ဂျန်ဇက် (NSS) - အောက်တိုဘာ ၁၈

ပါလက်စတိုင်းဟာ အစ္စရေးရဲ့လူအများအပြားသေဆုံးစေမယ့် မျိုးသုန်းသတ်ဖြတ်မယ့်အန္တရာယ်တွေနဲ့ ရင်ဆိုင်နေရကြောင်း၊ ကုလသမဂ္ဂရဲ့ပါလက်စတိုင်းရေးရာလူအခွင့်အရေးအထူးကိုယ်စားလှယ် က ထုတ်ဖော်ပြောဆိုလိုက်ပါတယ်။ နိုင်ငံတကာအဖွဲ့အစည်းတွေအနေနဲ့ ပါလက်စတိုင်းနဲ့ အစ္စရေးစစ်ပွဲ အမြန်ဆုံးရပ်တန့်အောင်လုပ်ဆောင်ဖို့ လိုအပ်ကြောင်း ကုလသမဂ္ဂရဲ့လူအခွင့်အရေးအထူးကိုယ်စားလှယ်က ပြောပါတယ်။ 

အမေရိကန်အစိုးရဟာ ၎င်းရဲ့နိုင်ငံသားတွေကို လက်ဘနွန်နိုင်ငံကို ခရီးသွားရောက်ခြင်းမျိုးမလုပ်ဖို့ ကြိုတင် သတိပေးချက်ထုတ်ပြန်လိုက်ပါတယ်။ လက်ဘနွန်နိုင်ငံရဲ့လုံခြုံရေးအခြေအနေတွေဟာ ကောင်းမွန်မှုမရှိတဲ့ အတွက် အမေရိကန်နိုင်ငံသားများ ခရီးမသွားသင့်ကြောင်း အမေရိကန်နိုင်ငံခြားရေးဝန်ကြီးဌာနက ဆိုပါတယ်။

လက်ဘနွန်အေခြစိုက်ဟစ်ဘိုလာအုပ်စုဟာ အစ္စရေးနယ်စပ်တွေကို ရော့ကက်ဒုံးကျည်တွေနဲ့ ပစ်ခတ်တိုက်ခိုက်ခဲ့ ပြီးနောက် အစ္စရေးဘက်ကလည်း ပြန်လည်လက်တုံ့ပြန်တိုက်ခိုက်ခဲ့ရာ နှစ်ဖက်တင်းမာမှုအရှိန်မြင့်တက်နေ ပါတယ်။

ဂျော်ဒန် နိုင်ငံခြားရေးဝန်ကြီးဌာနက ဂါဇာကမ်းမြောင်ဒေသရှိ Al-Ahli Baptist ဆေးရုံ တိုက်ခိုက်ခံရပြီးနောက် အမေရိကန်သမ္မတဂျိုးဘိုင်ဒန်၊ ဂျော်ဒန်ဘုရင်၊ အီဂျစ် နဲ့ ပါလက်စတိုင်းအစိုးရအဖွဲ့ခေါင်းဆောင်များ တွေ့ဆုံ ဆွေးနွေးမယ့်အစီအစဉ်ကို ဖျက်သိမ်းလိုက်ကြောင်း သတင်းထုတ်ပြန်လိုက်ပါတယ်။

ဂျိုးဘိုင်ဒန်ဟာ အစ္စရေးနိုင်ငံကို သွားရောက်ပြီးနောက် ဂျော်ဒန်နိုင်ငံမှာ အာရပ်နိုင်ငံအချို့ခေါင်းဆောင်တွေနဲ့ တွေ့ဆုံဆွေးနွေးဖို့ စီစဉ်ခဲ့ကြောင်း ဒါပေမယ့် ဆေးရုံတိုက်ခိုက်ခံရမှုဖြစ်ပွားပြီးချိန်မှာတော့ ဆွေးနွေးမယ့်အစီအစဉ် တွေကို ဖျက်သိမ်းခဲ့ရကြောင်း ဆိုပါတယ်။

ဂျော်ဒန်နိုင်ငံခြားရေးဝန်ကြီးက လက်ရှိအချိန်မှာ တွေ့ဆုံဆွေးနွေးမှုတွေဟာ စစ်ပွဲရပ်တန့်ရေးမျှော်လင့်ချက်များ အတွက် အသုံးဝင်မှာ မဟုတ်တော့ကြောင်း ဆိုပါတယ်။

ဂါဇာဒေသရှိ ဆေးရုံတိုက်ခိုက်ခံရမှုဖြစ်ပွားခဲ့ပြီးနောက် ရုရှားနဲ့ ယူအေအီးနိုင်ငံတို့ဟာ အောက်တိုဘာ ၁၈ ရက်မှာ ကုလသမဂ္ဂလုံခြုံရေးကောင်စီအစည်းအဝေး အရေးပေါ်ခေါ်ယူဖို့ တိုက်တွန်းတောင်းဆိုလိုက်ကြောင်း ကုလသမဂ္ဂဆိုင်ရာရုရှားသံအမတ်ကြီးက ပြောပါတယ်။ ဂါဇာဆေးရုံကို အစ္စရေးရဲ့လေကြောင်း တိုက်ခိုက်မှုတွေ ကြောင့် အနည်းဆုံးလူပေါင်း ၅ဝဝ ကျော် သေဆုံးခဲ့ပြီး လူနာတွေနဲ့ နေရာစွန့်ခွာထွက်ပြေးနေသူတွေ အခက်အခဲ များစွာဖြစ်ခဲ့ရကြောင်း ပါလက်စတိုင်းအာဏာပိုင်တွေက ပြောပါတယ်။

ရုရှားသမ္မတဟောင်းမက်ဗီဒက်က် ဂါဇာဒေသရှိ ဆေးရုံတိုက်ခိုက်ခံရခြင်းဟာ စစ်ရာဇဝတ်မှုကျူးလွန်ခြင်းဖြစ်ပြီး စစ်ပွဲနဲ့ပတ်သက်ပြီး အမေရိကန်နိုင်ငံမှာ တာဝန်အရှိဆုံးဖြစ်တယ်လို့ ဝေဖန်လိုက်ပါတယ်။

မတူညီတဲ့နိုင်ငံတွေမှာဖြစ်ပွားနေတဲ့စစ်ပွဲတွေဟာ စစ်ပွဲကြောင့်အကျိုးအမြတ်များစွာရရှိနေတဲ့နိုင်ငံတွေမှာ တာဝန်အရှိဆုံးဖြစ်ကြောင်း၊ အထူးသဖြင့် အမေရိကန်နိုင်ငံမှာ တာဝန်အရှိဆုံးဖြစ်ကြောင်း ရုရှားသမ္မတဟောင်းက ပြောပါတယ်။