လေစွမ်းအင်ဖြင့် လျှပ်စစ်မီးပေးနိုင်မည့်စီမံချက်အပါအဝင် နားလည်မှုစာချွန်လွှာ(၃)စောင်ကို မြန်မာ-အိန္ဒိယကြား လက်မှတ်ရေးထိုး
Pearl (NSS) - နိုဝင်ဘာ ၇
ကွမ်းခြံကုန်းမြို့နယ်ရှိ ကျေးရွာများကို လေစွမ်းအင်ဖြင့် လျှပ်စစ်မီးပေးနိုင်မည့်စီမံချက် အပါအဝင် နားလည်မှုစာချွန်လွှာ (၃)စောင်ကို မြန်မာ-အိန္ဒိယကြား လက်မှတ်ရေးထိုးခဲ့ကြောင်း ရင်းနှီးမြှုပ်နှံမှုနှင့်နိုင်ငံခြား စီးပွားဆက်သွယ်ရေးဝန်ကြီးဌာန၏ အချက်အလက်များအရ သိရသည်။
ယမန်နေ့ (နိုဝင်ဘာလ ၆ ရက်) တွင် နေပြည်တော်ရှိ ရင်းနှီးမြှုပ်နှံမှုနှင့်နိုင်ငံခြား စီးပွားဆက်သွယ်ရေးဝန်ကြီးဌာန၌ မြန်မာအစိုးရ နှင့် အိန္ဒိယအစိုးရတို့ကြား “မြန်ဆန်စွာ အကျိုးဖြစ်ထွန်းစေမည့် စီမံချက်များ (Quick Impact Projects - QIP)” အကောင်အထည်ဖော်ဆောင်ရွက်ရန် နားလည်မှုစာချွန်လွှာ (၃)စောင် လက်မှတ်ရေးထိုးပွဲကို ကျင်းပခဲ့သည်။
အခမ်းအနားတွင် “မြန်မာနိုင်ငံ အလယ်ပိုင်း၊ အပူပိုင်းဇုန်ဒေသရှိ မိုးခေါင်ရေရှား ကျေးရွာများတွင် ဆိုလာစွမ်းအင်ဖြင့် ရေပေးဝေရေးစီမံချက်ဆိုင်ရာနားလည်မှုစာချွန်လွှာ” နှင့် “ဌာနဆိုင်ရာ အီလက်ထရောနစ် စာကြည့်တိုက် စီမံချက်ဆိုင်ရာ နားလည်မှုစာချွန်လွှာ”တို့ကို အပူပိုင်းဒေသစိမ်းလန်းစိုပြည်ရေးဦးစီးဌာန နှင့် ပတ်ဝန်းကျင်ထိန်းသိမ်းရေးဦးစီးဌာန ညွှန်ကြားရေးမှူးချုပ် ဦးသိန်းတိုး နှင့် မြန်မာနိုင်ငံဆိုင်ရာ အိန္ဒိယသံရုံး ဒုတိယအကြီးအကဲ Mr. Ashish Sharma တို့က လက်မှတ်ရေးထိုးခဲ့ကြောင်း သိရသည်။
ထို့အတူ “ရန်ကုန်တိုင်းဒေသကြီး၊ ကွမ်းခြံကုန်းမြို့နယ်၌ အသေးစားလေစွမ်းအင်ဖြင့် ကျေးလက်ဒေသများ လျှပ်စစ်မီးပေးရေး စီမံချက်ဆိုင်ရာ နားလည်မှုစာချွန်လွှာ”ကို အဆင့်မြင့်သိပ္ပံနှင့်နည်းပညာဦးစီးဌာန ညွှန်ကြားရေးမှူးချုပ် ဒေါ်နွယ်နီ နှင့် အိန္ဒိယသံရုံး ဒုတိယအကြီးအကဲ Mr. Ashish Sharma တို့က လက်မှတ်ရေးထိုးခဲ့သည်။
စီမံချက်တန်ဖိုးသည် အမေရိကန်ဒေါ်လာ (၁)သိန်းခွဲရှိပြီး အဆိုပါ MOU (၃)စောင်ရေးထိုးခြင်းဖြင့် အပူပိုင်းဇုန် မိုးခေါင်ရေရှားသည့် ဒေသများတွင် ဆိုလာစွမ်းအင်ဖြင့် ရေလုံလောက်စွာပေးဝေနိုင်ခြင်း ၊ အီလက်ထရောနစ်စာကြည့်တိုက်တည်ထောင်နိုင်ခြင်း နှင့် ကွမ်းခြံကုန်းမြို့နယ်အတွင်းရှိ ကျေးရွာများကို လေစွမ်းအင်ဖြင့် လျှပ်စစ်မီးပေးနိုင်မည်ဖြစ်ကြောင်း သိရသည်။
Quick Impact Project (QIP) သည် စီမံချက်တန်ဖိုးအားဖြင့် စီမံချက်တစ်ခုလျှင် အမေရိကန်ဒေါ်လာ ၅၀,၀၀၀ တန်ဖိုးခွင့်ပြုပေးပြီး အလားတူ စီမံချက်များအား မြန်မာနိုင်ငံ၏ လူမှုစီးပွားဖွံ့ဖြိုးမှုကို အထောက်အကူဖြစ်စေရန် အိန္ဒိယအစိုးရနှင့် ဆက်လက်ညှိနှိုင်း ဆောင်ရွက်မည်ဖြစ်ကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ရန်ကုန်ပြည်သူ့ဆေးရုံကြီး အဆင့်မြင့်ခုနှစ်ထပ်ဆောင်သစ် တည်ဆောက်မှု (၈၀)ရာခိုင်နှုန်းကျော်ပြီးစီးနေပြီဖြစ်ပြီး ၂၀၂၄ ခုနှစ်အတွင်း ဖွင့်လှစ်မည်
RELATED POSTS
21 Sep 2024 | အထွေထွေ,နိုင်ငံတကာ
20 Sep 2024 | အထွေထွေ,ပြည်တွင်း
19 Sep 2024 | အထွေထွေ,ပြည်တွင်း
19 Sep 2024 | အထွေထွေ,ပြည်တွင်း