စော (NSS) - အောက်တိုဘာ ၂၃

မနက်ဖြန်(အောက်တိုဘာလ ၂၄ ရက်)မှစ၍ သတ်မှတ်ထားသည့် Taxi Board များကို ရန်ကုန်စီးတီးတက္ကစီအသင်း (YCTA)မှ ဖြန့်ဖြူးရောင်းချပေးသွားမည်ဖြစ်ကြောင်း YCTA မှ အတွင်းရေးမှူး ဦးသက်ခိုင်ဝင်းက ပြောကြားခဲ့သည်။

YCTA ၏ အတွင်းရေးမှူး ဦးသက်ခိုင်ဝင်းက ယနေ့(အောက်တိုဘာလ ၂၃ရက်)တွင် ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေး ကြီးကြပ်မှုကော်မတီ (YRTC) ရုံးချုပ်၌ ကျင်းပသော သတင်းစာရှင်းလင်းပွဲ၌ အထက်ပါကဲ့သို့ပြောကြားခဲ့ခြင်းဖြစ်သည်။

 အဆိုပါ Taxi Board များကို မနက်ဖြန်(အောက်တိုဘာလ ၂၄ ရက်)တွင် YCTA ရုံးချုပ်တွင် စတင်ဖြန့်ဖြူးရောင်းချသွားမည်ဖြစ်ကြောင်း သိရသည်။

“Taxi Board တွေနဲ့ ပတ်သက်လို့ သတ်မှတ်ထားတဲ့ အရွယ်အစားအတိုင်း အသင်းရုံးကနေ မနက်ဖြန် (အောက်တိုဘာလ ၂၄ရက်)ကနေစတင်ပြီးတော့ လုံလောက်စွာနဲ့ ဖြန့်ဖြူးပေးသွားမှာပါ”ဟု ဦးသက်ခိုင်ဝင်းက ပြောကြားခဲ့သည်။

အဆိုပါ Taxi Board များကို သတ်မှတ်ဈေးနှုန်း (၁၂၀၀၀)ကျပ်ဖြင့် ရောင်းချသွားမည်ဖြစ် ကြောင်း သိရသည်။

သို့သော် ရန်ကုန်စီးတီးတက္ကစီအသင်းတွင် အသင်းဝင်ထားသည့် Taxi ယာဉ်များကို ငွေကျပ် (၁၀၀၀၀)ဖြင့် ရောင်းချသွားမည်ဖြစ်ပြီး ပြင်ပ Taxi ယာဉ်များအား ငွေကျပ် (၁၂၀၀၀)ဖြင့် ရောင်းချသွားမည်ဖြစ်ကြောင်း သိရသည်။

“အသင်းက တာဝန်ယူပြီး ရောင်းချမှာဖြစ်တဲ့အတွက် ဆိုဒ်မတူတာ၊ quality မတူတာ မရှိပါဘူး။ ဒီ Board များနဲ့ပတ်သက်လို့ ဥပဒေအတိုင်းလုပ်ထားမို့ ဘာမှစိုးရိမ်စရာမရှိပါဘူး”ဟု ၎င်းက ဆက်လက်ပြောကြားထားသည်။

၎င်း Taxi Board များသည် Taxi စာသားကို မြင်စေရန်အတွက် အောက်ခံ အဖြူရောင် မီးအိမ်ကို တပ်ဆင်ရမည်ဖြစ်ပြီး  အောက်ခြေအလျား (၁၀)လက်မ၊ အပေါ်အလျား (၉)လက်မ၊ အောက်ခြေအကျယ် (၅)လက်မ၊ အပေါ်အကျယ် (၂)လက်မနှင့် အမြင့် (၃)လက်မ သတ်မှတ်ထားကြောင်း သိရသည်။

အဆိုပါသတ်မှတ်ထားသည် Taxi Board များကို ဝယ်ယူလိုသူများအနေဖြင့် မြောက်ဒဂုံမြို့နယ်၊ (၂၉)ရပ်ကွက်၊ အမှတ် (၂၆)၊ ပင်လုံလမ်းမကြီးရှိ YCTA ရုံးတွင် ဝယ်ယူနိုင်ကြောင်း သိရသည်။