Pika (NSS) - အောက်တိုဘာ ၃ 

အမေရိကန်အစိုးရသည် ယူကရိန်းတွင် အကျင့်ပျက်ခြစားမှုများရှိနေခြင်းနှင့်ပတ်သက်ပြီး စိုးရိမ်မှုများရှိနေကြောင်း Politico သတင်းစာက ဖော်ပြခဲ့သည်။

ယူကရိန်းသည် အကျင့်ပျက်ခြစားမှုများကို မဖြေရှင်းပါက အနောက်အုပ်စုနိုင်ငံများသည် ယူကရိန်းအတွက် စစ်ရေးအကူအညီများ ကူညီထောက်ပံ့ပေးနေခြင်းအား ရုတ်သိမ်းသွားမည်ကို  စိုးရိမ်ရဖွယ်ရှိနေကြောင်း အဆိုပါသတင်းဌာနထဲတွင် ဖော်ပြထားသည်။ 

Politico သတင်းဌာနက  "အကျင့်ပျက်ခြစားမှုတွေရှိနေတာဟာ ယူကရိန်းအစိုးရအပေါ် ယူကရိန်းပြည်သူတွေနဲ့ နိုင်ငံရပ်ခြားခေါင်းဆောင်တွေရဲ့ယုံကြည်မှုတွေကို ထိခိုက်ပျက်ပြားစေနိုင်ပါတယ်" ဟုဖော်ပြထားသည်။

အမေရိကန်သမ္မဂျိုးဘိုင်ဒန်သည် အကျင့်ပျက်ခြစားမှုတိုက်ဖျက်ရေး ကြိုးပမ်းအားထုတ်မှုများကို ပိုမိုအရှိန်မြှင့်လုပ်ဆောင်ရန် ယူကရိန်းအစိုးရကို တိုက်တွန်းထားကြောင်းလည်း သိရသည်။ ထို့အပြင် ယူကရိန်းအစိုးရ နှင့် ပုဂ္ဂလိကကဏ္ဍများတွင် အကျင့်ပျက်ခြစားမှုများရှိနေခြင်းသည် ရေရှည်တွင် အမေရိကန်၏ အကူအညီများကို ထိခိုက်စေနိုင်ကြောင်း အမေရိကန်သမ္မတဂျိုးဘိုင်ဒန်က ပြီးခဲ့သည့်လများတွင် သတိပေးပြောခဲ့သည်။

ယူကရိန်းသည် ကမ္ဘာပေါ်တွင် အကျင့်ပျက်ခြစားမှု အများဆုံးရှိနေသည့် နိုင်ငံတစ်နိုင်ငံအဖြစ် နှစ်ပေါင်းများစွာ သတ်မှတ်ခံခဲ့ရကြောင်းလည်း သိရသည်။ Transparency International’s Corruption Perception Index အရ ၂ဝ၂၂ ခုနှစ်တွင် ယူကရိန်းသည် အကျင့်ပျက်ခြစားမှုများရှိနေသည့် နိုင်ငံပေါင်း(၁၈ဝ)တွင် အဆင့်(၁၁၆)မှာ ရှိနေကြောင်းလည်း သိရသည်။

ထို့အပြင် ယူကရိန်းတွင် အကျင့်ပျက်ခြစားမှုများရှိနေခြင်းသည် ၎င်း၏ နိုင်ငံတကာဂုဏ်သတင်း နှင့် ကာကွယ်ရေးစွမ်းရည်များကို ထိခိုက်စေကြောင်း လစ်သူယေးနီးယားသမ္မတ Gitanas Nauseda က ပြီးခဲ့သည့်လများတွင် သတိပေးပြောခဲ့သည်။ 

အဆိုပါအချက်များကြောင့် အနောက်အုပ်စုနိုင်ငံများ၏ ခေါင်းဆောင်များသည် ယူကရိန်းသို့ နောက်ထပ် စစ်လက်နက်ပစ္စည်းများ ပေးပို့ရန်အတွက် ခက်ခဲသောစဉ်းစားဆုံးဖြတ်မှုများကို လုပ်ဆောင်နေရကြောင်း ၎င်းက ထပ်မံပြောခဲ့သည်။