စော(NSS) - အောက်တိုဘာ ၄

၂၀၂၃ ခုနှစ်၊ ဇန်နဝါရီလမှ စက်တင်ဘာလအထိ (၉)လအတွင်း YBS ယာဉ်မောင်းများ စည်း ကမ်းဖောက်ဖျက်သည့် အမှုပေါင်း (၁၆၀၀၀)ကျော်ရှိခဲ့ကြောင်း သိရသည်။

ရန်ကုန်တိုင်း ပုဂ္ဂလိက သယ်ယူပို့ဆောင်ရေးကြီးကြပ်မှုကော်မတီ (YRTC)မှ ယခုရက်ပိုင်းအတွင်း အထက်ပါကဲ့သို့ထုတ်ပြန်ထားခြင်းဖြစ်သည်။

YRTC အနေဖြင့် စည့်ကမ်းဖောက်ဖျက်သည့် YBS ယာဉ်မောင်းများကို စောင့်ကြည့်စစ်ဆေးအရေးယူများ ဆောင်ရွက်လျက်ရှိကြောင်း သိရသည်။

ယခုနှစ် ဇန်နဝါရီလမှ စက်တင်ဘာလ (၂၅)ရက်အထိ စည်းကမ်းဖောက်ဖျက်သည့် အမှုပေါင်း (၁၆၆၉၉)ကို အရေးယူဆောင်ရွက်ခဲ့ရာ (၈၁၈၆)မှုသည် ဒဏ်ကြေးပေးဆောင်ခဲ့ပြီး အမှုပေါင်း (၈၅၁၃)မှု ကျန်ရှိနေသေးကြောင်း သိရသည်။

“အမှုပေါင်းကတော့ (၁၆၆၉၉)မှုရှိတယ်။ (၈၁၈၆)မှု ဖြေရှင်းပြီးတာပါ။ ကျန်ရှိတာက (၈၅၁၃)မှုပါ။  ဖြေရှင်းတယ်ဆိုတာကလည်း ဒဏ်ကြေးငွေဆောင်ပြီးသားကိုပြောတာပါ။ ယာဉ်အန္တရာယ်ဖြစ်စေတာတွေ၊ ယာဉ်ကြောပိတ်ဆို့တာတွေ ယာဉ်တစ်စီးနဲ့တစ်စီးကျော်တက်တာတွေ မီးနီဖြတ်မောင်းတာတွေ၊ မဆင်မခြင်မောင်းနှင်တာတွေကို အဓိကထားဖမ်းတာပါ”ဟု YRTC မှတွဲဖက်အတွင်းရေးမှူး ဦးလျန်ကျင့်မန်က NSS ကိုပြောသည်။

အဆိုပါစည်းကမ်းဖောက်ဖျက်မှုများအနက် မှတ်သားဖမ်းဆီးမှု (၁၁၉၀၉)မှု၊ တိုင်ကြားမှု (၆၅၉)မှု၊ ယာဉ်တစ်စီးနှင့်တစ်စီး ယှဉ်ပြိုင်မောင်းနှင်မှု (၄၉၆)မှု၊ မဆင်မခြင်မောင်းနှင်မှု (၈၆)မှု ၊ မီးနီဖြတ်မောင်းမှု(၁၇၆၁)မှု ၊ သတ်မှတ်ကီလိုနှုန်းထားအထက် ကျော်လွန်မောင်းနှင်မှု (၇၉၁)မှု၊ မှတ်တိုင်တွင် ရပ်နားချိန်ကြာမြင့်မှု(၁၂၂)မှု စသည့်အမှုများသည် အများဆုံးဖောက်ဖျက်မှုဖြစ်ကြောင်း သိရသည်။ 

“ယာဉ်စည်းကမ်းထိန်းသိမ်းရေးအဖွဲ့တွေနဲ့ ပူးပေါင်းအဖွဲ့ဖွဲ့ထားတာတွေရှိတယ်။ ယာဉ်စည်းကမ်းထိန်းသိမ်းရေးကားတွေနဲ့ စစ်ဆေးလှည့်လည်စောင့်ကြည့်တာတွေရှိတယ်။ နောက်ပြီးတော့ မှတ်တိုင်တွေမှာ ယာဉ်စစ်ဆေးရေးဝန်ထမ်းတွေ ချထားတာတွေရှိတယ်။ YBO (Yangon Bus Operator) ဌာနကနေပြီးတော့ Telematics Device တပ်ထားတဲ့ယာဉ်တွေ မဆင်မခြင်မောင်းနှင်တာ၊ သတ်မှတ်မိုင်နှုန်းထက် ပိုမောင်းတာ၊ နယ်ကျော်တာတွေ၊ မှတ်တိုင်မှာ ရပ်နားချိန်ကြာမြင့်တာတွေကို  မှတ်သားဖမ်းဆီးတာတွေရှိပါတယ်” ဟု ဦးလျန်ကျင့်မန်က ဆက်လက်ပြောသည်။

အဆိုပါ စည်းကမ်းဖောက်ဖျက်နေသော YBS ယာဉ်များကို YRTC ယာဉ်စည်းကမ်းထိန်းသိမ်းရေး နှင့် စစ်ဆေးရေးဌာနမှ ယာဉ်စည်းကမ်းထိန်းသိမ်းရေးယာဉ်များဖြင့် စစ်ဆေးလှည့်လည်ခြင်း နှင့် YRTC ယာဉ်စစ်ဆေးရေးဝန်ထမ်းများက စောင့်ကြည့်စစ်ဆေးအရေးယူခြင်းများ ဆောင်ရွက်လျက်ရှိကြောင်း သိရသည်။