ဂျန်ဇက် (NSS) - အောက်တိုဘာ ၁၃

ဂါဇာဒေသကို အစ္စရေးအဖွဲ့ရဲ့လေကြောင်းကနေ ဗုံးကြဲတိုက်ခိုက်မှုတွေကြောင့် နိုင်ငံခြားသားများ အပါအဝင် ပြန်ပေးဆွဲထားသူ ၁၃ ဦး သေဆုံးခဲ့ကြောင်း ဟားမက်စ်အဖွဲ့က ပြောပါတယ်။ 

ဟားမက်စ်အဖွဲ့ဟာ အောက်တိုဘာ ၇ ရက်က အစ္စရေးနိုင်ငံကိုတိုက်ခိုက်ပြီးနောက် အစ္စရေးစစ်သားတွေ အပါအဝင် လူပေါင်း ၂ဝဝ နီးပါးကို ဂါဇာဒေသကို ဖမ်းဆီးခေါ်ဆောင်ခဲ့ကြောင်း သိရပါတယ်။ အစ္စရေးစစ်တပ်ကတော့ ဟားမက်စ်အဖွဲ့ရဲ့ ဖမ်းဆီးခံထားရသူတွေထဲမှာ အစ္စရေးနိုင်ငံသား ၉၇ ဦး ပါဝင်ကြောင်း ပြောပါတယ်။ 

ဟားမက်စ်အပေါ် လက်တုံ့ပြန်မှုအဖြစ် အစ္စရေးရဲ့ဗုံးကြဲတိုက်ခိုက်မှုတွေကြောင့် ပါလက်စတိုင်းနိုင်ငံသားများ နေရပ်စွန့်ခွာထွက်ပြေးမှု ပိုမိုများပြားလာနိုင်ကြောင်း၊ အဆိုပါစစ်ပွဲဟာ အိမ်နီးချင်းနိုင်ငံတွေကို ပျံ့နှံ့လာမယ်ဆိုရင် နေရပ်စွန့်ခွာတဲ့ဒုက္ခသည်အရေအတွက် ပိုမိုများပြားလာနိုင်ကြောင်း ဂျော်ဒန်ဘုရင်က ပြောပါတယ်။ 

ဂါဇာဒေသအပေါ် အစ္စရေးရဲ့မြေပြင်ထိုးစစ်ဆင်နွဲမှုတွေဟာ အရပ်သားများ ထိခိုက်ဆုံးရှုံးမှု ပိုမိုဖြစ်လာနိုင်ဖွယ်ရှိနေကြောင်း ရုရှား သမ္မတပူတင်က သတိပေးလိုက်ပါတယ်။ အစ္စရေးဟာ ဟားမက်စ်အဖွဲ့တွေကို မြေပြင်ထိုးစစ်ဆင်နွှဲဖို့ ဂါဇာဒေသရှိ လူပေါင်း ၁ သန်းကို ၂၄ နာရီအတွင်း ထွက်ခွာဖို့ အမိန့်ပေးထားကြောင်း သိရပါတယ်။ ရုရှားသမ္မတပူတင်က အစ္စရေးနဲ့ ဟားမက်စ်ကြားဖြစ်နေတဲ့စစ်ရေးပဋိပက္ခတွေကို ငြိမ်းချမ်းစာဖြေရှင်းရမှာဖြစ်ပြီး ရုရှားနိုင်ငံ အနေ နဲ့ နိုင်ငံနှစ်နိုင်ငံဖြစ်ရေး ဆုံးဖြတ်ချက်ကိုထောက်ခံကြောင်း ပြောပါတယ်။ 

ဟားမက်စ်အဖွဲ့က ဂါဇာကမ်းမြောင်ဒေသရှိ အရပ်သားတွေအပေါ် အစ္စရေးရဲ့ဗုံးကြဲတိုက်ခိုက်မှုတွေကို လက်တုံ့ပြန်မှုအဖြစ် အစ္စရေးနိုင်ငံ Ashkelon မြို့ကို ရော့ကက်ဒုံးကျည် ၁၅ဝ နဲ့ ပစ်ခတ်တိုက်ခိုက်ခဲ့ကြောင်း သတင်းထုတ်ပြန်လိုက်ပါတယ်။ ဟားမက်စ်အဖွဲ့က အစ္စရေးရဲ့မြေပြင်ထိုးစစ်ဆင်နွှဲမှုကို စိုးရိမ်ကြောက်ရွှံ့မှုမရှိကြောင်း နဲ့ အစ္စရေးဆန့်ကျင်ရေးဆန္ဒပြပွဲတွေလုပ်ဖို့ တိုက်တွန်းတောင်းဆိုထားကြောင်း သိရပါတယ်။ 

အစ္စရေးနိုင်ငံရှိ ဗီယက်နမ်သံရုံးက ဂါဇာကမ်းမြောင်ဒေသမှာ စိုက်ပျိုးရေးနဲ့ပတ်သက်ပြီး လေ့ကျင့်သင်ကြားနေတဲ့ ဗီယက်နမ်နိုင်ငံသား ၁၅ ဦးကို ဘေးလွှတ်ရာကို ရွှေ့ပြောင်းပေးထားကြောင်း သတင်းထုတ်ပြန်ထားပါတယ်။ အစ္စရေးနိုင်ငံရဲ့ နိုင်ငံတကာစိုက်ပျိုးရေးသင်ကြားရေးစင်တာမှာ ဗီယက်နမ်နိုင်ငံသား ၁ဝဝ ကျော် တက်ရောက်လေ့လာနေပြီး အဲဒီဗီယက်နမ်နိုင်ငံသားတွေထဲက ၁၅ ဦးက ပဋိပက္ခဖြစ်ပွားရာနေရာနဲ့ နီးကပ်တဲ့ ဆရီဒေါ့မြို့ အနီးမှာ နေထိုင်ကြောင်း သိရပါတယ်။