မြူနစ် (NSS) - အောက်တိုဘာ ၃

နစကဥက္ကဋ္ဌ နှင့် KNU ဥက္ကဋ္ဌဟောင်းစောမူတူးစေးဖိုး ဦးဆောင်သောအဖွဲ့တို့ တွေ့ဆုံမှုသည် ကရင်အမျိုးသားအစည်းအရုံး (KNU)နှင့် ပတ်သက်ခြင်း လုံးဝမရှိကြောင်း ထုတ်ပြန်ထားသည်။

KNU ဗဟိုအလုပ်အမှုဆောင်ကော်မတီက ယမန်နေ့(အောက်တိုဘာလ ၂ ရက်)တွင် သတင်းထုတ်ပြန်ရာ၌ အထက်ပါကဲ့သို့ ထည့်သွင်းထုတ်ပြန်ခဲ့ခြင်းဖြစ်သည်။

ပြီးခဲ့သော စက်တင်ဘာလ ၃၀ ရက်တွင် နေပြည်တော်၌ ဗိုလ်ချုပ်မှူးကြီးမင်းအောင်လှိုင် ဦးဆောင်သောအဖွဲ့နှင့် စောမူတူးစေးဖိုး ဦးဆောင်သောအဖွဲ့တို့သည် ငြိမ်းချမ်းရေးအတွက် တွေ့ဆုံဆွေးနွေးခဲ့ကြသည်။

အဆိုပါတွေ့ဆုံမှုသည် KNU နှင့်ပတ်သက်ခြင်း လုံးဝမရှိကြောင်းနှင့် တပ်မတော်နှင့်လည်း နိုင်ငံရေးအရ တွေ့ဆုံဆွေးနွေးရန် လုံးဝမရှိကြောင်း KNU ဘက်က ထုတ်ပြန်ထားသည်။

ထို့ပြင် ၎င်းကဲ့သို့တွေ့ဆုံမှုသည် KNU အတွင်း ရှုပ်ထွေးမှုဖြစ်ရန် လုပ်ဆောင်ခြင်းဖြစ်သကဲ့သို့ အာဏာရှင်စနစ်ချုပ်ငြိမ်းရေး နှင့် ဖက်ဒရယ်ဒီမိုကရေစီပြည်ထောင်စု ထူထောင်ရေးအတွက် တိုက်ပွဲဝင်နေသည့် မဟာမိတ်အင်အားစုများအကြား နားလည်မှုလွဲမှားစေရန် လုပ်ဆောင်သည့်အစီအစဉ်သာဖြစ်ကြောင်းလည်း KNU က ထုတ်ပြန်ထားသည်။

KNU အနေဖြင့် နိုင်ငံရေးရည်မှန်းချက်အောင်မြင်ရေးအတွက် ဘဝတူတော်လှန်ရေးအင်အားစုများနှင့်အတူ တိုက်ပွဲဝင်သွားမည်ဟုလည်း အသိပေးထုတ်ပြန်ထားသည်။

သို့သော် KNU ဥက္ကဋ္ဌဟောင်းစောမူတူးစေးဖိုးနှင့်တွေ့ဆုံမှုသည် ကရင်ပြည်နယ်အပါအဝင် တစ်နိုင်ငံလုံးအတိုင်းအတာဖြင့် ငြိမ်းချမ်းမှုရရှိရေး၏ ခြေလှမ်းသစ်တစ်ခုဖြစ်ကြောင်း နစကဥက္ကဋ္ဌဗိုလ်ချုပ်မှူးကြီးမင်းအောင်လှိုင်က ပြောကြားခဲ့သည်။

ထို့ပြင် တွေ့ဆုံပွဲ၌ စောမူတူးစေးဖိုး ဦးဆောင်သောအဖွဲ့က ငြိမ်းချမ်းရေးကို ဖော်ဆောင်ရာတွင် NCA အပေါ်တွင်သာ ရပ်တည်ဆောင်ရွက်သွားရမည်ဖြစ်ပြီး NCA အပေါ် အထောက်အထားမဲ့၊ အဓိပ္ပာယ်မဲ့စွာ လက်လွတ်စပယ်ပြောကြားမှုများကို လက်မခံနိုင်ကြောင်း ထည့်သွင်းဆွေးနွေးခဲ့ကြသည်ဟု နစကဘက်က ထုတ်ပြန်ခဲ့ဖူးသည်။

နစကဥက္ကဋ္ဌနှင့်တွေ့ဆုံပွဲသို့ KNU ဥက္ကဋ္ဌဟောင်း စောမူတူးစေးဖိုးနှင့်အတူ KNU ဗဟိုကော်မတီဝင်ဟောင်း စောရောဂျာခင်၊ ကော့ကရိတ်ခရိုင်ဥက္ကဋ္ဌ ပဒိုရွှေမောင်းတို့က တက်ရောက်ဆွေးနွေးခဲ့ကြောင်း သိရသည်။