မျိုးကြီး (NSS) - အောက်တိုဘာ ၁ဝ

တပ်ချုပ်၏ လူယုံဟု လူသိများသော ဒုတိယဗိုလ်ချုပ်ကြီးမိုးမြင့်ထွန်း နှင့် ဗိုလ်ချုပ်ရန်နောင်စိုးတို့ကို နိုင်ငံတော်သစ္စာဖောက်ဖျက်မှုဖြင့် ထောင်ဒဏ် တစ်သက်တစ်ကျွန်း ပြစ်ဒဏ်ချမှတ်လိုက်ကြောင်း သတင်းရရှိသည်။

ဒုတိယဗိုလ်ချုပ်ကြီး(ဟောင်း)မိုးမြင့်ထွန်းနှင့် ဗိုလ်မှူးချုပ်(ဟောင်း)ရန်နောင်စိုး တို့ကို စစ်တရားရုံးဖြင့် စစ်ဆေးစီရင်ပြီး ပြစ်ဒဏ်အသီးသီးချမှတ်လိုက်ကြောင်း နစကသတင်းထုတ်ပြန်ရေးအဖွဲ့က ယနေ့(အောက်တိုဘာ ၁ဝ ရက်) ညပိုင်းတွင် သတင်းထုတ်ပြန်လိုက်သည်။

ဒုတိယဗိုလ်ချုပ်ကြီးမိုးမြင့်ထွန်းသည် နစကအဖွဲ့ဝင်၊  MIC ဥက္ကဋ္ဌ၊ နိုင်ငံခြားသုံးငွေကြီးကြပ်မှုကော်မတီဥက္ကဋ္ဌ စသောတာဝန်များကို ထမ်းဆောင်စဉ် နိုင်ငံတော်၏ နိုင်ငံခြားသုံးငွေဆိုင်ရာမူဝါဒ၊ အရေးကြီးကုန်စည်ဆိုင်ရာမူဝါဒနှင့် အခြားစီးပွားရေးဆိုင်ရာမူဝါဒများကို ဆန့်ကျင်ကာ ပုဂ္ဂိုလ်ရေးအကျိုးအမြတ်ရယူပြီး နိုင်ငံတော်သစ္စာဖောက်ဖျက်မှုကို ကျူးလွန်ခဲ့သည်ဟု နစကမှ ဆိုသည်။

ထို့ပြင် နိုင်ငံတော်အစိုးရက စားအုန်းဆီများကို တင်သွင်းရန် သတ်မှတ်ရာခိုင်နှုန်းအတွက် ကျသင့်ဒေါ်လာများကို ဗဟိုဘဏ်က ရည်ညွန်းဈေးနှုန်းဖြင့် ရောင်းချပေးကာ တင်သွင်းစေခဲ့သော်လည်း ရည်ညွန်းဈေးနှုန်းထက် ဈေးတင်ရောင်းချခြင်းကို သိပါလျက် အရေးယူဆောင်ရွက်ရန် ဒုတိယဗိုလ်ချုပ်ကြီး(ဟောင်း)မိုးမြင့်ထွန်းအနေဖြင့် ပျက်ကွက်ခဲ့သည့်အပြင် ပတ်သက်ဆောင်ရွက်ခဲ့သည်ဟု နစကမှ ထုတ်ပြန်ထားသည်။

အလားတူ ကုမ္ပဏီများက ပေးအပ်သည့် တံစိုးလက်ဆောင်ပစ္စည်းများကို ရာထူးလုပ်ပိုင်ခွင့်ကိုအသုံးပြုကာ ရယူဆောင်ရွက်ခဲ့ခြင်း၊ နိုင်ငံခြားသုံးငွေများကို တရားမဝင် လက်ဝယ်ထားရှိခြင်း၊ စစ်စည်းကမ်းဆိုင်ရာညွှန်ကြားချက်များကို ဖောက်ဖျက်၍ အရပ်ဘက် စီးပွားရေးလုပ်ငန်းများတွင် ပါဝင်ဆောင်ရွက်ခဲ့သည်ဟု နစကမှ ဆိုသည်။

ထို့ကြောင့် ဒုတိယဗိုလ်ချုပ်ကြီး(ဟောင်း)မိုးမြင့်ထွန်းအား သက်ဆိုင်ရာဥပဒေပုဒ်မများဖြင့် စွဲချက်တင်ကာ စစ်တရားရုံးဖြင့် စစ်ဆေးစီရင်ပြီးနောက် (၂ဝ)နှစ်ကာလနှင့်ညီမျှသော တစ်သက်တစ်ကျွန်းပြစ်ဒဏ်ကို ချမှတ်ခဲ့သည်ဟု နစကမှ အသိပေးကြေညာထားသည်။

အလားတူ ဗိုလ်မှူးချုပ်(ဟောင်း)ရန်နောင်စိုးသည်လည်း ကုန်သွယ်မှုနှင့် ကုန်စည်စီးဆင်းမှုများ မှန်ကန်မြန်ဆန်ရေးဗဟိုကော်မတီ တွဲဖက်အတွင်းရေးမှူး တာဝန်ထမ်းဆောင်စဉ် နိုင်ငံတာ်၏ စီးပွားရေးဆိုင်ရာ မူဝါဒနှင့်ဆန့်ကျင်ကာ ပုဂ္ဂိုလ်ရေး အကျိုးအမြတ်ရယူဆောင်ရွက်ခဲ့သည်ဟု နစကမှ ထပ်မံ အသိပေးထားသည်။

ထို့ပြင် ဗိုလ်မှူးချုပ်(ဟောင်း)ရန်နောင်စိုးသည် နိုင်ငံခြားသုံးငွေဆိုင်ရာမူဝါဒ၊ အရေးကြီးကုန်စည်ဆိုင်ရာမူဝါဒနှင့် အခြားစီးပွားရေးဆိုင်ရာမူဝါဒများကို ဆန့်ကျင်ကာ ဒုတိယဗိုလ်ချုပ်ကြီး(ဟောင်း)မိုးမြင့်ထွန်းနှင့်အတူ နိုင်ငံတော်သစ္စာဖောက်ဖျက်မှုကို ပူးပေါင်းကျူးလွန်ခဲ့သည်ဟု နစကမှ ထုတ်ပြန်ထားသည်။

ဗိုလ်မှူးချုပ်(ဟောင်း)ရန်နောင်စိုးအနေဖြင့် ရာထူးလုပ်ပိုင်ခွင့်ကို အသုံးပြုကာ စီးပွားရေးလုပ်ငန်းရှင်များအား နိုင်ငံခြားငွေနှင့် မြန်မာကျပ်ငွေများကို လဲလှယ်ပေးခြင်း၊ လုပ်ငန်းရှင်များထံမှ နိုင်ငံခြားငွေနှင့် ကျပ်ငွေများကို လက်ခံရယူခဲ့ခြင်း၊ စီးပွားရေးလုပ်ငန်းရှင်များအား ဒုတိယဗိုလ်ချုပ်ကြီး(ဟောင်း)မိုးမြင့်ထွန်းနှင့် ဆက်သွယ်ဆောင်ရွက်ပေးခြင်း၊ နိုင်ငံခြားငွေများကို တရားမဝင်လက်ဝယ်ထားရှိခြင်း၊ စစ်စည်းကမ်းဆိုင်ရာ ညွှန်ကြား ချက်များကို ဖောက်ဖျက်ကာ အရပ်ဘက်စီးပွားရေးလုပ်ငန်းများတွင် ပါဝင်ဆောင်ရွက်ခဲ့ကြောင်း သိရသည်။

ထို့ကြောင့် ဗိုလ်မှူးချုပ်(ဟောင်း)ရန်နောင်စိုးကို သက်ဆိုင်ရာဥပဒပုဒ်များဖြင့် စွဲချက်တင်ကာ စစ်တရားရုံးဖြင့် စစ်ဆေးစီရင်ပြီးနောက် (၂ဝ)နှစ် ကာလနှင့်ညီမျှသော တစ်သက်တစ်ကျွန်း ထောင်ဒဏ်ကို ချမှတ်ခဲ့သည်ဟု နစကမှ ထုတ်ပြန်ထားသည်။

ဗိုလ်ချုပ်မှူးကြီးမင်းအောင်လှိုင် ဦးဆောင်သော နစကအစိုးရလက်ထက်တွင် တပ်မတော်ပိုင်းဆိုင်ရာအကြီးအကဲများကို နိုင်ငံတော်သစ္စာဖောက်ဖျက်မှုဖြင့် ပြင်းထန်စွာအရေးယူခြင်းမှာ ယခုအကြိမ်သည် ပထမဆုံးအကြိမ်လည်း ဖြစ်သည်။