ဂျန်ဇက် (NSS) - အောက်တိုဘာ ၁၆

ပါလက်စတိုင်းခေါင်းဆောင် မာမွတ်အာဘတ်က ဟားမက်စ်အဖွဲ့လုပ်ဆောင်နေတဲ့ လုပ်ရပ်တွေနဲ့ မူဝါဒတွေဟာ ပါလက်စတိုင်းပြည်သူအားလုံးကို ကိုယ်စားမပြုကြောင်းထုတ်ဖော်ပြောဆိုလိုက်ပါတယ်။ ပါလက်စတိုင်းလွတ်မြောက်ရေးအဖွဲ့အစည်းဟာ ပါလက်စတိုင်းပြည်သူတွေအတွက် တရားဝင်ကိုယ်စားပြုခွင့်ရှိတဲ့ အဖွဲ့အစည်းဖြစ်ကြောင်း ၎င်းကပြောပါတယ်။ 

အမေရိကန်နိုင်ငံသားတစ်ဦးဟာ အစ္စရေးနဲ့ဟားမက်စ်ကြားဖြစ်ပွားနေတဲ့စစ်ပွဲနဲ့ပတ်သက်ပြီး အမုန်းတရားကြီးမြင့်လာမှုကြောင့် အသက် ၆ နှစ်အရွယ်ရှိ မွတ်စလင်တစ်ဦးကို သတ်ဖြတ်ခဲ့ကြောင်း သိရပါတယ်။ ရဲတပ်ဖွဲ့ဟာ အသက် ၇၁ နှစ်အရွယ်ရှိ ချီကာဂိုမြို့မှာနေထိုင်နေသူကို စွဲချက်တင်ခဲ့ကြောင်း၊ အဆိုပါအမေရိကန်နိုင်ငံသားရဲ့တိုက်ခိုက်မှုကြောင့် အသက် ၃၂ နှစ်အရွယ်ရှိ အမျိုးသမီးလည်း ဒဏ်ရာရခဲ့ကြောင်းသိရပါတယ်။ 

အစ္စရေးနဲ့ ဟားမက်စ်အဖွဲ့ကြားဖြစ်ပွားနေတဲ့ စစ်ပွဲအတွင်း အစ္စရေးနိုင်ငံရှိ ထိုင်းနိုင်ငံသား (၄) ဦးထပ်မံသေဆုံးခဲ့ရာ စစ်ပွဲအတွင်း ထိုင်းနိုင်ငံသားသေဆုံးသူအရေအတွက် (၂၈)ဦးအထိ မြင့်တက်လာတယ်လို့ သိရပါတယ်။ စစ်ပွဲအတွင်း ထိုင်းနိုင်ငံသားအနည်းဆုံး (၁၇)ဦး ပြန်ပေးဆွဲခံထားရပြီး (၁၆)ဦးဒဏ်ရာရရှိထားကာ ထိုင်းနိုင်ငံသားများအနက် ထိုင်းနိုင်ငံသား (၇၅၄၀)ဦးက မိခင်နိုင်ငံသို့ ပြန်လည်လာရောက်ဖို့ စာရင်းပေးထားတယ်လို့ ထိုင်းအစိုးရတာဝန်ရှိသူများကပြောပါတယ်။ 

ဂါဖာဒေသရှိဆေးရုံတွေရဲ့ ဆရာဝန်တွေက ဆေးရုံတွေမှာ လောင်စာဆီနဲ့အခြေခံဆေးဘက်ဆိုင်ရာပစ္စည်းများ ကုန်ခန်းခါနီးနေတဲ့အတွက် ဒဏ်ရာရနေသူတွေကို မကုသနိုင်ဘူးဆိုရင် သေဆုံးမှု ပိုမိုမြင့်တက်လာဖွယ်ရှိနေကြောင်းပြောပါတယ်။ အစ္စရေးဟာ ဟားမက်စ်အဖွဲ့ကို လေကြောင်းက တိုက်ခိုက်မှုနဲ့အတူ ဂါဇာကမ်းမြောင်ဒေသကို ရေ၊ မီး၊ အစားအစာနဲ့ ဆေးဝါးများမရရှိအောင် ပိတ်ဆို့ထားကြောင်းသိရပါတယ်။ 

အမေရိကန်သမ္မတ ဂျိုးဘိုင်ဒန်က အစ္စရေးဟာ စစ်ပွဲစည်းကမ်း၊ စည်းမျဉ်းများအတိုင်းပြုမှုဆောင်ရွက်မယ်လို့ ယုံကြည်ကြောင်း၊ အမေရိကန်တပ်ဖွဲ့တွေကို စစ်ပွဲထဲစေလွှတ်ဖို့ မလိုအပ်သေးကြောင်းပြောပါတယ်။ အရှေ့အလယ်ပိုင်းဒေသမှာမတည်ငြိမ်မှုတွေ ပိုမိုဖြစ်လာမယ်ဆိုရင် အမေရိကန်နိုင်ငံအပေါ် အကြမ်းဖက်မှုတွေပိုမိုခြိမ်းခြောက်တာမျိုးတွေရှိလာနိုင်ခြင်းကိုသတိပြုမိကြောင်း အမေရိကန်သမ္မတကပြောပါတယ်။