ဂျန်ဇက် (NSS) - အောက်တိုဘာ ၂၁

အစ္စရေးနိုင်ငံခြားရေးဝန်ကြီးဌာနက အစ္စရေးနိုင်ငံသားအားလုံးကို ဒေသအတွင်းနိုင်ငံများကို ခရီးမသွားဖို့ နဲ့ ဂျော်ဒန် နဲ့ အီဂျစ်နိုင်ငံတို့ရှိ အစ္စရေးနိုင်ငံသားအားလုံးကိုလည်း နိုင်ငံအတွင်းက အမြန်ဆုံးထွက်ခွာဖို့ အမိန့်ပေးလိုက်ကြောင်းသိရပါတယ်။ 

ဟောလီဝုဒ် ရုပ်ရှင်လောကရဲ့ကျော်ကြားသူတွေဟာ ဟားမက်စ်နဲ့ အစ္စရေးနိုင်ငံကြားဖြစ်ပွားနေတဲ့စစ်ပွဲကိုအမြန်ဆုံးအပစ်ခတ်ရပ်စဲအောင်ဆောင်ရွက်ဖို့ အမေရိကန်သမ္မတ ဂျိုးဘိုင်ဒန်ကို တိုက်တွန်းတောင်းဆိုလိုက်ပါတယ်။ အဆိုပါဟောလီဝုဒ် အဖွဲ့ထုတ်ပြန်တဲ့ စာထဲမှာ ဟားမက်စ်အဖွဲ့က ဖမ်းဆီးထားသူတွေအမြန်ဆုံးပြန်လွှတ်ပေးဖို့၊ ဂါဇာဒေသကို အစ္စရေးရဲ့ဗုံးကြဲတိုက်ခိုက်မှုတွေအဆုံးသတ်ဖို့ အမေရိကန်သမ္မတကြားဝင်ဆောင်ရွက်ဖို့ တောင်းဆိုထားပါတယ်။ 

ကမ္ဘာကျော်တိုက်စစ်မှူးတစ်ဦးဖြစ်တဲ့ ဘန်ဇီမာဟာ ဟားမက်စ်နဲ့ အစ္စရေးတို့ဖြစ်ပွားနေတဲ့စစ်ပွဲမှာ ပါလက်စတိုင်းကို အားပေးထောက်ခံမှုများရှိခဲ့အတွက် ပြင်သစ်အစိုးရရဲ့ဝေဖန်တိုက်ခိုက်မှုများ ရင်ဆိုင်နေရပါတယ်။ ဆော်ဒီအာရေဗျကလပ်မှာကစားနေတဲ့ ပြင်သစ်တိုက်စစ်မှူးဘန်ဇီမာဟာ မွတ်စလင် ညီအကိုများအဖွဲ့ နဲ့ ဆက်နွယ်နေသူဖြစ်ကြောင်းပြင်သစ်ပြည်ထဲရေးဝန်ကြီးကဝေဖန်ခဲ့ပါတယ်။ ဘန်ဇီမာက အမျိုးသမီးနဲ့ကလေးငယ်တွေ မရှိတော့အောင် မမျှတဲ့ ဗုံးကြဲမှုတွေကြား သားကောင်ဖြစ်ရမှုတွေ ထပ်မံဖြစ်နေမယ်ရင်တော့ဂါဇာဒေသခံများအတွက် အားလုံးဆုတောင်းရုံမှ တစ်ပါးအခြားမရှိတော့ကြောင်း လူမှုကွန်ရက်ကတဆင့်ရေးသားခဲ့ပါတယ်။

အစ္စရေးနိုင်ငံအနေနဲ့ ဟားမက်စ်အဖွဲ့ကိုအမြစ်ချေမှုန်းဖို့ မြေပြင်ထိုးစစ်ဆင်မှုအပြီးသတ်လုပ်ဆောင်ပြီးချိန်မှာ ပါလက်စတိုင်းနဲ့ပတ်သက်ပြီး တာဝန်ယူမှု တာဝန်ခံမှုအားလုံးကို စွန့်လွှတ်ရမှာဖြစ်ကြောင်း၊ ပါလက်စတိုင်းနဲ့ အပြန်အလှန်ဆက်ဆံရေးတွေကို အဆက်ဖြတ်ရမှာဖြစ်ကြောင်း၊ ပါလက်စတိုင်းနဲ့ပတ်သက်ပြီး အချိန်အတန်ကြာတာဝန်ယူမှုတွေ ဆက်လက်မလုပ်ဆောင်သင့်တော့ကြောင်း အစ္စရေးကာကွယ်ရေးဝန်ကြီးကထုတ်ဖော်ပြောဆိုလိုက်ပါတယ်။ 

ဟားမက်စ် လက်နက်ကိုင်အဖွဲ့ နဲ့ အစ္စရေးနိုင်ငံကြားစစ်ပွဲဖြစ်ပွားနေချိန်အတွင်းမှာပဲ ကမ္ဘာတဝှမ်းမှာ ပါလက်စတိုင်းလိုလားတဲ့ဆန္ဒပြပွဲများ ဆက်တိုက်ဖြစ်ပေါ်လျက်ရှိနေရာ အောက် တိုဘာလ ၂၁ ရက်ကလည်း သြစတြေးလျနိုင်ငံမှာ ပါလက်စတိုင်းလိုလားတဲ့ ဆန္ဒပြပွဲများဖြစ်ပွားခဲ့ပြီး လူထောင်ချီ ပူးပေါင်းပါဝင်ခဲ့ကြောင်းသိရပါတယ်။ ဆန္ဒပြသူတွေဟာ ဂျူးဆန့်ကျင့်ရေးကြွေးကြော်သံများ အော်ဟစ်ကြွေးကြော်ခဲ့ပါတယ်။ အစ္စရေးရဲ့ လေကြောင်းကနေ တိုက်ခိုက်မှုတွေကြောင့် ဂါဇာကမ်းမြောင်ဒေသရှိ ပါလက်စတိုင်းလူမျိုး ၄၁၀၀ ကျော်သေဆုံးထားကြောင်းသိရပါတယ်။

အီဂျစ်နယ်စပ်ဒေသ ရာဖယ်ကိုဖြတ်သန်းပြီး ဂါဖကမ်းမြောင်ဒေသဘက်ကို လူသားချင်းဆိုင်ရာစာနာမှုအကူညီပစ္စည်းများတင်ဆောင်ထားတဲ့ ကုန်ကားအစီး ၂၀ ကျော်ဝင်ရောက်ခဲ့ကြောင်း ကုလသမဂ္ဂကပြောပါတယ်။ အဆိုပါကုန်ကားအစီး ၂၀ ကျော်ဝင်ရောက်ခြင်းဟာ အစ္စရေးနဲ့ဟားမက်စ်တို့ စစ်ပွဲဖြစ်ပွားခဲ့ပြီးနောက်ပိုင်း ပထမဆုံးအကြိမ်ဖြစ်ကြောင်း၊ လူသားချင်းဆိုင်ရာစာနာမှုအကူညီပစ္စည်းများတင်ဆောင်ထားတဲ့ကားတွေ ဝင်ရောက်ခွင့်ရခြင်းဟာ နောက်ဆုံးမဖြစ်စေဖို့လည်းအရေးကြီးကြောင်း ကုလသမဂ္ဂကပြောပါတယ်။

ဟားမက်စ်နဲ့ အစ္စရေးကြားဖြစ်ပွားနေတဲ့စစ်ပွဲအတွင်း အမေရိကန် နဲ့ ထိုင်းနိုင်ငံသားများအပါအဝင် နိုင်ငံခြားသား အနည်းဆုံး ၂၀၀ ကျော်သေဆုံးထားကြောင်းသိရပါတယ်။ အဆိုပါ စစ်ပွဲနဲ့ပတ်သက်ပြီး အမေရိကန်နိုင်ငံသား ၃၁ ဦးသေဆုံးခဲ့ကာ ၁၃ဦးပျောက်ဆုံးနေသလို ထိုင်းနိုင်ငံသား ၃၀ဦးသေဆုံးကာ ၁၇ဦးပြန်ပေးဆွဲခံထားရကြောင်းသိရပါတယ်။ ဒါ့ပြင် ပြင်သစ်နိုင်ငံသား ၂၈ဦး၊ သေဆုံးကာ ၇ဦးပြန်ပေးဆွဲခံထားရပြီး ရုရှားနိုင်ငံသား ၁၉ဦးသေဆုံးကာ၂ဦးပြန်ပေးဆွဲခံရပြီး ၇ဦးပျောက်ဆုံးနေကြောင်းသိရပါတယ်။ ယူကရိန်း၊ နီပေါ၊ အာဂျင်တီးနား၊ ဗြိတိန်၊ ကနေဒါ၊ သြစတြီးယား၊ တရုတ်၊ ဘရာဇီးတို့အပါအဝင် အနည်းဆုံးနိုင်ငံပေါင်း ၃၀ကျော်က နိုင်ငံသားများ၊ သေဆုံး၊ ပြန်ပေးဆွဲခံရမှု ဒါမှမဟုတ်ပျောက်ဆုံးမှုများရှိနေခဲ့ကြောင်းသိရပါတယ်။