ဂျန်ဇက် (NSS) - အောက်တိုဘာ ၁၆ 

ဂါဇာဒေသကို ဝင်ရောက်ဖို့စောင့်ဆိုင်းနေတဲ့ အကူအညီပေးရေး ကုန်ကားအစီးရေ ၁ဝဝ နီးပါးဟာ ရာဖာနယ်စပ်ဒေသကို အောက်တိုဘာ ၁၆ ရက်နေ့မှာ ဖြတ်သန်းသွားခဲ့ပြီး၊ ဂါဇာဒေသရှိ လူသားချင်းဆိုင်ရာစာနာမှုအကူအညီများပေးသွားမှာဖြစ်တယ်လို့ သိရပါတယ်။ အစ္စရေးဟာ အဆိုပါအကူအညီပေးရေးပစ္စည်းတွေ တင်ဆောင်လာတဲ့ ကုန်ကားတွေကို ဂါဇာဒေသတောင်ပိုင်းကို သွားရောက်ဖို့ တားဆီးခဲ့ပေမယ့် နောက်ပိုင်းမှာ ခွင့်ပြုပေးခဲ့ကြောင်း သိရပါတယ်။

ဂါဇာဒေသကို အစ္စရေးရဲ့လေကြောင်းတိုက်ခိုက်မှုကြောင့် သေဆုံးသူအရေအတွက် ပိုမိုမြင့်တက်လာခဲ့ပြီး အောက်တိုဘာ ၁၆ ရက်အထိ ပါလက်စတိုင်း ၂၇၅ဝ ဦးသေဆုံးကာ ၉၇ဝဝ ကျော်ဒဏ်ရာရခဲ့ကြောင်း ပါလက်စတိုင်းကျန်းမာရေးဝန်ကြီးက ပြောပါတယ်။ ပါလက်စတိုင်းလက်နက်ကိုင်အဖွဲ့ဟာ အောက်တိုဘာ ၇ ရက်က အစ္စရေးကို ကြိုတင်သတိပေးချက်မရှိဘဲတိုက်ခိုက်ခဲ့ရာ အစ္စရေးက ဟားမက်စ် အဖွဲ့တွေရဲ့ ဂါဇာဒေသကို ဗုံးကြဲတိုက်ခိုက်ခဲ့ကြောင်း သိရပါတယ်။ 

အစ္စရေးနိုင်ငံအနေနဲ့ ကမ္ဘာကျော်အကြမ်းဖက်အဖွဲ့အစည်းဖြစ်တဲ့  ISIS လိုမျိုး တိုက်ခိုက်ခဲ့တဲ့ ဟားမက်စ် လက်နက်ကိုင်အဖွဲ့ရဲ့တိုက်ခိုက်မှုတွေကိုတုံ့ပြန်ကာကွယ်ဖို့ အခွင့်အရေးရှိကြောင်း အမေရိကန် နိုင်ငံခြားရေးဝန်ကြီးဖြစ်သလို ဂျူးလူမျိုးလည်းဖြစ်တဲ့ အန်တိုနီဘလီကန်က ထုတ်ဖော်ပြောဆိုလိုက်ပါ တယ်။ ဟားမက်စ်လက်နက်ကိုင်အဖွဲ့ရဲ့လုပ်ရပ်တွေဟာ  ISIS အဖွဲ့နဲ့ အလားသဏ္ဍာန်တူညီကြောင်း၊ အဲဒီအတွက် အရပ်သားတွေ ထိခိုက်မှုမရှိအောင် ဟားမက်စ်အဖွဲ့တွေကို တိုက်ခိုက်ရမှာဖြစ်ကြောင်း အန်တိုနီဘလီကန်က ပြောပါတယ်။ 

ပြင်သစ်သမ္မတမက်ခရွန်က အစ္စရေးနဲ့ ဟားမက်စ်လက်နက်ကိုင်အဖွဲ့ကြားဖြစ်ပွားနေတဲ့ စစ်ပွဲပဋိပက္ခ တွေကို အရှိန်ပိုမြင့်လာအောင်မလုပ်ဖို့ အီရန်သမ္မတကို သတိပေးပြောဆိုလိုက်ကြောင်း သိရပါတယ်။ အီရန်သမ္မတဟာ အစ္စရေးနဲ့ ဟားမက်စ်လက်နက်ကိုင်အဖွဲ့ကြားဖြစ်ပွားနေတဲ့စစ်ပွဲနဲ့ပတ်သက်ပြီး ဟားမက်စ်အဖွဲ့ထိန်းချုပ်ထားတဲ့ဂါဇာဒေသကို အစ္စရေးက ဗုံးကြဲတိုက်ခိုက်နေခြင်းကို စိတ်ဆိုးဒေါသ ဖြစ်နေကာ အာရပ်နိုင်ငံတွေ စုစည်းညီညွှတ်ဖို့ မကြာသေးမီက တောင်းဆိုခဲ့ဖူးပါတယ်။

ကုလသမဂ္ဂအတွင်းရေးမှူးချုပ် အန်တိုနီဂူတာရက်စ်ဟာ ဟားမက်စ်အဖွဲ့ကို ၄င်းတို့ဖမ်းဆီးထားတဲ့သူတွေ ကို အမြန်ဆုံးပြန်လွှတ်ပေးဖို့ နဲ့ ဂါဇာဒေသကိုလည်း လူသားချင်းဆိုင်ရာစာနာမှုအကူအညီများ ပေးပို့ခွင့် ပေးဖို့ အစ္စရေးနိုင်ငံကို တိုက်တွန်းတောင်းဆိုလိုက်ပါတယ်။ ဟားမက်စ်နဲ့ အစ္စရေးကြား ဖြစ်ပွားနေတဲ့ စစ်ပွဲက အရှေ့အလယ်ပိုင်းဒေသကို ချောက်ထဲကျခါနီးအခြေအနေမျိုးကို တွန်းပို့နေကြောင်း ဂူတာရက်စ် က သတိပေးခဲ့ပါတယ်။