ဂျန်ဇက် (NSS) - အောက်တိုဘာ ၁၃ 

ရုရှားနိုင်ငံအပေါ်ပြုလုပ်တဲ့ ယူကရိန်းရဲ့တန်ပြန်ထိုးစစ်ဆင်မှုတွေဟာ အောင်မြင်မှုမရခဲ့ကြောင်း၊ အစ္စရေးနဲ့ ပါလက်စတိုင်းကြားဖြစ်ပွားနေတဲ့ စစ်ရေးပဋိပက္ခတွေဟာ ယူကရိန်းနိုင်ငံအပေါ်ပြုလုပ်နေတဲ့ အမေရိကန် ဦးဆောင်တဲ့အနောက်အုပ်စုတွေရဲ့ကူညီထောက်ပံ့ပေးမှုတွေအပေါ် သက်ရောက်မှုများဖြစ်လာနိုင်ကြောင်း ယူကရိန်းထောက်လှမ်းရေးအဖွဲ့အကြီးအကဲ ကီရယ်ဘူဒါနောဗ့်က ပြောပါတယ်။

၎င်းက ရုရှားအပေါ်ပြုလုပ်ခဲ့တဲ့ တန်ပြန်ထိုးစစ်ဆင်မှုတွေက မျှော်လင့်ထားသလို ချော့မွေမှုမရှိခဲ့ကြောင်း၊ စီစဉ်ထားသလိုမျိုးမဖြစ်ခဲ့ဘဲ ကျဆုံးခဲ့ကြောင်း ပြောဆိုခဲ့ပေမယ့် အသေးစိတ်အစီအစဉ်တွေကိုတော့ ထုတ်ဖော်ပြောဆိုခြင်းမျိုး မရှိခဲ့ပါဘူး။ ယူကရိန်းထောက်လှမ်းရေးအဖွဲ့အကြီးအကဲက ယူကရိန်းဟာ ဒီနှစ်အတွင်းမှာ ယူကရိန်းနဲ့ ရုရှားကြားဖြစ်ပွားနေတဲ့စစ်ပွဲကို အဆုံးသတ်အောင်လုပ်ပြနိုင်မယ့်အခွင့်အရေးများရှိနေကြောင်း ရှိနေတယ်လို့ မကြာသေးမီက ပြောဆိုခဲ့ဖူးပေမယ့် လက်ရှိအချိန်မှာတော့ ပြောဆိုချက်တွေဟာ အပြောင်းအလဲတွေ ဖြစ်သွားခဲ့ကြောင်း သိရပါတယ်။

ဒါ့အပြင် အောက်တိုဘာ ၇ ရက်မှာ စတင်ခဲ့တဲ့ ပါလက်စတိုင်းနဲ့ အစ္စရေးစစ်ပွဲအချိန်ကြာမယ်ဆိုရင် ယူကရိန်းအပေါ် အနောက်အုပ်စုနိုင်ငံတွေရဲ့ကူညီထောက်ပံ့ပေးမှု လျော့နည်းလာနိုင်ကြောင်း ၎င်းက ထပ်မံပြောဆိုခဲ့ပါတယ်။ အမေရိကန်နိုင်ငံခြားရေးဝန်ကြီး အန်တိုနီဘလီကန်ဟာ အောက်တိုဘာ ၁၂ ရက်က အစ္စရေးနိုင်ငံကို ရောက်ရှိလာ ခဲ့ပြီးနောက် အစ္စရေးအတွက် လိုအပ်တာတွေ ကူညီထောက်ပံပေးမယ်လို့ ကတိပြုခဲ့ပါတယ်။

ဝန်ကြီးအန်တိုနီဘလီကန်က အစ္စရေးနိုင်ငံရဲ့လေကြောင်းရန်ကာကွယ်ရေးစနစ်အတွက် လိုအပ်တဲ့ကျည်ဆံတွေ၊ ပိုမိုထောက်ပံ့ပေးဖွယ်ရှိနေကြောင်း၊ အစ္စရေးကိုကူညီပေးဖို့ အမေရိကန်လွှတ်တော်နှစ်ရပ်စလုံးကလည်း သဘောတူလက်ခံထားကြောင်း ဆိုပါတယ်။ အမေရိကန်လွှတ်တော်အမတ်တွေထဲမှာ အစ္စရေးကို ကူညီထောက်ပံ့ပေးဖို့ သဘောထားတူညီခဲ့ပေမယ့် ယူကရိန်းကို ကူညီထောက်ပံ့ပေးဖို့အချက်နဲ့ပတ်သက်ပြီး သဘောထားကွဲလွဲနေ ကြောင်း သိရပါတယ်။ 

ယူကရိန်းထောက်လှမ်းရေးအဖွဲ့အကြီးအကဲက "အစ္စရေးနဲ့ ပါလက်စတိုင်းစစ်ပွဲအချိန်ကြာမယ်ဆိုရင်တော့ အနောက်အုပ်စုနိုင်ငံတွေဟာ စစ်လက်နက်ပစ္စည်းတွေ လိုအပ်လာမှာဖြစ်တယ်။ ယူကရိန်းကို ကူညီထောက်ပံ့ပေးမှုတွေ လျော့ကျလာဖွယ်ရှိပါတယ်" လို့ ပြောပါတယ်။