာဆောင်နှင့် အလှူပွဲ အခမ်းအနားသို့ ကျရောက်ပေါက်ကွဲမှုကြောင့်  တစ်ဦးသေဆုံးကာ (၁၈)ဦး ထိခိုက်ဒဏ်ရာရရှိခဲ့ကြောင်း နစက၏ ထုတ်ပြန်ချက် များအရ သိရသည်။

ဖြစ်စဉ်မှာ ပြီးခဲ့သည့် (နိုဝင်ဘာ ၈ ရက်)၊ နံနက် (၁ဝ)နာရီဝန်းကျင်အချိန်တွင် ရွှေဘိုမြို့နယ်၊ မြင်းချင်းကျေးရွာရှိ ဦးစိုးပိုင်၏ နေအိမ်၌ မင်္ဂလာဆောင်အခမ်းအနားကျင်းပနေစဉ် Drop Bomb ကျရောက်ပေါက်ကွဲခဲ့ကြောင်း သိရသည်။

PDF အမည်ခံ အကြမ်းဖက်သမားများက အဆိုပါကျေးရွာ၏ မြောက်ဘက်မှနေ၍ Drone များ အသုံးပြုကာ Drop Bomb များဖြင့် ပစ်ချတိုက်ခိုက်ခဲ့မှုများ ပြုလုပ်ခဲ့ကြောင်း နစက က ဆိုသည်။

ထို့သို့ပစ်ချတိုက်ခိုက်မှုကြောင့် ဦးစိုးပိုင်၏ နေအိမ်ရှိ အခမ်းအနားသို့ကျရောက်ပေါက်ကွဲခဲ့ရာ  အမျိုးသားတစ်ဦး သေဆုံးခဲ့ပြီး အသက် (၁ဝ)လအရွယ် ကလေးငယ် အပါအဝင် လူ(၁၆)ဦး ထိခိုက်ဒဏ်ရာရရှိခဲ့ကြောင်း သိရသည်။

အလားတူ နံနက် (၁ဝ)နာရီအချိန်ခန့်တွင် ရွှေဘိုမြို့နယ်၊ သီးလုံကျေးရွာရှိ မင်းကြီးဘုန်းကြီးကျောင်း၌ ဆွမ်းကျွေး အလှူပွဲပြုလုပ်နေစဉ် PDF အဖွဲ့က ပစ်ခတ်သော  Drop Bomb များ ကျရောက်ပေါက်ကွဲမှု ထပ်မံဖြစ်ပွားခဲ့ကြောင်း နစကမှ သတင်းထုတ်ပြန်ထားသည်။  

ထို့သို့ကျရောက်ပေါက်ကွဲမှုကြောင့်  သံဃာတစ်ပါး နှင့် အမျိုးသမီးတစ်ဦးတို့ ထိခိုက်ဒဏ်ရာရရှိခဲ့ကြောင်း နစကမှ သတင်းထုတ်ပြန်ထားသည်။

အဆိုပါထိခိုက်ဒဏ်ရာရရှိသူများကို ရွှေဘိုမြို့ပြည်သူ့ဆေးရုံကို ပို့ဆောင်ခဲ့ပြီး  ထိုသို့ ပစ်ခတ်တိုက်ခိုက်ခဲ့သူများကို လုံခြုံရေးတပ်ဖွဲ့များက ဖမ်းဆီးရမိရေးအတွက် ဆောင်ရွက်လျက်ရှိကြောင်း နစက ကဆိုသည်။