မျိုးကြီး (NSS) - အောက်တိုဘာ ၂၂

လာမည့် သီတင်းကျွတ်လပြည့်နေ့မှစ၍ ကျိုက်ထီးရိုးဘုရားသို့ ဘုရားဖူးပြည်သူလာရောက်မှု ပြန်လည်များပြားလာနိုင်ကြောင်း ပေါပကအဖွဲ့ဥက္ကဋ္ဌ ဦးစိုးလှက NSS ကို ပြောသည်။

လွန်ခဲ့သော နှစ်ပိုင်းအတွင်း ကိုဗစ်ကပ်ရောဂါပျံ့ပွားကူးစက်မှုနှင့် နိုင်ငံရေးအခြေအနေများကြောင့် ဘုရားဖူးလာရောက်သူ နည်းပါးခဲ့ကြောင်း သိရသည်။

ဆံတော်ရှင်ကျိုက်ထီးရိုးစေတီတော်မြတ်ကြီး၏ ဗုဒ္ဓပူဇနိယပွဲတော်ကို လာမည့် သီတင်း ကျွတ်လပြည့်နေ့ (အောက်တိုဘာလ ၂၉ ရက်)မှစ၍ ကဆုန်လပြည့်နေ့အထိ အစဉ်အလာမပျက်(၇)လတိုင်တိုင် ကျင်းပသွားမည်ဖြစ်ကြောင်း ဥက္ကဋ္ဌ ဦးစိုးလှက ပြောသည်။

“မကြာခင် ရင်ပြင်တော်မှာ အစဉ်အလာမပျက် သြဝါဒစရိယဆရာတော်များကို ပင့်ဖိတ်ပြီးတော့ စေတီတော်ကို ရေသပ္ပါယ်ခြင်း၊ အမွှေးနံ့သာများ ပက်ဖျန်းခြင်း၊ ဗုဒ္ဓဘိသေကအနေကဇာတင်ခြင်းတို့ကို ဆောင်ရွက်မယ့်အပြင် တောစောင့်နတ်၊ တောင်စောင့်နတ်တွေကိုလည်း ကျွန်တော်တို့ ပွဲများပြန်လည်ဆက်သပြီးတော့ တောင်တော်ကို အပ်မယ့်သဘော ဆောင်ရွက်မယ့် အစီအစဉ်များလည်း ရှိပါတယ်”ဟု ကျိုက်ထီးရိုးဘုရားဂေါပကအဖွဲ့ဥက္ကဋ္ဌ ဦးစိုးလှက ပြောသည်။

ထို့ပြင် ဘုရားဖူးပြည်သူများ သွားရေးလာရေးကိစ္စရပ်များအတွက် ခြေချင်လမ်း၊ မော်တော် ယာဉ်လမ်း၊ cable လိုင်းများ၏ ကြံ့ခိုင်ရေးကို ပြန်လည်စစ်ဆေးထားကာ လက်ရှိတွင်လည်း ခွင့်ပြုပြေးဆွဲပေးလျက်ရှိကြောင်း သိရသည်။

“ကျွန်တော်တို့ဘက်ကတော့ လုံခြုံရေး၊ နေရေးထိုင်ရေးကအစ အားလုံးပြင်ဆင်ထားတယ်။ ကိုဗစ်ကနေစပြီးတော့ နိုင်ငံရေးအခြေအနေအရ ဘုရားဖူးတွေ နည်းခဲ့တာကနေပြီးတော့ အခုပွင့်လင်းရာသီကျရင် မြန်မာပြည်အရပ်ရပ်မှာရှိတဲ့ ဘုရားဖူးတွေ လာတော့မယ့်လို့ မျှော် လင့်ထားပါတယ်”ဟု ဦးစိုးလှက ပြောသည်။

ကျိုက်ထီးရိုးဘုရားသို့ ယခု ၂၀၂၃ ခုနှစ် (၁၀)လတာကာလအတွင်း ပြည်တွင်း၊ ပြည်ပဘုရားဖူးလာရောက်သူဦးရေသည် (၁၇၀၀၀၀)ကျော်ရှိခဲ့ကြောင်း သိရသည်။

လွန်ခဲ့သော ၂၀၂၂ ခုနှစ် အောက်တိုဘာလ ၁၂ ရက်တွင် ကျိုက်ထီးရိုးဘုရား ကင်မွန်းချောင်းတောင်တက်ကားဂိတ်တွင် အကြမ်းဖက်အဖွဲ့၏ နှောက်ယှက်ပစ်ခတ်မှုများကြောင့် ဘုရားဖူးပြည်သူများ သေဆုံးခဲ့မှုနှင့် ထိခိုက်ဒဏ်ရာရရှိမှု ဖြစ်စဉ်များ ဖြစ်ပွားခဲ့ဖူးသည်။

အလားတူ ယနေ့(အောက်တိုဘာလ ၂၂ ရက်)၊ နံနက်ပိုင်း ၅ နာရီအချိန်ခန့်တွင်လည်း အကြမ်းဖက်အဖွဲ့မှ ပစ်ခတ်သည့် လက်နက်ကြီးကျည်အပါအဝင် ကျည်အချို့ ကင်မွန်းချောင်းဧရိယာအတွင်းရှိ ရဲစခန်းအနီးသို့ ကျရောက်ပေါက်ကွဲမှု ဖြစ်ပွားခဲ့ကြောင်း သိရသည်။

“မနက် ၅ နာရီပတ်ဝန်းကျင်လောက်မှာ ကင်မွန်းချောင်းဧရိယာကို အဝေးကနေ ပစ်တာဖြစ်ပါတယ်။ အဝေးကနေပဲ ပစ်ခတ်တာဖြစ်ပါတယ်။ လက်နက်ကြီးလည်း ပါတယ်လို့ သတင်းရပါတယ်။ ကင်မွန်းစခန်း ရဲစခန်းဧရိယာဘက်ကို ပစ်တဲ့သဘောပါ။ အထိအခိုက်တော့ လုံးဝမရှိပါဘူး။ အဆောက်အဦး ထိခိုက်တာတို့၊ လူထိခိုက်တာတို့ လုံးဝမရှိပါဘူး”ဟု လုံခြုံရေးအဖွဲ့နှင့်နီးစပ်သူက NSS ကို ပြောသည်။

အကြမ်းဖက်အဖွဲ့အနေဖြင့် ယင်းကဲ့သို့ ပစ်ခတ်တိုက်ခိုက်ခြင်းသည် ဘုရားဖူးပြည်သူများကို အနှောင့်အယှက်ပေးခြင်းဖြစ်ကြောင်း ယူဆနိုင်သကဲ့သို့ နယ်မြေလုံခြုံရေးကိစ္စရပ်များကိုလည်း နှောက်ယှက်ခြင်းဖြစ်ကြောင်း ၎င်းက ထပ်မံပြောသည်။