စော (NSS) - အောက်တိုဘာ ၃၁

မနက်ဖြန် (နိုဝင်ဘာ ၁ ရက်) တွင် ဖွင့်လှစ်မည့် (၅၆)ကြိမ်မြောက် အောင်ဘာလေသိန်းဆုထီတွင် ကျပ်သန်း (၄ဝဝဝ) ကျော် ချီးမြှင့်သွားမည်ဖြစ်ကြောင်း သိရသည်။

ပြည်တွင်းအခွန်ဦးစီးဌာန၊ အောင်ဘာလေသိန်းဆုဌာနခွဲမှ ယနေ့ (အောက်တိုဘာလ ၃၁ ရက်) ထုတ် နိုင်ငံပိုင်သတင်းစာများတွင် အထက်ပါကဲ့သို့ အသိပေးကြေညာထားခြင်းဖြစ်သည်။

(၅၆) ကြိမ်မြောက် ကျပ် (၁ဝဝဝ)တန်‌ အောင်ဘာလေသိန်းဆုထီလက်မှတ်များကို “က” အက္ခရာမှ “ဋ” အက္ခရာ အထိ အက္ခရာ (၁၁)လုံးအပေါ်မှ  (၇၅)ရာခိုင်နှုန်းဖြစ်သော ထီစာအုပ်ပေါင်း (၆၂၃၂၉၂) အုပ်ကို ရောင်းချနိုင်ခဲ့ကြောင်း သိရသည်။

ထို့ကြောင့် ထီလက်မှတ်ရောင်းရငွေသည် ကျပ်သန်း (၆၂၃၂ ဒသမ၉၂ဝ) ဖြစ်ပြီး (၇ဝ) ရာခိုင်နှုန်းဖြစ်သည့်  ငွေကျပ် (၄၃၆၃ ဒသမ ဝ၄) သန်း ကို ထီဆုငွေအဖြစ် ချီးမြှင့်သွားမည်ဖြစ်ကြောင်း သိရသည်။

အဆိုပါ (၇ဝ)ရာခိုင်နှုန်းကို ခွဲဝေချီးမြှင့်သွားမည့်အပြင် ဘဏ္ဍာသိမ်းရငွေကျပ်(၂၅ဝ ဒသမ ဝ) သန်းကိုလည်း ထည့်သွင်းချီးမြှင့်ပေးသွားမည်ဖြစ်ကြောင်း သိရသည်။

(၅၆) ကြိမ်မြောက် အောင်ဘာလေသိန်းဆုဖွင့်ပွဲတွင် အမြင့်ဆုံးပေးအပ်ချီးမြှင့်မည့် အထူးဆုသည် ငွေကျပ်သိန်း (၅ဝဝဝ) တစ်ဆု၊ ငွေကျပ်သိန်း(၂ဝဝဝ) တစ်ဆု နှင့် ကျပ်သိန်း(၁ဝဝဝ) တစ်ဆု ဖြစ်ကြောင်း သိရသည်။

ထို့ပြင် (၅၆)ကြိမ်မြောက် အောင်ဘာလေအွန်လိုင်းသိန်းဆုထီဖွင့်ပွဲကို နိုဝင်ဘာလ (၁)ရက်တွင် သီးခြားဖွင့်လှစ် သွားမည်ဖြစ်ပြီး ထီလက်မှတ်များကို အောက်တိုဘာလ(၃ဝ)ရက်၊ ည (၁၁)နာရီ (၅၉)မိနစ်ဝန်းကျင်အထိ ဆက်လက်ရောင်းချသွားမည်ဖြစ်ကြောင်း ထုတ်ပြန်ထားသည်။

အလားတူ အောင်ဘာလေအွန်လိုင်းသိန်းဆုထီလက်မှတ်များ ရောင်းရငွေအပေါ်မှ (၇ဝ)ရာခိုင်နှုန်းအား ဆုမဲအဖြစ် ပြန်လည်ခွဲဝေချီးမြှင့်သွားမည်ဖြစ်သော်လည်း ချီးမြှင့်မည့်ပမာဏကို ဖော်ပြထားခြင်းမရှိပေ။

အဆိုပါအောင်ဘာလေသိန်းဆုထီဖွင့်ပွဲကို လာမည့် (အောက်တိုဘာလ ၁ ရက်)၊ နံနက်(၈)နာရီအချိန်တွင် ကျင်းပသွားမည်ဖြစ်ပြီး အောင်ဘာလေအွန်လိုင်းသိန်းဆုထီဖွင့်ပွဲကို နံနက် (၁ဝ)နာရီအချိန်တွင် ကျင်းပသွားမည်ဖြစ်ကြောင်း သိရသည်