စော(NSS) - အောက်တိုဘာ ၃

လူမှုဖူလုံရေးအဖွဲ့၌ အလုပ်အကိုင်ရာထူးနေရာ (၂၀၂)ဦး လစ်လပ်လျက်ရှိပြီး အခြေခံမူလတန်းအဆင့် အောင်မြင်ပြီးသူများ လျှောက်ထားနိုင်ကြောင်း သိရသည်။

အလုပ်သမားဝန်ကြီးဌာန၊ လူမှုဖူလုံရေးအဖွဲ့မှ ယနေ့(အောက်တိုဘာလ ၃ ရက်)တွင် အထက်ပါကဲ့သို့ကြေညာထားခြင်းဖြစ်သည်။

လူမှုဖူလုံရေးအဖွဲ့တွင် အငယ်တန်းစာရေးရာထူးအတွက် (၁၈၀)ဦးခန့်အပ်သွားမည်ဖြစ်ပြီး တက္ကသိုလ်တစ်ခုခုမှ ဘွဲ့ရရှိရန်လိုအပ်ကြောင်း ထုတ်ပြန်ထားသည်။

ထို့ပြင် ယာဉ်မောင်း(၅)ရာထူးအတွက် (၃)ဦးနှင့် ရုံးအကူရာထူးအတွက် (၂)ဦး ခေါ်ယူသွားမည်ဖြစ်၍ အခြေခံပညာအလယ်တန်းအောင်မြင်ရန်လိုအပ်ပြီး ယာဉ်မောင်းရာထူးများအနေဖြင့် “ခ”အဆင့် ယာဉ်မောင်း လိုင်စင်ရှိရမည်ဖြစ်ကြောင်း သိရသည်။

အလားတူ အစောင့်ရာထူးအတွက် (၁၀)ဦး၊ သန့်ရှင်းရေးအကူရာထူးအတွက် (၃)ဦး၊ ထမင်းချက်ရာထူးအတွက် (၃)ဦး၊ ရင်ခွဲရုံလုပ်သားရာထူးအတွက် (၁)ဦးတို့ကို ခေါ်ယူသွားမည်ဖြစ်ပြီး အခြေခံပညာမူလတန်း အောင်မြင်သူဖြစ်ရမည်ဖြစ်ကြောင်း သိရသည်။

အဆိုပါ ရာထူးနေရာ (၂၀၂)ဦးအနက် အငယ်တန်းစာရေး၊ ယာဉ်မောင်း (၅)၊ ရုံးအကူရာထူးများ လျှောက်ထားသူများသည် အသက် (၁၈)နှစ်မှ အသက် (၃၅)နှစ်အတွင်းဖြစ်ရန် လိုအပ်ကြောင်း ထုတ်ပြန်ချက်အရသိရသည်။

အလားတူ အစောင့်၊ သန့်ရှင်းရေးအကူ၊ ထမင်းချက်၊ ရင်ခွဲရုံလုပ်သားရာထူးများ လျှောက်ထားသူများသည် အသက်(၁၈)နှစ်မှ အသက် (၄၅)နှစ်အတွင်းဖြစ်ရန် လိုအပ်ကြောင်း သိရသည်။

လျှောက်လွှာများကို လူမှုဖူလုံရေးအဖွဲ့(ရုံးချုပ်)၊ တိုင်း/ပြည်နယ် လူမှုဖူလုံရေးရုံးများ၊ ခရိုင်လူမှုဖူလုံရေးရုံးများနှင့် မြို့နယ်လူမှုဖူလုံရေးရုံးများသို့ နိုဝင်ဘာလ (၉)ရက်နောက်ဆုံးထား၍ ပေးပို့လျှောက်ထားနိုင်ကြောင်း ထုတ်ပြန်ထားသည်။

ထို့ပြင် စာမေးပွဲဖြေဆိုခွင့်ကတ်ပြားများကို နိုဝင်ဘာလကုန်မှ ဒီဇင်ဘာလ(၁)ရက်တို့တွင် ရုံးချိန်အတွင်း ထုတ်ယူနိုင်ကြောင်း သိရသည်။