NSS - အောက်တိုဘာ ၂၈

ပြည်ပအလုပ်အကိုင်ရှာဖွေရေး အေဂျင်စီလိုင်စင်အာမခံကြေးများ တိုးမြှင့်ကောက်ခံမည့်အစီ အစဉ်အား လက်ရှိဈေးကွက်အခြေအနေအရ လျှော့ချပေးရန် အလုပ်သမားဝန်ကြီးဌာနသို့ပြန်လည်တင်ပြထားကြောင်း ပြည်ပအလုပ်အကိုင်၀န်ဆောင်မှုလုပ်ငန်းရှင်များအဖွဲ့ချုပ်မှ သိရသည်။

ထို့ကြောင့် ပြည်ပအလုပ်အကိုင် အကျိုးဆောင်လိုင်စင်အာမခံကြေးကို အလုပ်သမား၀န်ကြီးဌာနမှ ပြောင်းလဲတိုးမြှင့်ကောက်ခံမည့် နှုန်းထားအား သုံးဆခန့်မတိုးဘဲ တစ်ဆခန့်သာ တိုးမြှင့်သတ်မှတ်ပေးရန် မြန်မာနိုင်ငံ ပြည်ပအလုပ်အကိုင်၀န်ဆောင်မှုလုပ်ငန်းရှင်များအဖွဲ့ချုပ် (MOEAF) က တင်ပြထားကြောင်း သိရသည်။။ 

ပြည်ပသို့ အလုပ်သမားပို့ဆောင်ပေးနေသည့် လိုင်စင်ရ အေဂျင်စီများကို ယခင်ပေးသွင်းရသော အာမခံကြေး ငွေကျပ် သိန်း ၂၅၀ အစား ငွေကျပ်သိန်း တစ်ထောင်၊  ပြည်ပအလုပ် အကိုင် အကျိုးဆောင် (ထိုင်းနိုင်ငံသီးသန့်) လိုင်စင် အာမခံကြေးကို ယခင်က ငွေကျပ်သိန်း ၅၀ အစား ငွေကျပ်သိန်း ၂၀၀ ပြင်ဆင်သတ်မှတ်နိုင်ရန် ၀န်ကြီးဌာနမှ MOEAF ထံသို့ သဘောထားတောင်းခံခဲ့ခြင်းဖြစ်သည်။ 

"လိုင်စင်ရအေဂျင်စီက စာရင်းသာတိုးလာတာ။ ဈေးကွက်အခြေအနေက ၀န်ကြီးဌာနရဲ့ နိုင်ငံအလိုက်သတ်မှတ်ထားတဲ့ အလုပ်သမားဦးရေ ပြည့်မီအောင် မပို့နိုင်တဲ့အေဂျင်စီတွေလည်း ရှိနေသေးတယ်။ ဆိုတော့ ၂၅၀ ကနေ တစ်ထောင် သတ်မှတ်မယ့်အစား ငါးရာလောက်ပေါ့။ ထိုင်းကိုဆိုရင်လည်း နှစ်ရာလောက် မဟုတ်ဘဲနဲ့ တစ်ရာလောက် ပြန်လည်လျော့ပေါ့သတ်မှတ်ပေးဖို့ တင်ပြထားပါတယ်။ အေဂျင်စီအားလုံးရဲ့ သဘောဆန္ဒကို တောင်းခံပြီး ၀န်ကြီးဌာနဘက်ကို ပြန်ညှိထားတဲ့ အနေအထားပေါ့"ဟု MOEAF ၏ ဥက္ကဋ္ဌ ဦးမင်းလှိုင်က ပြောသည်။

MOEAF ၏သဘောထားအား ၂၀၂၃ ခုနှစ် အောက်တိုဘာလ ၂၁ ရက်က သက်ဆိုင်ရာ၀န်ကြီးဌာနသို့ ပေးပို့တင်ပြထားပြီး ၀န်ကြီးဌာနဘက်မှ အကြောင်းပြန်ကြားထားခြင်း မရှိသေးကြောင်း သိရသည်။

လက်ရှိတွင် ပြည်ပအလုပ်အကိုင်အကျိုးဆောင်လိုင်စင်ရ အေဂျင်စီ ၄၆၇ ခုရှိပြီး ထိုင်းနိုင်ငံအလုပ်အကိုင်သီးသန့်လိုင်စင်ရ အေဂျင်စီ ၁၅၀ ရှိကြောင်း  အလုပ်သမား၀န်ကြီးဌာန၏ စာရင်းများအရသိရသည်။