NSS  - အောက်တိုဘာ ၂၇

EV ကားတင်သွင်းခွင့်ရရှိရန် သင်္ဘောသား နှင့် ပြည်ပရောက်နိုင်ငံသားများ၏ လွှဲပို့ငွေပမာဏ ကို ယခင် အမေရိကန်ဒေါ်လာနှစ်သိန်းအစား အမေရိကန်ဒေါ်လာငါးသောင်းသို့  ပြောင်းလဲသတ်မှတ်လိုက်ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ သိရသည်။

ပြည်ပ၌ အလုပ်လုပ်ကိုင်နေကြသည့် မြန်မာနိုင်ငံသားများသည် မိမိတို့ရရှိသည့် လစာငွေ (သို့မဟုတ်) အခြားဝင်ငွေများကို ဘဏ်လမ်းကြောင်းမှတစ်ဆင့် မြန်မာနိုင်ငံသို့ ပြန်လည်လွှဲပို့ခြင်းအပေါ် အထူးအစီအစဉ်အဖြစ် လျှပ်စစ်သုံးမော်တော်ယာဉ်/ မော်တော်ဆိုင်ကယ် တင်သွင်းခွင့်ပါမစ်ထုတ်ပေးမည်ဟု စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက ကြေညာထားခဲ့သည်။

ပြီးခဲ့သည့် ၂ဝ၂၃ ခုနှစ် အောက်တိုဘာလ ၁၃ ရက်က ထုတ်ပြန်ထားသည့်ကြေညာချက်တွင် သင်္ဘောသားနှင့်ပုံမှန်လစာရရှိသူများအား တစ်နှစ်အတွင်း အမေရိကန်ဒေါ်လာနှစ်သိန်းနှင့်အထက် တရားဝင်ဘဏ်မှတစ်ဆင့်ငွေလွှဲပါက လျှပ်စစ်သုံးမော်တော်ယာဉ်/ မော်တော်ဆိုင် ကယ် တင်သွင်းခွင့်ပါမစ်ထုတ်ပေးမည်ဟု ဖော်ပြထားသည်။

ယခုအခါ လျှပ်စစ်သုံးယာဉ်များ အသုံးပြုမှုပိုမိုတိုးတက်ရန်ရည်ရွယ်ပြီး အောက်တိုဘာလ ၂၆ ရက်တွင် လွှဲပို့ငွေပမာဏကို အမေရိကန်ဒေါ်လာ နှစ်သိန်းအစား အမေရိကန်ဒေါ်လာငါးသောင်းနှင့်အထက် ငွေလွှဲပမာဏ၏ ငါးရာခိုင်းနှုန်းတန်ဖိုးနှင့်ညီသော လျှပ်စစ်သုံးမော် တော်ယာဉ်/ မော်တော်ဆိုင်ကယ် တစ်နှစ်လျှင် တစ်စီးနှုန်း တင်သွင်းခွင့်ပေးမည်ဟု ပြင်ဆင်ခဲ့ခြင်းဖြစ်သည်။

“စက်ချုပ်တို့ ကပ္ပတိန်တို့ အရာရှိတွေဆိုရင်တော့ ဒေါ်လာငါးသောင်း ကျော်လွှဲနိုင်မှာပါ။ သာမန်သင်္ဘောသားတွေကတော့ လစာသုံးလေးထောင်နဲ့ ဒေါ်လာငါးသောင်းပြည့်အောင် ငွေလွှဲဖို့မလွယ်ဘူး။ ငွေလွှဲပြီးရင် အခွန်ဆောင်ရဦးမှာဆိုတော့ ကားဝယ်ရင်အခွန်ကင်းလွတ် ခွင့်ပေးဖို့လည်း တစ်ခါတည်းကြေညာသင့်တယ်”ဟု တာမွေမြို့နယ်တွင်နေထိုင်သည့် သင်္ဘောသား တစ်ဦးကပြောသည်။

အမေရိကန်ဒေါ်လာ ၅ သောင်းနှင့်အထက် လွှဲပို့သူများသည် တစ်ဦးချင်းတင်သွင်းမှုအတွက် လွှဲပို့ငွေ၏ ၅ ရာခိုင်နှုန်းသည် ယာဉ်တန်ဖိုးမပြည့်မီပါက ငွေလွှဲပို့သူ နှစ်ဦး (သို့မဟုတ်) သုံးဦးစပ်စသဖြင့် စုပေါင်းတင်သွင်းမှုကိုလည်း ပါမစ်ခွင့်ပြုပေးသွားမည်ဖြစ်ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက ထုတ်ပြန်ထားသည်။

လျှပ်စစ်သုံးမော်တော်ယာဉ်/ လျှပ်စစ်သုံးဆိုင်ကယ် ဝယ်ယူတင်သွင်းခွင့်ပြုသည့်အစီအစဉ်ကို အောက်တိုဘာလ ၁၆ ရက်မှစတင်ကာ ခွင့်ပြုပေးခဲ့ခြင်းဖြစ်သည်။