မြူနစ် (NSS) - အောက်တိုဘာ ၃၀

KIA၊ MNDAA၊ TNLA ပူးပေါင်းအဖွဲ့များသည် ရှမ်းပြည်ရှိ လုံခြုံရေးစခန်းများကို အလုံးအရင်းဖြင့် ဝင်တိုက်နေ၍ အပြန်အလှန်တိုက်ခိုက်မှုများ ပြင်းထန်နေကြောင်း နစကမှ အသိပေးထုတ်ပြန်ထားသည်။

နစကသတင်းထုတ်ပြန်ရေးအဖွဲ့က ယနေ့(အောက်တိုဘာလ ၃၀ ရက်)တွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

အောက်တိုဘာလ ၂၇ ရက်မှစတင်၍ KIA၊ MNDAA၊ TNLA ပူးပေါင်းထားသည့် လက်နက် ကိုင်အဖွဲ့အစည်းများသည် ရှမ်းပြည်နယ်(မြောက်ပိုင်း)နှင့် အရှေ့မြောက်ဒေသရှိ လားရှိုး၊ သန္နီ၊ ကွတ်ခိုင်၊ မူဆယ်၊ ကြူကုတ်၊ မုံးကိုး၊ ဖောင်းဆိုင်ဒေသများ၊ ကွမ်းလုံ၊ ချင်းရွှေဟော် နှင့် လောက်ကိုင်စသည့် နယ်စပ်ဒေသများသို့ အင်အားအလုံးအရင်းဖြင့် ဝင်ရောက်၍ နယ်မြေခံတပ်ရင်းဌာနချုပ်နှင့် လုံခြုံရေးစခန်းများကို ပစ်ခတ်တိုက်ခိုက်မှုများ လုပ်ဆောင်နေသည်ဟု နစကမှ ဆိုသည်။

ထို့ပြင် ဒေသခံပြည်သူများကို အကြောင်းမဲ့ ပစ်ခတ်သတ်ဖြတ်ခြင်း၊ နယ်စပ်ကုန်သွယ်ရေးပျက်စီးစေရန် နှင့် လမ်းပန်းဆက်သွယ်မှုပြတ်တောက်စေရေးစသည့် နိုင်ငံတော်ပျက်စီးစေလိုသော ရည်ရွယ်ချက်များဖြင့် အကြမ်းဖက်လုပ်ရပ်များ ဆောင်ရွက်နေသည့်အတွက် ယနေ့အထိ အပြန်အလှန်ထိတွေ့တိုက်ခိုက်မှုများ ပြင်းထန်စွာဖြစ်ပွားနေသည်ဟု နစကမှ သတင်းထုတ်ပြန်ထားသည်။

MNDAA၊ TNLA၊ AA မဟာမိတ်(၃)ဖွဲ့သည် အောက်တိုဘာလ ၂၇ ရက် နံနက်အစောပိုင်းမှစတင်ကာ (၁၀၂၇ စစ်ဆင်ရေး) အမည်ဖြင့် ရှမ်းပြည်နယ်အတွင်းရှိ ချင်းရွှေဟော်၊ လောက်ကိုင်၊ ကွမ်းလုံ၊ ကွတ်ခိုင်၊ သိန္နီ နှင့် လားရှိုး စသည့်မြို့နယ်များ တစ်ဝိုက်တွင် လုံခြုံရေးစခန်းများကို ဝင်ရောက်တိုက်ခိုက်ခဲ့သည်။

အဆိုပါမဟာမိတ်(၃)ဖွဲ့နှင့်အတူ PDF အပါအဝင် အခြားသောလက်နက်ကိုင်အဖွဲ့အစည်းများကလည်း ပူးပေါင်းတိုက်ခိုက်မှုများ ပြုလုပ်လျက်ရှိကြောင်း သိရသည်။

၎င်း (၁၀၂၇ စစ်ဆင်ရေး)ကာလအတွင်း တပ်မတော်၏ လုံခြုံရေးစခန်းများကို မဟာမိတ်(၃)ဖွဲ့က သိမ်းပိုက်ခဲ့သည့် ဖြစ်စဉ်များလည်း ရှိနေသည်ကို တွေ့ရှိရသည်။

ယနေ့(အောက်တိုဘာလ ၃၀ ရက်) နံနက်ပိုင်းတွင်လည်း သိန္နီမြို့နှင့် နမ္မတူမြို့ကို ဆက်သွယ်ထားသည့် အရေးပါသော တံတားတစ်စင်းသည်လည်း လက်နက်ကိုင်အဖွဲ့များ၏ လုပ်ရပ်ကြောင့် ကျိုးကျပျက်စီးမှုရှိခဲ့ကြောင်း သိရသည်။

အဆိုပါတိုက်ပွဲများကြောင့် ဒေသခံပြည်သူများအနေဖြင့် ထွက်ပြေးတိမ်းရှောင်နေရမှုများ ရှိနေသကဲ့သို့ စားရေရိက္ခာအခက်အခဲအပါအဝင် ကုန်ဈေးနှုန်းကြီးမြင့်မှုဒဏ်ကိုပါ ခံစားနေရလျက်ရှိကြောင်း သိရသည်။