မျိုးကြီး (NSS) - အောက်တိုဘာ ၇

National Database တည်ဆောက်ပြီးစီးပါက နိုင်ငံသားများ၏ လူမှုဘဝလုံခြုံမှုကို ပိုမိုဆောင်ရွက်ပေးနိုင်မည်ဖြစ်ကြောင်း နစကဒုဥက္ကဋ္ဌ ဒုတိယဗိုလ်ချုပ်ကြီးစိုးဝင်းက ပြောသည်။

၎င်းက ယမန်နေ့(အောက်တိုဘာလ ၆ ရက်)တွင် နေပြည်တော်ရှိ လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန၌ ပြုလုပ်သော National Database စနစ်တည်ဆောက်ရေးဦးဆောင်ကော်မတီအစည်းအဝေးတွင် အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။

လက်ရှိ မြန်မာနိုင်ငံတွင် e-ID စနစ် အကောင်အထည်ဖော်ဆောင်ရွက်ခြင်းဖြင့် နိုင်ငံတော်အတွက် လိုအပ်သည့် အချက်အလက်များကို တစ်နေရာတည်း၌ ရရှိနိုင်ကြောင်း သိရသည်။

အဆိုပါ e-ID စနစ်ဖြင့် ကောက်ယူထားရှိသည့် Data များသည် လူပုဂ္ဂိုလ်ဆိုင်ရာအချက်အလက်များ ဖြစ်သည့်အပြင် နိုင်ငံတော်အတွက် အရေးကြီးသည့် National Database ဖြစ်၍ ၎င်းတို့ကို လုံခြုံစွာ ထိန်းသိမ်းရန်အရေးကြီးကြောင်း ဒုတိယ ဗိုလ်ချုပ်မှူးကြီးစိုးဝင်းက သတိပေးထားသည်။

National Database သည် လူတစ်ဦးချင်းစီ၏ ဝန်ဆောင်မှုကို ပေးနိုင်ရန်အတွက် လူတစ်ဦးချင်းစီ၏ ကိုယ်ရေးအချက်အလက်များကို e-ID စနစ်ထဲတွင် ထည့်သွင်းပြီး သက်ဆိုင်ရာဝန်ကြီးဌာနများက ၎င်း e-ID စနစ်ထဲတွင်ရှိသည့် လူတစ်ဦးချင်းစီ၏ ကိုယ်ရေးအချက်အလက်များမှ ချိတ်ဆက်ပြီး ဝန်ဆောင်မှုပေးသည့် လုပ်ငန်းစဉ်ဖြစ်ကြောင်း သိရသည်။

ထို့ကြောင့် e-ID စနစ်လုပ်ငန်းကော်မတီသည် စီမံချက်များချမှတ်ကာ အရှိန်အဟုန်ဖြင့် ဆောင်ရွက်နေသည့်အတွက် National Database အဖြစ် တည်ဆောက်ပြီးစီးပါက နိုင်ငံသားများ၏ လူမှုဘဝလုံခြုံမှုကို ပိုမိုဆောင်ရွက်ပေးနိုင်မည်ဟု ဒုတပ်ချုပ်က ပြောသည်။

ထို့ပြင် e-ID တွင် ပါဝင်သည့် National Database နှင့် ဝန်ကြီးဌာနထဲ၌ ပြုစုထိန်းသိမ်းထားသည့် Database များသည် ပြည်သူများအပေါ် ချပြ၍ရသည့် Database များရှိသကဲ့သို့ နိုင်ငံတော်နှင့် ဝန်ကြီးဌာနအတွက် လုံခြုံရေးအရ ထုတ်ဖော်ချပြ၍မရသည့် Database များလည်းရှိကြောင်း ၎င်းက ဆက်လက်ပြောသည်။

ထို့ကြောင့် Cyber Security ဆိုင်ရာ လုံခြုံမှုစနစ်များကို အဆင့်လိုက်ထားရှိကာ ကွန်ရက်လုံခြုံမှုစောင့်ကြည့်စနစ်များ ထားရှိရန်နှင့် မြန်မာနိုင်ငံကွန်ပျူတာအရေးပေါ် ကွန်ရက်တုံ့ပြန်မှုစနစ်များကိုပါ အင်အားဖြည့်တင်းရန် လိုအပ်ကြောင်း တိုက်တွန်းထားသည်။

e-ID စနစ်သည် နိုင်ငံအတွင်း၌ တရားဝင်မှီတင်နေထိုင်သူအားလုံး၏ ကိုယ်ရေးအချက်အလက်များကို ခေတ်မီနည်းပညာ ကွန်ပျူတာစနစ်ဖြင့် အစိုးရ၏ Database ထဲတွင် သိမ်းဆည်းထားခြင်းဖြစ်ပြီး လိုအပ်ပါက လူတစ်ဦးချင်းစီ၏ ကိုယ်ရေးအချက်အလက်များကို ပြန်လည်ရှာဖွေနိုင်ကြောင်း သိရသည်။

လက်ရှိတွင် e-ID စနစ်ကို လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာနက တာဝန်ခံဝန်ကြီးဌာနအနေဖြင့် အကောင်အထည်ဖော်ဆောင်ရွက်လျက်ရှိကြောင်း သိရသည်။