ဂျန်ဇက် (NSS) - ‌နိုဝင်ဘာ ၂

လက်ဘနွန်လက်နက်ကိုင်အဖွဲ့ ဟစ်ဘိုလာအုပ်စုက ၎င်းတို့ဟာ လက်ဘနွန်တောင်ပိုင်းကို ပျံသန်းလာတဲ့ အစ္စရေးနိုင်ငံရဲ့ ဒရုန်းကို မြေပြင်ကနေ ဝေဟင်ပစ်ဒုံးကျည်တွေနဲ့ ပစ်ချနိုင်ခဲ့ကြောင်းဆိုပါတယ်။ ဟစ်ဘိုလာအုပ်စုတွေဟာ အစ္စရေးနဲ့ ဟားမက်စ်လက်နက်ကိုင်အဖွဲ့ ကြားစစ်ပွဲစတင်ခဲ့ပြီးနောက်ပိုင်းကတည်းက အစ္စရေးနိုင်ငံဘက်ခြမ်းကို ရော့ကတ်ဒုံးကျည်တွေနဲ့ပစ်ခတ်ခဲ့ပြီး အစ္စရေးကလည်း ဟစ်ဘိုလာအုပ်စုတွေကို ပြန်လည်ပစ်မှတ်ထားတိုက်ခိုက်ခဲ့ကြောင်းသိရပါတယ်။ 

ဂါဇာကမ်းမြောင်ရှိ ပါလက်စတိုင်းကလေးငယ်ပေါင်း တစ်ထောင်ကျော်ဟာ ယူအေအီးနိုင်ငံရှိ ဆေးရုံတွေမှာ ကုသမှုတွေခံယူနေရကြောင်း သိရပါတယ်။ ကလေးငယ်တွေနဲ့အတူမိသားစုတွေလည်း ယူအေအီးနိုင်ငံကို အတူရောက်ရှိလာခဲ့ပြီး ကလေးငယ်တွေ ဆေးဝါးကုသပြီးချိန်မှသာ ဂါဇာဒေသကို ပြန်ဖွယ်ရှိနေကြောင်းသိရပါတယ်။ 

အာဂျင်တီးနားနိုင်ငံဟာ ဂါဇာကမ်းမြောင်ဒေသရှိ ဒုက္ခသည်စခန်းတွေကို တိုက်ခိုက်မှုနဲ့ပတ် သက်ပြီး အစ္စရေးနိုင်ငံကို ပြစ်တင်ရှုတ်ချခဲ့ကြောင်းသိရပါတယ်။ အစ္စရေးနိုင်ငံဟာ နိုင်ငံတ ကာ ဥပဒေတွေကိုလိုက်နာခြင်းမျိုးမရှိကြောင်း၊ အာဂျင်တီးနား နိုင်ငံခြားရေးဝန်ကြီးဌာနက ပြောပါတယ်။ ပါလက်စတိုင်းလက်နက်ကိုင်အဖွဲ့အနေနဲ့လည်း ဖမ်းဆီးထားသူများကို အမြန်ဆုံးပြန်လွှတ်ပေးစေလိုကြောင်းပြောပါတယ်။ အစ္စရေးနဲ့ ဟားမက်စ်လက်နက်ကိုင်အဖွဲ့ကြားဖြစ်ပွားခဲ့တဲ့တိုက်ပွဲများကြောင့် သေဆုံးသူအများဆုံး နိုင်ငံခြားသားများထဲတွင် အာဂျင်တီးနား နိုင်ငံသားများအများဆုံး ပါဝင်နေကြောင်းသိရပါတယ်။ 

အမေရိကန်အစိုးရဟာ ဂါဇာဒေသရဲ့အနာဂတ်အုပ်ချုပ်ရေးအဖွဲ့တွေမှာ ဟားမက်စ်လက် နက်ကိုင်အဖွဲ့ကို ပါဝင်ခွင့်ပေးရမယ်ဆိုတဲ့အချက်ကို ငြင်းဆန်ပယ်ချလိုက်ကြောင်းသိရပါတယ်။ အစ္စရေးနဲ့ ဟားမက်စ်အဖွဲ့ကြားဖြစ်ပွားနေတဲ့ စစ်ပွဲပြီးဆုံးသွားချိန်မှာ ဟားမက်စ်အဖွဲ့ဟာ ဂါဇာကမ်းမြောင်ဒေသ အနာဂတ်အုပ်ချုပ်ရေးအဖွဲ့မှာ ပါဝင်လာဖွယ်ရှိတယ်လို့ ထင်ကြေးပေးမှုတွေရှိနေခဲ့ပါတယ်။

အမေရိကန်စစ်သားတွေကို ဂါဇာဒေသကို ဖြန့်ကြတ်ချထားမှာမဟုတ်ကြောင်း အမေရိကန်အစိုးရတာဝန်ရှိသူများက ထပ်မံပြောဆိုလိုက်ပါတယ်။ အမေရိကန်တပ်ဖွဲ့ဝင်တွေကို အစ္စရေးနဲ့ ဟားမက်စ်လက်နက်ကိုင်အဖွဲ့များကြား စစ်ပွဲဖြစ်ပွားနေတဲ့ ဂါဇာဒေသ ငြိမ်းချမ်းရေးအတွက် ငြိမ်းချမ်းရေးမစ်ရှင်များလုပ်ကိုင်ဖို့ စေလွှတ်ဖွယ်ရှိနေကြောင်း အစောပိုင်းက သတင်းများထွက်ပေါ်ခဲ့ပါတယ်။ 

အမေရိကန်အမျိုးသားလုံခြုံရေးကောင်စီ ပြောရေးဆိုခွင့်ရှိသူ  ဂျွန်ကာဘိုင်က "ဂါဇာဒေသ စစ်မြေပြင်ကို အမေရိကန်တပ်ဖွဲ့ဝင်တွေ စေလွှတ်မှာမဟုတ်ဘူး၊ လက်ရှိမှာလည်းစေလွှတ်မှာမဟုတ်သလို အနာဂတ်မှာလည်းစေလွှတ်မှာမဟုတ်ဘူး၊ ဒါပေမယ့် မိတ်ဖက်တွေနဲ့တော့ ဂါဇာဒေသ ငြိမ်းချမ်းရေးအတွက် ဆွေးနွေးနေတယ်" လို့ပြောပါတယ်။