မြူနစ် (NSS) - အောက်တိုဘာ ၃၀

ချင်းလက်နက်ကိုင်အဖွဲ့ CNF နှင့် CDF တို့ ထိန်းချုပ်ထားသည့် ထန်တလန်မြို့ကို တပ်မတော်က (၃)လနီးပါး တိုက်ခိုက်ပြီးနောက် ပြန်လည်ထိန်းချုပ်နိုင်ခဲ့ကြောင်း သတင်းရရှိသည်။

ချင်းပြည်နယ်၊ ထန်တလန်မြို့အတွင်းရှိ ဝင်ရောက်နေရာယူထားသည့် ချင်းအမျိုးသားတပ်ဦး CNF နှင့် CDF အဖွဲ့ဝင်များအား တပ်မတော်စစ်ကြောင်းများက အကြမ်းဖက်ချေမှုန်းရေးစစ်ဆင်ရေးကိုဆောင်ရွက်ခဲ့ရာ ယမန်နေ့(အောက်တိုဘာလ ၂၉ ရက်)တွင် ပြန်လည်ထိန်းချုပ်နိုင်ခဲ့ခြင်းဖြစ်ကြောင်း နစကမှ သတင်းထုတ်ပြန်ထားသည်။

CNF နှင့် CDF အဖွဲ့ဝင်များသည် သာလွန်အင်အားဖြင့် ၂၀၂၃ ခုနှစ် ဖေဖော်ဝါရီလမှစ၍ ထန်တလန်မြို့ရှိ တပ်မတော်စစ်ကြောင်းနှင့် ရဲတပ်ဖွဲ့ဝင်များကို အလစ်အငိုက် ဝင်ရောက်တိုက်ခိုက်ကာ မြို့ကိုထိန်းချုပ်သွားခဲ့ခြင်းဖြစ်ကြောင်း သိရသည်။

ထို့ကြောင့် တပ်မတော်စစ်ကြောင်းများအနေဖြင့် သြဂုတ်လမှစတင်ကာ ပထမအဆင့်အနေဖြင့် ဟားခါးမြို့မှ (၄)မိုင်ခန့်ကွာဝေးသော သီးမြစ်ချောင်းကူးတံတား၊ ဒုတိယအဆင့်အနေဖြင့် ထန်တလန်မြို့အဝင်နေရာ၊ တတိယအဆင့်အနေဖြင့် ထန်တလန်မြို့နယ် ပြည်သူ့ဆောက်လုပ်ရေးရုံးနှင့် CB ဘဏ်နေရာ၊ နောက်ဆုံးအဆင့်အနေဖြင့် ထန်တလန်မြို့ဆေးရုံကုန်း နှင့် အထကကျောင်းတို့ကို အဆင့်ဆင့်တိုက်ခိုက်သိမ်းပိုက်ခဲ့ကြောင်း နစကမှ ထုတ်ပြန်ထားသည်။

CNF နှင့် CDF တို့ သိမ်းယူထားသည့် ထန်တလန်မြို့ရှိ လူနေအိမ်များနှင့် အဆောက်အဦးများကို ထိခိုက်မှုအနည်းဆုံးဖြစ်စေရန်အတွက် အဆင့်ဆင့်ခြေကုတ်ရယူကာ စနစ်တကျတိုက်ခိုက်ခဲ့ခြင်းဖြစ်ပြီး ရက်ပေါင်း(၉၀)ခန့်အကြာ ယမန်နေ့(အောက်တိုဘာလ ၂၉ ရက်) တွင် တစ်မြို့လုံးကို အပြီးတိုင် ထိန်းချုပ်နိုင်ခဲ့ကြောင်း နစကမှ သတင်းထုတ်ပြန်ထားသည်။

အဆိုပါတိုက်ပွဲဖြစ်စဉ်များအတွင်း CNF နှင့် CDF လက်နက်ကိုင်အဖွဲ့များအနေဖြင့် ဘာသာရေးဆိုင်ရာအဆောက်အဦးများ၊ စာသင်ကျောင်းများ၊ ဆေးရုံ နှင့် ဌာနဆိုင်ရာအဆောက်အဦးများတွင် အုတ်များစီကာ ဘန်ကာသဖွယ်ပြုလုပ်မှုများရှိခဲ့ကြောင်း နစကမှ အသိပေးထားသည်။

ထို့ပြင် ၎င်းတိုက်ပွဲများအတွင်း တပ်မတော်လုံခြုံရေးအဖွဲ့ဝင်အချို့ ထိခိုက်သေဆုံးမှုရှိခဲ့ကြောင်းသိရပြီး CNF နှင့် CDF ထံမှ လက်နက်ခဲယမ်းများနှင့်အတူ ရုပ်အလောင်းအချို့ကိုလည်း သိမ်းဆည်းရရှိခဲ့သည်ဟု သတင်းထုတ်ပြန်ထားသည်။

လက်ရှိတွင် ထန်တလန်မြို့မှ နေရပ်စွန့်ခွာသွားသော ဒေသခံပြည်သူများ ပြန်လည်ဝင်ရောက်နေထိုင်နိုင်ရေးနှင့် အပျက်အစီးများကို ဖယ်ရှားကာ ထန်တလန်မြို့ ပြန်လည်ထူ ထောင်ရေးလုပ်ငန်းများကို ဒေသခံပြည်သူများနှင့်အတူ အမြန်ဆုံးဆက်လက်ဆောင်ရွက်နိုင်ရေး စီစဉ်နေကြောင်း နစကမှ သတင်းထုတ်ပြန်ထားသည်။