မြူနစ် / သန့်ဇင်  (NSS) - နိုဝင်ဘာ ၉

ရှမ်းမြောက်၌ ဖြစ်ပွားနေသော ပြဿနာ၏အစသည် မူးယစ်ဆေးဝါးပြဿနာပင်ဖြစ်ပြီး ၎င်းမှရရှိသောငွေများဖြင့် အာဏာရရှိရေးကို လက်နက်ကိုင်ကာ အသက်ဆက်ခဲ့ခြင်းဖြစ်ကြောင်း တပ်ချုပ်က ပြောသည်။

တပ်မတော်ကာကွယ်ရေးဦးစီးချုပ်ဗိုလ်ချုပ်မှူးကြီးမင်းအောင်လှိုင်က ယမန်နေ့(နိုဝင်ဘာလ ၈ ရက်)တွင် နေပြည်တော်၌ ပြုလုပ်သော အမျိုးသားကာကွယ်ရေးနှင့်လုံခြုံရေးကောင်စီအစည်းအဝေးတွင် အထက်ပါကဲ့သို့ အသိပေးပြောကြားခဲ့ခြင်းဖြစ်သည်။

ယနေ့ရှမ်းပြည်နယ်မြောက်ပိုင်းတွင် ဖြစ်ပွားနေသည့် ပြဿနာ၏အစမှာ မူးယစ်ဆေးဝါးပြဿနာပင်ဖြစ်ပြီး မူးယစ်ဆေးဝါးမှ ရရှိသောငွေများဖြင့် အာဏာရရှိရေးကို လက်နက်ကိုင်လမ်းစဉ်ဖြင့် အသက်ဆက်ခဲ့ခြင်းဖြစ်သည်ဟု ၎င်းက သုံးသပ်ထားသည်။

လက်နက်ကိုင်လမ်းစဉ်ဖြင့် မူးယစ်ဆေးထုတ်လုပ်၊ သယ်ဆောင်ရောင်းချမှုကို ကာကွယ်ခဲ့ပြီး လောင်းကစားကဲ့သို့သော တရားမဝင်လုပ်ငန်းများကိုလည်း လုပ်ဆောင်ခဲ့သည်ဟု ဗိုလ်ချုပ်မှူးကြီးမင်းအောင်လှိုင်က ပြောသည်။

ထို့ကြောင့် ပြဿနာ၏ အရင်းအမြစ်ဖြစ်သည့် မူးယစ်ဆေးဝါးအမြစ်ပြတ်နှိမ်နင်းရေးကို ထိထိရောက်ရောက်ဆောင်ရွက်သွားရမည်ဟု ၎င်းက ထပ်မံပြောသည်။

ထို့ပြင် ယင်းကဲ့သို့ဆောင်ရွက်နိုင်ရန်အတွက် တည်ငြိမ်ရေးနှင့် တရားဥပဒေစိုးမိုးရေးအတွက် မြန်မာနိုင်ငံရဲတပ်ဖွဲ့၏ စွမ်းရည်မြင့်မားရေးကို ဆောင်ရွက်သွားရမည်ဟုလည်း ဗိုလ်ချုပ်မှူးကြီးက ပြောသည်။

တပ်မတော်အနေဖြင့် နယ်မြေတည်ငြိမ်အေးချမ်းရေး၊ တရားဥပဒေစိုးမိုးရေးနှင့် ပြည်သူများ၏ အသက်အိုးအိမ်စည်းစိမ်ကာကွယ်ရေးအတွက် လိုအပ်သည့် လုံခြုံရေးလုပ်ငန်းများကို ဆက်လက် ဆောင်ရွက်သွားမည်ဟု တပ်ချုပ်က ဆက်လက်ပြောသည်။

ကိုးကန့်လက်နက်ကိုင်အဖွဲ့ MNDAA ဦးဆောင်၍ TNLA၊ AA မဟာမိတ်လက်နက်ကိုင်(၃)ဖွဲ့သည် အောက်တိုဘာလ ၂၇ ရက်မှစတင်ကာ ရှမ်းပြည်နယ်မြောက်ပိုင်းအတွင်းရှိ လုံခြုံရေးစခန်းများကို အင်အားအလုံးအရင်းဖြင့် ဝင်ရောက်တိုက်ခိုက်မှုများ ပြုလုပ်ခဲ့သည်။

ထိုသို့ တိုက်ခိုက်မှုကြောင့် တပ်မတော်၏ လုံခြုံရေးစခန်းများ သိမ်းပိုက်ခံခဲ့ရမှုများရှိခဲ့ပြီး ချင်းရွှေဟော်၊ ဖောင်းဆိုင်၊ ကြူကုတ်ဒေသများကိုလည်း MNDAA က ထိန်းချုပ်ထားကြောင်း သိရသည်။

လက်ရှိအချိန်ထိ ရှမ်းပြည်နယ်မြောက်ပိုင်း၌ ဖြစ်ပွားသော တိုက်ပွဲများအတွင်း တပ်မတော်၏ တင့်ကား ထိခိုက်ပျက်စီးမှုများရှိခဲ့သည့်အပြင် လက်နက်ခဲယမ်းအများအပြားသည်လည်း လက်နက်ကိုင်အဖွဲ့များ၏ သိမ်းပိုက်ခြင်းကို ခံခဲ့ရသည်။

ထို့ပြင် ချင်းရွှေဟော်ဒေသ၌ တိမ်းရှောင်နေကြသည့် နိုင်ငံ့ဝန်ထမ်းများနှင့် ပြည်သူများအား ပြန်လည်ခေါ်ဆောင်နိုင်ရန် ညှိနှိုင်းဆောင်ရွက်လျက်ရှိပြီး နယ်မြေတည်ငြိမ်အေးချမ်းရေးနှင့် လိုအပ်သည့် လုံခြုံရေးလုပ်ငန်းများကိုလည်း လုပ်ဆောင်လျက်ရှိသည်ဟု ၎င်းကပြောသည်။