သန့်ဇင် (NSS) - နိုဝင်ဘာ ၁

မန္တလေးတိုင်း၊ ပုသိမ်ကြီးမြို့နယ်၊ ချမ်းမြသာစည်မြို့နယ်နှင့် အောင်မြေသာစံမြို့နယ်တို့တွင် ငွေကျပ်(၅၄၀၄ ဒသမ ၂)သိန်းတန်ဖိုးရှိ စိတ်ပြောင်းဆေးဝါးများအပြင် ကား(၂)စီး နှင့် ဆိုင်ကယ်တစ်စီးတို့ ဖမ်းဆီးရမိခဲ့ကြောင်း မြန်မာနိုင်ငံမူးယစ်ဆေးဝါး တားဆီးနှိမ်နင်းရေး ရဲတပ်ဖွဲ့မှ သတင်းထုတ်ပြန်ထားသည်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က ပြီးခဲ့သော အောက်တိုဘာလ ၂၈ ရက်၊ နေ့လည် ၁ နာရီခွဲအချိန်တွင် ပုသိမ်ကြီးမြို့နယ်၊ အုန်းချောကျေးရွာအနီးတွင် ဖမ်းဆီးရမိခဲ့ခြင်းဖြစ်ကြောင်း သိရသည်။

အဆိုပါကျေးရွာအနီးတွင် စည်သူထွန်း(ခ)စည်သူ(၂၅)နှစ်နှင့် သန်းထွန်း(ခ)အားချန်(၂၄)နှစ်တို့ကို ALPHARD ကားတစ်စီး၊ HANDA CIVIC ကားတစ်စီးတို့နှင့်အတူ တွေ့ရှိခဲ့သဖြင့် စစ် ဆေးရှာဖွေခဲ့ရာ ၎င်းတို့(၂)ဦးထံမှ ငွေကျပ်(၂၄၉)သိန်းတန်ဖိုးရှိ Happy Water အလေးချိန် (၂၀၇ ဒသမ ၅)ဂရမ်၊ ငွေကျပ်(၃၀ ဒသမ ၈)သိန်းတန်ဖိုးရှိ ကက်တမင်းအလေးချိန်(၇၇) ဂရမ်တို့အပြင် လက်ကိုင်ဖုန်း(၂)လုံးတို့ သိမ်းဆည်းရမိခဲ့ကြောင်း သိရသည်။

ဆက်လက်စစ်ဆေးဖော်ထုတ်ချက်အရ ညနေ ၅ နာရီခွဲအချိန်တွင် သန်းထွန်း(ခ)အားချန် နေထိုင်သည့် ချမ်းမြသာစည်မြို့နယ်၊ မြို့သစ်(၁)ရပ်ကွက်၊ ၁၀၁(A)x ၁၀၂လမ်းကြား၊ ၆၄(A)လမ်းရှိ နေအိမ်အတွင်းမှ ငွေကျပ်(၄၀၁၀ ဒသမ ၄)သိန်းတန်ဖိုးရှိ Happy Water အလေးချိန် ၃ ဒသမ ၃၄၂ ကီလိုနှင့် ငွေကျပ်(၃၈၈)သိန်းတန်ဖိုးရှိ ကက်တမင်းအလေးချိန် (၉၇၀)ဂရမ်တို့အပြင် ဆိုင်ကယ်တစ်စီးပါ ထပ်မံသိမ်းဆည်း ရမိခဲ့ကြောင်း မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က ထုတ်ပြန်ထားသည်။

ထို့နောက် ကွင်းဆက်ဖော်ထုတ်ချက်အရ အောက်တိုဘာလ ၂၉ ရက်၊ နံနက် ၁နာရီခွဲအချိန်တွင် အောင်မြေသာစံမြို့နယ်၊ သီရိမာလာအရှေ့ ရပ်ကွက်၊ ၈၇(C)လမ်းနှင့် ၂၃(E) လမ်းထောင့်တွင် ညီပူး(ခ)ပလောင်(၂၃)နှစ်ကို ငွေကျပ်သိန်း(၆၉၀)တန်ဖိုးရှိ Happy water အလေးချိန် (၅၇၅) ဂရမ်၊ ငွေကျပ် (၃၆)သိန်းတန်ဖိုးရှိ ကက်တမင်းအလေးချိန် (၉၀)ဂရမ်နှင့် လက်ကိုင်ဖုန်းတစ်လုံးတို့ ဆက်လက်သိမ်းဆည်းရမိခဲ့ကြောင်း သိရသည်။

ထို့ကြောင့် ၎င်းတို့(၃)ဦးအား သက်ဆိုင်ရာနယ်မြေရဲစခန်းများတွင် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အမှုဖွင့် အရေးယူထားပြီး ကွင်းဆက်များအား စစ်ဆေးဖော်ထုတ်လျက်ရှိကြောင်း မြန်မာနိုင်ငံမူးယစ်ဆေးဝါးတားဆီး နှိမ်နင်းရေးရဲတပ်ဖွဲ့က သတင်းထုတ်ပြန်ထားသည်။